Donald Trump health report : 79 વર્ષની ઉંમર, પણ 65 વર્ષનું હૃદય ! ટ્રમ્પનો મેડિકલ રિપોર્ટમાં ચોંકવનાર ખુલાસા

અમેરિકાના રાષ્ટ્રપતિ ડોનાલ્ડ ટ્રમ્પ સામાન્ય રીતે પોતાના નિવેદનો, રાજકીય નિર્ણયો અને આક્રમક કાર્યશૈલીને કારણે ચર્ચામાં રહેતા હોય છે. પરંતુ આ વખતે તેઓ કોઈ રાજકીય કારણસર નહીં, પરંતુ તેમની તાજેતરમાં જાહેર થયેલી મેડિકલ રિપોર્ટને કારણે ચર્ચાના કેન્દ્રમાં આવ્યા છે. આ રિપોર્ટમાં તેમના શારીરિક અને માનસિક સ્વાસ્થ્ય અંગે કરવામાં આવેલા દાવાઓએ વિશ્વભરમાં લોકોનું ધ્યાન ખેંચ્યું છે.

ટ્રમ્પના સમર્થકો તેમની તંદુરસ્તીની પ્રશંસા કરી રહ્યા છે

વ્હાઇટ હાઉસ દ્વારા જાહેર કરવામાં આવેલા ત્રણ પાનાંના મેડિકલ મેમોમાં જણાવાયું છે કે 79 વર્ષની ઉંમર ધરાવતા ડોનાલ્ડ ટ્રમ્પનું હૃદય કાર્યક્ષમતા અને સ્વાસ્થ્યના માપદંડો મુજબ આશરે 65 વર્ષના વ્યક્તિ જેટલું યુવાન ગણાય છે. રિપોર્ટમાં ઉલ્લેખિત આ વિગતો બાદ ટ્રમ્પના સમર્થકો તેમની તંદુરસ્તીની પ્રશંસા કરી રહ્યા છે, જ્યારે તેમના વિવેચકો પણ આશ્ચર્ય વ્યક્ત કરી રહ્યા છે.

મેડિકલ રિપોર્ટ અનુસાર ટ્રમ્પનું હૃદય, ફેફસાં અને મગજ સામાન્ય અને સ્વસ્થ સ્થિતિમાં છે. વિવિધ તબીબી પરીક્ષણો અને નિષ્ણાતોની દેખરેખ બાદ વ્હાઇટ હાઉસના ડૉક્ટર શોન બાર્બાબેલાએ જણાવ્યું કે ટ્રમ્પ રાષ્ટ્રપતિ પદની જવાબદારીઓ નિભાવવા માટે સંપૂર્ણપણે ફિટ છે. રિપોર્ટમાં તેમની માનસિક સ્થિતિ પણ સંપૂર્ણપણે સામાન્ય હોવાનું જણાવાયું છે.

સૌથી પડકારજનક પદ પર કાર્યરત વ્યક્તિ

ડોનાલ્ડ ટ્રમ્પ આગામી 14 જૂને 80 વર્ષના થવા જઈ રહ્યા છે. તેમ છતાં તેમની મેડિકલ રિપોર્ટ સૂચવે છે કે તેમનું હૃદય તેમની વાસ્તવિક ઉંમર કરતાં લગભગ 14 વર્ષ વધુ યુવાન છે. આ ખુલાસા બાદ લોકોમાં પ્રશ્નો ઊભા થયા છે કે વિશ્વના સૌથી પડકારજનક પદ પર કાર્યરત વ્યક્તિ આટલી સારી તંદુરસ્તી કેવી રીતે જાળવી શકે છે.

અમેરિકાના રાષ્ટ્રપતિનું પદ વિશ્વની સૌથી તણાવપૂર્ણ જવાબદારીઓમાંનું એક માનવામાં આવે છે. વૈશ્વિક રાજકારણ, યુદ્ધના જોખમો, આર્થિક નિર્ણયો, મીડિયા દબાણ અને સતત જાહેર નજર વચ્ચે કાર્ય કરવું સહેલું નથી. આવી પરિસ્થિતિમાં લાંબા સમય સુધી સક્રિય અને કાર્યક્ષમ રહેવું કોઈપણ વ્યક્તિ માટે પડકારરૂપ બને છે.

ટ્રમ્પની જાહેર છબી હંમેશા ઊર્જાસભર નેતાની રહી છે. તેઓ લાંબી રેલીઓ સંબોધે છે, કલાકો સુધી ભાષણો આપે છે, મોડી રાત સુધી બેઠકોમાં ભાગ લે છે અને વ્યસ્ત કાર્યક્રમો વચ્ચે પણ સક્રિય રહે છે. તેમના સમર્થકો માને છે કે તેમની આ જ ઊર્જા અને આક્રમક કાર્યશૈલી તેમની સૌથી મોટી શક્તિ છે.

જોકે તેમના વિવેચકો ઘણીવાર તેમની ઉંમર, ચાલવાની ગતિ અથવા જાહેર કાર્યક્રમોમાં દેખાતી થાકની ક્ષણોને મુદ્દો બનાવતા આવ્યા છે, પરંતુ તાજેતરની મેડિકલ રિપોર્ટ તેમના સારા સ્વાસ્થ્ય તરફ સ્પષ્ટ સંકેત આપે છે. જેના કારણે ફરી એકવાર ટ્રમ્પની ફિટનેસ અને કાર્યક્ષમતાને લઈને ચર્ચાઓ તેજ બની છે.

કાર્ડિયક એજ એટલે શું?

તાજેતરના દિવસોમાં “કાર્ડિયક એજ” શબ્દ ખૂબ ચર્ચામાં રહ્યો છે. કાર્ડિયક એજનો અર્થ વ્યક્તિના હૃદય અને રક્તવાહિની તંત્રની કાર્યક્ષમતા કેટલી ઉંમરના વ્યક્તિ જેવી છે તે દર્શાવતો અંદાજ છે. ડૉક્ટરો બ્લડ પ્રેશર, કોલેસ્ટ્રોલ, હાર્ટ ફંક્શન, રક્તવાહિનીઓની સ્થિતિ અને અન્ય બાયોલોજિકલ પરિબળોના આધારે આ મૂલ્યાંકન કરે છે.

સામાન્ય રીતે ધૂમ્રપાન અને મદિરાપાનથી દૂર રહેવું, કોલેસ્ટ્રોલને નિયંત્રણમાં રાખવું અને સ્વસ્થ જીવનશૈલી અપનાવવી હૃદયની તંદુરસ્તી માટે લાભદાયી માનવામાં આવે છે. રિપોર્ટ મુજબ ટ્રમ્પ ન તો ધૂમ્રપાન કરે છે અને ન તો મદિરાપાન કરે છે, જે તેમના હૃદયની સારી સ્થિતિ પાછળનું એક મહત્વપૂર્ણ કારણ માનવામાં આવે છે.

80 લોન્ચ પેડ, નવા લશ્કરી ઠેકાણા… ચીન આ રણમાં બનાવી રહ્યું છે પરમાણુ કિલ્લો