Surat : સુરતની ડાયમંડ હોસ્પિટલમાં એક જ દિવસમાં 30 ડિલિવરી, બાળકોના ખીલખીલાટથી ખીલી ઉઠ્યું હોસ્પિટલનું વાતાવરણ

Surat : સુરતમાં આવેલી ડાયમંડ હોસ્પિટલમાં (Diamond Hospital) એક જ દિવસમાં 30 ડિલિવરી થતા હોસ્પિટલનું વાતાવરણ બાળકોના ખીલખિલાટથી ગુંજી ઉઠ્યું હતું. 30 ડિલિવરીમાં એક જોડિયા બાળકો સહિત કુલ 31 બાળકોમાં 17 દીકરી અને 14 દીકરાનો જન્મ થયો છે.

આ પણ વાંચો Breaking News : ગુજરાતના ઈતિહાસમાં સૌથી મોટી ચંદન ચોરીનો પર્દાફાશ, કામરેજમાં 35 લાખનું ચંદન જપ્ત

સુરતમાં આવેલી ડાયમંડ એસોસિએશન આરોગ્ય સમિતિ સંચાલિત માતૃશ્રી રામુબા તેજાણી અને માતૃશ્રી શાંતાબા વીડીયા હોસ્પિટલ (ડાયમંડ હોસ્પિટલ)માં 19 ઓગસ્ટ 2023ના રોજ એક જ દિવસમાં એટલે કે 24 કલાકમાં ટોટલ 30 ડિલિવરી થતાં હોસ્પિટલનું વાતાવરણ બાળકોના ખીલખીલાટથી ગુંજી ઉઠ્યું હતું. 30 ડિલિવરીમાં એક જોડિયા બાળકો સહિત કુલ 31 બાળકોમાં 17 દીકરી અને 14 દીકરાનો સમાવેશ થાય છે.

30 ડિલિવરી સાથે સુરતમાં એક નવો રેકોર્ડ

ડાયમંડ હોસ્પિટલના 10 વર્ષના ઈતિહાસમાં 30 ડિલિવરી સાથે સુરતમાં એક નવો રેકોર્ડ સ્થાપિત કર્યો હોવાનું હોસ્પિટલ તરફથી જણાવવામાં આવ્યું હતું. આ રેકોર્ડને લઈ હોસ્પિટલના તબીબો અને સ્ટાફમાં ખુશીનો માહોલ જોવા મળ્યો હતો. તેમજ ટ્રસ્ટીઓ અને મેનેજમેન્ટ દ્વારા ડોક્ટર અને સ્ટાફના આ ઉમદા કાર્ય બદલ સૌને અભિનંદન સાથે આભાર વ્યક્ત કરવામાં આવ્યો હતો.

દીકરીનો જન્મ થાય તો મફત ડિલિવરી

ડાયમંડ હોસ્પિટલ દ્વારા જણાવવામાં આવ્યું હતું કે આ હોસ્પિટલમાં નોર્મલ ડિલિવરીનો ચાર્જ 1800 રૂપિયા છે અને દીકરીનો જન્મ થાય તો કોઈ ચાર્જ લેવામાં આવતો નથી, તેમજ સિઝેરિયન ડિલિવરીનો ચાર્જ માત્ર 5 હજાર રૂપિયા છે. તેમજ આ હોસ્પિટલમાં કોઈ પણ દંપતીને ત્યાં એક કરતા વધારે દીકરીનો જન્મ થાય તો પ્રત્યેક દીકરીને હોસ્પિટલ તરફથી 1 લાખ રૂપિયાના બોન્ડ આપવામાં આવે છે. અત્યાર સુધીમાં 2 હજાર દીકરીઓને કુલ 20 કરોડના બોન્ડ આપી દીધા છે. ભારત સરકારના બેટી બચાવો બેટી વધાવો યોજનાને સાર્થક કરવામાં હોસ્પિટલ દ્વારા સહભાગી બનીને સમાજને એક નવી રાહ ચીંધી છે.

સુરત સહિત ગુજરાતના તમામ જિલ્લાના સમાચાર વાંચવા માટે અહીં ક્લિક કરો