Surat: ટ્રક ચાલકે બાઇકને અડફેટે લેતા 28 વર્ષીય યુવતીનું મોત, હૈયુ હચમચાવી દેનારી ઘટના CCTVમાં કેદ

સુરતના (Surat) બારડોલી તાલુકાના વાસકુઇ ગામે બે દિવસ પહેલા ગમખ્વાર અકસ્માત (Accident) સર્જાયો હતો. જેમાં 28 વર્ષીય યુવતીનું સારવાર દરમિયાન મોત થયુ છે. આ અકસ્માતના CCTV ફુટેજ સામે આવ્યા છે. અકસ્માત સ્થળ પાસેના પેટ્રોલ પંપના CCTVમાં આ સમગ્ર અકસ્માત કેદ થયો છે. જેના આધારે સુરત પોલીસે (Surat police) અકસ્માતનો ગુનો નોંધી વધુ તપાસ હાથ ધરી છે.

સુરતના બારડોલી તાલુકાના વાસકુઇ ગામની સીમમાં બે દિવસ પહેલા એક ગમખ્વાર અકસ્માત સર્જાયો હતો. ધામોડલા ગામે રહેતા પિતા-પુત્રી બાઇક પર જઇ રહ્યા હતા. તે દરમિયાન પિતા-પુત્રીને વાસકુઇ ગામની સીમ પાસે અકસ્માત નડ્યો હતો. એક ટ્રક ચાલકે બાઇક પર જઇ રહેલા પિતા-પુત્રીને અડફેટે લીધા હતા. જેાં પિતા-પુત્રી ગંભીર રીતે ઇજાગ્રસ્ત થયા હતા. ઇજાગ્રસ્ત પિતા-પુત્રીને તાત્કાલિક સારવાર માટે ખસેડવામાં આવ્યા હતા. જો કે સારવાર દરમિયાન 28 વર્ષીય યુવતીનું મોત થયુ છે.

અકસ્માતમાં મૃત્યુ પામનાર યુવતી PHDનાં છેલ્લાં વર્ષમાં અભ્યાસ કરતી હતી. સાથે જ ઉમરપાડા ખાતે પ્રોફેસર તરીકે નોકરી પણ કરતી હતી. પરિવાર માટે દીકરા તરીકે કામ કરતી દીકરીનું મોત થતા શોકનો માહોલ જોવા મળી રહ્યો છે. જો કે અકસ્માતના બે દિવસ બાદ સમગ્ર ઘટનાના CCTV ફુટેજ પોલીસના હાથે લાગ્યા છે. ઘટનાસ્થળ નજીક આવેલા પેટ્રોલ પમ્પમાં લાગેલા CCTVમાં અકસ્માત કેદ થયો છે. જેમાં કાર ચાલકે બાઇકને અડફેટે લીધી હોવાનું સ્પષ્ટ જોવા મળી રહ્યુ છે. આ વીડિયો સોશિયલ મીડિયામાં પણ વાયરલ થયો છે. ત્યારે પોલીસે CCTV ફુટેજના આધારે અકસ્માતનો ગુનો નોંધી વધુ કાર્યવાહી હાથ ધરી છે.