આ પાછું નવુ આવ્યુ ! વરસાદથી બચાવવા ટુ વ્હીલર ચાલકો માટે યુનિક રેઇનકોટ, સુરતમાં જામી ખરીદી

ગુજરાતમાં (Gujarat) ચોમાસાએ (Monsoon) જોરદાર બેટિંગ કરવાનું શરુ કરી દીધુ છે. દક્ષિણ ગુજરાત સહિત શહેરમાં પણ ચોમાસાની સીઝન બરાબર જામી ગઈ છે. સુરત, નવસારી, ડાંગ, વલસાડ સહિતના વિસ્તારમાં છેલ્લા કેટલાય દિવસથી સારો એવો વરસાદ નોંધાયો છે. ત્યારે વરસાદના (Rain) પાણીથી બચવા માટે ઉપયોગમાં આવતી રેઇનકોટ, છત્રી જેવા સાધનોની ખરીદીની સીઝન બજારોમાં જામી છે. વિક્રેતાઓ પણ લોકોને આકર્ષવા માટે દર વર્ષે નીતનવી વસ્તુઓ બજારમાં લાવતા હોય છે. ત્યારે સુરતમાં (Surat) પણ એક નવા પ્રકારના રેઇનકોટે (Raincoat) લોકોનું આકર્ષણ વધાર્યુ છે. જાણો શું છે આ નવા પ્રકારના રેઇનકોટની ખાસિયત.

શું છે આ ડબલ રેઇનકોટની ખાસિયત ?

ચોમાસામાં વરસાદથી બચાવવા માટે રેઇનકોટ અને છત્રીનો ઉપયોગ લોકો કરતા હોય છે. જો કે આ વર્ષે સુરતમાં એક નવી જ વેરાયટીના રેઇનકોટે લોકોમાં આકર્ષણ જમાવ્યુ છે. સુરતમાં ડબલ રેઇનકોટની ખરીદી જામી છે. આ રેઇનકોટ વાહનચાલકની સાથે તેની પાછળ બેસેલા વ્યક્તિ અને વાહન ત્રણેયને વરસાદથી બચાવે છે. આ રેઇનકોટની એક યુનિક વેરાયટી છે જે લોકોને ખૂબ પસંદ પણ પડી રહી છે. કારણ કે એક જ રેઇનકોટથી ગાડી ચલાવનાર, તેની પાછળ બેસનાર અને ગાડી એમ ત્રણેયને ધોધમાર વરસાદથી બચાવી શકાય છે.

રેઇનકોટ વેચનાર વેપારીનો મત

માર્કેટમાં આ રેઇનકોટ લાવનાર વિક્રેતા જણાવે છે કે, અમે દર વર્ષે લોકો માટે કંઈ નવું લાવીએ છીએ. જેથી આ વર્ષે અમે આ યુનિક કોન્સેપ્ટ લઈને આવ્યા છે. જેમાં એક જ રેઇનકોટથી ઘણા ફાયદા મળી જાય છે. અમે પહેલા ગાડીને કવર કરે તેવી છત્રી લાવ્યા હતા, પણ તેમાંય વાહનચાલકને પલળવાની સંભાવના રહી હતી, અને તેમાં વાહન પણ ભીનું થતા બગડી જવાની કે ખરાબ થવાની શકયતા હતી. જેથી આ વખતે અમે એવો રેઇનકોટ લાવ્યા છે, જે ગાડીની સાથે તેના પર બેસનાર વ્યક્તિને પણ વરસાદથી બચાવે. આ રેઇનકોટની કિંમત મટીરીયલ પ્રમાણે 450 રૂપિયાથી શરૂ કરીને 600 રૂપિયા સુધીની છે.

બીજી તરફ આ રેઇનકોટ ખરીદનાર વ્યક્તિ કહે છે કે, ગાડી પર છત્રી લઇ જવું તો મુશ્કેલ છે, પણ આ ડબલ રેઇનકોટ બહુ યુનિક છે, ખાસ કરીને સુરતમાં જે લોકોને કાયમ ડબલ સીટ પર વધારે ફરવું પડે છે તેવા લોકો માટે આ રેઇનકોટ બેસ્ટ છે, અને તેનાથી ગાડીને પણ નુકસાન થતું નથી.