Surat: રસ્તે રઝળતી ચાર વર્ષની બાળકીનો પરિવાર સાથે મિલાપ કરાવતી પોલીસ

પાલોદ (Palod) પોલીસ ચોકી હદ વિસ્તારના નવાપરા વિસ્તારમાંથી એકલી અટૂલી ચાર વર્ષની માસુમ બાળકી (Girl ) વાહનવ્યવહારથી ઉભરાતા ભરચક વિસ્તારના કીમ (Kim) માંડવી માર્ગ પરથી રસતે રઝળતી હાલે મળી આવી હતી. ત્યારે પાલોદ પોલીસના એક જમાદાર દ્વારા આ બાળકીની મદદ કરવામાં આવી હતી. પાલોદ પોલીસ જમાદાર બાળકીને નજીકમાં આવેલી પાલોદ પોલીસ ચોકી એ લઈ આવી ચા બિસ્કીટ પ્રેમ ભાવથી ખવડાવી ગભરાયેલી બાળકીને પ્રથમ તો શાંત કરી હતી અને બાળકીની પૂછપરછ કરતા માતા પિતાના નામ ઠામ પણ જાણવા મળ્યા ન હતા. જેથી પોલીસ પણ મૂંઝવણમાં મુકાઈ ગઈ હતી.

જોકે ત્યારબાદ બાળકી જે તરફથી આવી હતી તે વિસ્તારમાં શોધખોળ કરતા જાણવા મળ્યું હતું કે આ બાળકી નવાપરા વિસ્તારમાં રહે છે. પોલીસ જમાદાર નલીનભાઈ ગોવિંદભાઈ એ વધુ તપાસ કરતા જાણવા મળ્યું હતું કે મૂળ મધ્યપ્રદેશનો શ્રમજીવી યુવાન રામ સખા સંપત કોર તેની પત્ની મલવાબેન સાથે મધ્યપ્રદેશથી મજૂરી કામ માટે અહીં આવીને કીમ ચાર રસ્તા નજીકના નવાપરા ખાતે રહે છે. ગઈકાલે મોડી સાંજે માતા મળવા બેન નજીકમાં આવેલ બજારમાં ગઈ હતી અને પિતા કામ પર ગયા હતા, ત્યારે ઘરે એકલી રહેલી તેમની ચાર વર્ષની બાળકી પુષ્પા માતાની શોધમાં ઘરેથી એકલી નીકળી પડી હતી.

પરંતુ રાત્રિનો સમય થઈ જતા અંધારું છવાઈ ગયું હતુ અને તે રસ્તો પણ ભૂલી ગઈ હતી. તે વાહન વ્યવહારથી ઉભરાતા કીમ ચાર રસ્તા કીમ માંડવી રોડ પર એકલી અટુલી ચાલતી કીમ ચાર રસ્તા તરફ આવી રહી હતી. છેલ્લા કેટલાક દિવસોથી બાળકો ઉઠાવી જવાની ઘટનાના ખોટા હોબાળા વચ્ચે ઘરેથી નીકળી પડેલી ચાર વર્ષની માસુમ બાળકીને પોલીસે માતા-પિતાની શોધખોળ કરીને પુત્રીનો મેળાપ કરાવી દેતા મધ્યપ્રદેશના યુગલની આંખો હર્ષના આંસુઓથી છલકાઈ ઉઠી હતી અને તેમણે પાલોદ પોલીસ ચોકીના જમાદાર નલીનભાઈનો ઘણો આભાર માન્યો હતો.

Input Credit Suresh Patel (Olpad )