ગુજરાતમાં હાલ હવામાનમાં અચાનક પલટો જોવા મળી રહ્યો છે. એક તરફ રાજ્યના કેટલાક જિલ્લાઓમાં હળવાથી મધ્યમ વરસાદની આગાહી કરવામાં આવી છે, તો બીજી તરફ આગામી દિવસોમાં ફરી ગરમી અને હીટવેવના પ્રકોપની શક્યતા વ્યક્ત કરવામાં આવી છે. હવામાન વિભાગના જણાવ્યા અનુસાર સાયકલોનિક સર્ક્યુલેશન અને ટ્રફ લાઇનની સિસ્ટમ સક્રિય બનતા વાતાવરણમાં બદલાવ આવ્યો છે. જો કે તે વિખરાતા જ ગુજરાતમાં ફરીથી ગરમીનો પારો ઉચકાશે.

હવામાન વિભાગે આજે રાજકોટ, જૂનાગઢ, ગીર સોમનાથ, અમરેલી, બોટાદ અને ભાવનગર જિલ્લામાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી વ્યક્ત કરી છે. ઉપરાંત દાહોદ, છોટાઉદેપુર, નર્મદા, તાપી અને ડાંગ જિલ્લામાં પણ હળવા વરસાદની શક્યતા છે. કેટલાક વિસ્તારોમાં મેઘગર્જના સાથે ઝઢપી પવન ફૂંકાઈ શકે તેવી ચેતવણી પણ આપવામાં આવી છે.

રાજ્યના મોટા શહેર અમદાવાદમાં આજે વાદળછાયું વાતાવરણ રહેવાની શક્યતા છે. શહેરનું મહત્તમ તાપમાન આશરે 42 ડિગ્રી સેલ્સિયસ સુધી પહોંચી શકે છે, જેના કારણે લોકોને ગરમી અને ઉકળાટનો અનુભવ થઈ શકે છે.

ગરમીનો પારો ઉચકાશે

હવામાન વિભાગે જણાવ્યું છે કે, આગામી 9 મેથી રાજ્યમાં ફરી ગરમીનો નવો રાઉન્ડ શરૂ થશે. ખાસ કરીને કચ્છ, દ્વારકા અને રાજકોટ જિલ્લામાં હીટવેવની આગાહી સાથે યેલો અલર્ટ જાહેર કરવામાં આવ્યું છે.

આટલા જિલ્લામાં 10મીએ યલો એલર્ટ

આગામી 10 મેથી રાજ્યમાં ગરમીનો પ્રકોપ વધુ વધવાની શક્યતા છે. 10 મેના રોજ કચ્છ, બનાસકાંઠા, સુરેન્દ્રનગર, દ્વારકા, પોરબંદર, રાજકોટ, અમરેલી, ગીર સોમનાથ, વડોદરા, સુરત અને ભાવનગર જિલ્લામાં હીટવેવ સાથે યેલો અલર્ટ આપવામાં આવ્યું છે.

11 અને 12 મેના રોજ આ જિલ્લામાં હીટવેવની સંભાવના

તે ઉપરાંત 11 અને 12 મે દરમિયાન બનાસકાંઠા, સુરેન્દ્રનગર, દ્વારકા, પોરબંદર, રાજકોટ, અમરેલી, ગીર સોમનાથ, અમદાવાદ, સુરત અને વડોદરા જિલ્લામાં ઉષ્ણલહેરની અસર વધુ તીવ્ર બનવાની શક્યતા છે. હવામાન વિભાગે લોકોને બપોરના સમયે જરૂરી હોય ત્યારે જ બહાર નીકળવાની સલાહ આપી છે. જો કે, હાલમાં રાજ્યમાં એક તરફ વરસાદી માહોલ અને બીજી તરફ વધતી ગરમીને કારણે હવામાનમાં ભારે અસમાનતા જોવા મળી રહી છે.

Breaking News: ગુજરાતના અનેક વિસ્તારમાં આજે પણ રહેશે વાદળછાયુ વાતાવરણ, 8 મેથી તાપમાન વધીને 42 ડિગ્રી થશે, જુઓ Video