Breaking News : જગત જમાદાર ટ્રમ્પના બેવડા દાવા, ઇરાન સોદા માટે ઉત્સુક, રશિયા-યુક્રેન ઊર્જા હુમલા રોકવા સંમત

અમેરિકાના રાષ્ટ્રપતિ ડોનાલ્ડ ટ્રમ્પે સોમવારે અમેરિકા-ઈરાન સંબંધો અને રશિયા-યુક્રેન યુદ્ધને લઈને મહત્વપૂર્ણ દાવા કર્યા હતા. ટ્રમ્પે કહ્યું કે ઈરાન અમેરિકા સાથે ઝડપથી અને ઉતાવળપૂર્વક કરાર કરવા માંગે છે. જોકે, અમેરિકા તેહરાન સાથે વાટાઘાટો કરશે કે નહીં તેનો નિર્ણય પોતે લેશે તેમ પણ તેમણે સ્પષ્ટ કર્યું હતું.

બીજી તરફ, ટ્રમ્પે એવો પણ દાવો કર્યો કે રશિયા અને યુક્રેન એકબીજાના ઊર્જા માળખા અને ઊર્જા લક્ષ્યો પર હુમલા રોકવા માટે સંમત થયા છે. ટ્રમ્પના આ બંને દાવાઓને કારણે આંતરરાષ્ટ્રીય સ્તરે ફરી ચર્ચા શરૂ થઈ છે.

ઈરાન સોદો કરવા માંગે છે: ટ્રમ્પ

ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર લખ્યું હતું કે, “ઈરાન જેવો નિષ્ફળ દેશ ઝડપથી અને ભયાવહ રીતે સોદો કરવા માંગે છે.” તેમણે વધુમાં કહ્યું કે અમેરિકા તેહરાન સાથે વાટાઘાટો કરશે કે નહીં, તેનો નિર્ણય તેઓ પોતે લેશે.

ટ્રમ્પે સંકેત આપ્યો કે ઈરાન સાથે કોઈપણ સંભવિત કરાર અંગે અમેરિકાની સ્થિતિ હજુ અંતિમ નથી. વોશિંગ્ટન અને તેહરાન વચ્ચે લાંબા સમયથી ચાલી રહેલા તણાવ વચ્ચે ટ્રમ્પનું આ નિવેદન મહત્વપૂર્ણ માનવામાં આવી રહ્યું છે.

રશિયા-યુક્રેન વચ્ચે ઊર્જા હુમલા રોકવા સહમતી?

રશિયા-યુક્રેન યુદ્ધ અંગે ટ્રમ્પે વધુ એક મોટો દાવો કર્યો છે. તેમણે કહ્યું કે યુક્રેન અને રશિયા એકબીજાના ઊર્જા લક્ષ્યો પર હુમલા નહીં કરવા માટે સંમત થયા છે.

ટ્રમ્પે ‘ટ્રુથ સોશિયલ’ પર લખ્યું હતું કે, “યુક્રેન રશિયન ઊર્જા લક્ષ્યો પર હુમલો નહીં કરવા સંમત થયું છે. રશિયા પણ આવું કરવા સંમત થયું છે.” તેમણે આ મુદ્દાને વૈશ્વિક ડીઝલના વધતા ભાવ સાથે પણ જોડ્યો હતો.

ટ્રમ્પનો આ દાવો તેમણે યુક્રેનના રાષ્ટ્રપતિ વોલોડિમિર ઝેલેન્સ્કીને રશિયન ઊર્જા સુવિધાઓ પર હુમલા રોકવાની અપીલ કર્યાના એક દિવસ બાદ આવ્યો છે. ટ્રમ્પનું માનવું છે કે રશિયાની ડીઝલ ઉત્પાદન ક્ષમતા પર થઈ રહેલા હુમલાઓ વૈશ્વિક ઈંધણ પુરવઠા પર અસર કરી રહ્યા છે.

ડીઝલના વધતા ભાવથી અમેરિકા ચિંતિત

આયર્લેન્ડમાં પોતાના ડૂનબેગ ગોલ્ફ ક્લબ ખાતે પત્રકારો સાથે વાતચીત દરમિયાન ટ્રમ્પને રશિયન ઊર્જા સુવિધાઓ પર યુક્રેનના હુમલા અંગે પ્રશ્ન પૂછવામાં આવ્યો હતો. તેના જવાબમાં તેમણે કહ્યું કે રશિયાની ડીઝલ ઉત્પાદન ક્ષમતાને નુકસાન પહોંચાડવાથી સમગ્ર વિશ્વને નુકસાન થઈ રહ્યું છે.

ટ્રમ્પના નિવેદન એવા સમયે આવ્યા છે જ્યારે અમેરિકામાં ઈંધણના ભાવમાં વધારો જોવા મળી રહ્યો છે. શુક્રવારે ડીઝલના ભાવ પ્રતિ ગેલન 6 ડોલરથી વધુની રેકોર્ડ સરેરાશ સપાટીએ પહોંચ્યા હતા. રશિયાના ઊર્જા ક્ષેત્ર પર યુક્રેનના હુમલા અને હોર્મુઝ સ્ટ્રેટમાં સર્જાયેલા વિક્ષેપને કારણે વૈશ્વિક ઈંધણ પુરવઠા પર દબાણ વધ્યું હોવાનું જણાવવામાં આવી રહ્યું છે.

આ સમગ્ર પરિસ્થિતિ વચ્ચે ટ્રમ્પના ઈરાન સાથે સંભવિત સોદા અને રશિયા-યુક્રેન વચ્ચે ઊર્જા હુમલા રોકવા અંગેના દાવાઓ આગામી દિવસોમાં આંતરરાષ્ટ્રીય રાજનીતિ અને વૈશ્વિક ઊર્જા બજાર માટે મહત્વપૂર્ણ બની શકે છે.

દિલ્હી એરપોર્ટ પર સુરક્ષામાં મોટી ચૂક, ઇમિગ્રેશન ક્લિયરન્સ વિના રવાના થયા 3 ઇટાલિયન મુસાફરો