ઈમરાન ખાન વિરુદ્ધ ધરપકડ વોરંટ જાહેર, મહિલા મેજિસ્ટ્રેટને ધમકી આપવાનો કેસ

પાકિસ્તાનના (pakistan) પૂર્વ વડાપ્રધાન ઈમરાન ખાન (Imran khan) વિરુદ્ધ ધરપકડ વોરંટ (warrant)જાહેર કરવામાં આવ્યું છે. મહિલા મેજિસ્ટ્રેટ જેબા ચૌધરીને ધમકી આપવા બદલ પાકિસ્તાન તહરીક-એ-ઈન્સાફના અધ્યક્ષ વિરુદ્ધ ધરપકડ વોરંટ જાહેર કરવામાં આવ્યું છે. મારગલ્લા પોલીસ સ્ટેશનના એરિયા મેજિસ્ટ્રેટે ખાન વિરુદ્ધ ધરપકડ વોરંટ જાહેર કર્યું છે. ઈમરાન ખાન વિરુદ્ધ ઈસ્લામાબાદમાં મહિલા જજને ધમકી આપવાનો કેસ નોંધવામાં આવ્યો હતો. 20 ઓગસ્ટના રોજ મારગલ્લા પોલીસ સ્ટેશનમાં નોંધાયેલા કેસમાં ધરપકડ વોરંટ જાહેર કરવામાં આવ્યું છે. આમાં ઈમરાન ખાન વિરુદ્ધ કલમ 504/506 અને 188/189 હેઠળ કેસ નોંધવામાં આવ્યો છે. મરગલ્લા પોલીસ સ્ટેશનમાં ઈમરાન ખાન વિરુદ્ધ નોંધાયેલ કેસ નંબર 407 છે. આંતરરાષ્ટ્રીય સમાચાર અહીં વાંચો.

આ પહેલા શુક્રવારે પાકિસ્તાનના પદભ્રષ્ટ વડાપ્રધાન ઈમરાન ખાન મહિલા ન્યાયાધીશ જેબા ચૌધરીની અંગત રીતે માફી માંગવા માટે સેશન્સ કોર્ટમાં હાજર થયા હતા. જો કે, જ્યારે ખાન અને તેમના વકીલ સંબંધિત ન્યાયાધીશની કોર્ટમાં હાજર થયા, ત્યારે ત્યાં હાજર સ્ટાફ – કોર્ટ રીડર ચૌધરી યાસિર અયાઝ અને સ્ટેનોગ્રાફર ફારુકે પાકિસ્તાન તહરીક-એ-ઈન્સાફ (પીટીઆઈ)ના વડાને જાણ કરી કે ન્યાયિક મેજિસ્ટ્રેટ રજા પર છે. આ પછી ખાને અયાઝ સાથે લેડી જજ માટે એક મેસેજ છોડ્યો.

પીટીઆઈ દ્વારા ટ્વિટર પર શેર કરવામાં આવેલા વિડિયોમાં, તે કોર્ટના રીડરને કહેતા સાંભળી શકાય છે, “હું જ્યુડિશિયલ મેજિસ્ટ્રેટ જેબા ચૌધરીની માફી માંગવા આવ્યો છું.” અને જો તેમના (ખાનના) શબ્દોથી તેમની ભાવનાઓને ઠેસ પહોંચી હોય, તો તે માફી માંગવા માંગે છે. આ પીટીઆઈ ચીફ કોર્ટ રૂમમાંથી બહાર નીકળી ગયા હતા.

આગામી સુનાવણી 3 ઓક્ટોબરે

ઈસ્લામાબાદ હાઈકોર્ટે 3 ઓક્ટોબરના રોજ તિરસ્કારના કેસમાં ખાનની આગામી સુનાવણી સુનિશ્ચિત કરી છે અને તે સ્પષ્ટ નથી કે કોર્ટ વધારાના સેશન્સ જજ ચૌધરીની માફી માંગવા માટે તેમની મુલાકાતથી સંતુષ્ટ થશે કે કેમ. આ પહેલા આ મામલામાં છેલ્લી સુનાવણી 22 સપ્ટેમ્બરે થઈ હતી. આ દરમિયાન ખાને કહ્યું હતું કે તે ન્યાયાધીશને ધમકાવવાનો ઈરાદો નહોતો અને તે તેમને (ચૌધરીને) રૂબરૂ મળવા અને માફી માંગવા તૈયાર છે.

શું હતો સમગ્ર મામલો?

ઈમરાન ખાને 20 ઓગસ્ટે ઈસ્લામાબાદમાં એક જાહેર રેલી દરમિયાન મહિલા જજને કથિત રીતે ધમકી આપી હતી. રેલી દરમિયાન ખાને તેમના સાથીદાર શાહબાઝ ગિલના વર્તન બદલ ઉચ્ચ પોલીસ અધિકારીઓ, ચૂંટણી પંચ અને રાજકીય વિરોધીઓ સામે કેસ નોંધવાની ધમકી આપી હતી. ગિલની રાજદ્રોહના આરોપમાં ધરપકડ કરવામાં આવી હતી. મહિલા ન્યાયાધીશે કેપિટલ ટેરિટરી પોલીસની વિનંતી પર ગિલની બે દિવસની કસ્ટડી મંજૂર કરી હતી.

આ પછી ઈમરાન ખાને મહિલા જજને ધમકી આપી હતી. ખાને જેબા ચૌધરીને (મહિલા મેજિસ્ટ્રેટ) કહ્યું હતું, ‘તૈયાર રહો કારણ કે તેની સામે કાર્યવાહી કરવામાં આવશે.’ આતંકવાદ વિરોધી કાયદા હેઠળ કેસ નોંધવામાં આવ્યો હતો. આ પછી ઈસ્લામાબાદ હાઈકોર્ટમાં ખાન વિરુદ્ધ અવમાનનાની કાર્યવાહી શરૂ થઈ.