Weather Forecast Breaking: હજુ પણ ધબધબાટી બોલાવશે વરસાદ, 20 જિલ્લામાં અતિ ભારે વરસાદની આગાહી, અનેક વિસ્તારોમાં રેડ-ઓરેન્જ એલર્ટ

ગુજરાતમાં આજે પણ વરસાદી માહોલ યથાવત રહેવાની શક્યતા છે. હવામાન વિભાગે રાજ્યના 20 જિલ્લામાં ભારેથી અતિ ભારે વરસાદની આગાહી કરી છે. ખાસ કરીને સવારે 10 વાગ્યા સુધી અનેક વિસ્તારોમાં મેઘરાજાનું રૌદ્ર સ્વરૂપ જોવા મળી શકે તેવી સંભાવના વ્યક્ત કરવામાં આવી છે. ભારે વરસાદ સાથે પ્રચંડ ગાજવીજ અને તેજ પવન પણ ફૂંકાઈ શકે છે.

અમદાવાદ સહિત ચાર જિલ્લામાં ઓરેન્જ એલર્ટ

હવામાન વિભાગે અમદાવાદ, બનાસકાંઠા, સુરેન્દ્રનગર અને ખેડા જિલ્લામાં ભારે વરસાદની શક્યતાને ધ્યાનમાં રાખીને ઓરેન્જ એલર્ટ જાહેર કર્યું છે. આ જિલ્લાઓમાં ટૂંકા સમયમાં ભારે વરસાદ પડી શકે છે, જેના કારણે નીચાણવાળા વિસ્તારોમાં પાણી ભરાવાની સ્થિતિ સર્જાઈ શકે છે.

ઉત્તર ગુજરાતમાં ચાર જિલ્લામાં રેડ એલર્ટ

ઉત્તર ગુજરાતના ચાર જિલ્લામાં અતિ ભારે વરસાદની આગાહીને પગલે રેડ એલર્ટ જાહેર કરવામાં આવ્યું છે. સ્થાનિક તંત્રને સાવચેત રહેવા સૂચના આપવામાં આવી છે, જ્યારે નાગરિકોને પણ બિનજરૂરી મુસાફરી ટાળવા અને નદી-નાળાઓથી દૂર રહેવાની અપીલ કરવામાં આવી છે.

સૌરાષ્ટ્ર અને મધ્ય ગુજરાતમાં પણ વરસાદી માહોલ

સૌરાષ્ટ્રના ચાર જિલ્લામાં ભારે વરસાદની સંભાવનાને ધ્યાનમાં રાખીને યેલો એલર્ટ જાહેર કરાયું છે. ઉપરાંત મધ્ય ગુજરાતના છ જિલ્લામાં પણ યેલો એલર્ટ આપવામાં આવ્યું છે. આ વિસ્તારોમાં ગાજવીજ સાથે મધ્યમથી ભારે વરસાદ વરસી શકે છે.

સમગ્ર રાજ્યમાં છૂટાછવાયા વરસાદની શક્યતા

હવામાન વિભાગના અનુમાન મુજબ રાજ્યના અન્ય વિસ્તારોમાં પણ છૂટાછવાયા સ્થળોએ વરસાદી ઝાપટાં પડી શકે છે. ખેડૂતો, માછીમારો અને પ્રવાસીઓને હવામાનની સ્થિતિને ધ્યાનમાં રાખીને જરૂરી સાવચેતી રાખવાની સલાહ આપવામાં આવી છે. ભારે વરસાદ દરમિયાન વીજળીના કડાકા-ભડાકા અને તેજ પવનની પણ શક્યતા હોવાથી ખુલ્લા મેદાનો અને જળાશયો નજીક જવાનું ટાળવાની અપીલ કરવામાં આવી છે.

આ પણ વાંચો- 27 જુલાઈના મહત્વના સમાચાર : 24 કલાકમાં રાજ્યના 137 તાલુકામાં વરસાદ, સૌથી વધુ વલસાડના કપરાડામાં 3.9 ઈંચ વરસાદ