09 મેના મહત્વના સમાચાર : PM મોદી આવતીકાલથી 2 દિવસ ગુજરાતના પ્રવાસે, જામનગરમાં કરશે ભવ્ય રોડ શો

Narendra Modi આવતીકાલથી બે દિવસીય ગુજરાત પ્રવાસે આવી રહ્યા છે, જેને લઈને રાજ્ય સરકાર અને વહીવટી તંત્ર એક્શન મોડમાં આવી ગયું છે. ગુજરાના ડેપ્યુટી CM હર્ષ સંઘવીએ સમીક્ષા કરી છે. વડાપ્રધાનના કાર્યક્રમની તૈયારીઓની સમીક્ષા માટે નાયબ મુખ્યપ્રધાન હર્ષ સંઘવીએ જામનગરની મુલાકાત લીધી. ભાજપના હોદ્દેદારોની સાથે સાથે અધિકારીઓ સાથે સમગ્ર આયોજન અને સુરક્ષા વ્યવસ્થાનું નિરીક્ષણ કર્યું. હર્ષ સંઘવીએ જામનગરના લાલ બંગલા સર્કલ ખાતે મુલાકાત લઈ સુરક્ષા, ટ્રાફિક વ્યવસ્થા સહિતના મુદ્દે અધિકારીઓને જરૂરી સૂચનો પણ આપ્યા. હર્ષ સંઘવીની સાથે સાંસદ પૂનમ માડમ, ધારાસભ્ય દિવ્યેશ અકબરી, કલેકટર, મનપા કમિશનર તેમજ પોલીસ અધિકારીઓ પણ હાજર રહ્યા.

Maharashtraના બારામતી વિસ્તારમાં બર્ડ ફ્લૂના કેસો સામે આવતા Gandhinagar જિલ્લામાં આરોગ્ય અને પશુપાલન વિભાગ એલર્ટ મોડ પર આવી ગયા છે. સંભવિત સંક્રમણને અટકાવવા માટે જિલ્લામાં 18 જેટલી ટીમોએ વિવિધ વિસ્તારોમાં કામગીરી શરૂ કરી છે. દહેગામ, કલોલ અને માણસા તાલુકાના ગામોમાં પોલટ્રી ફાર્મનો સર્વે હાથ ધરવામાં આવી રહ્યો છે અને મરઘાંમાં કોઈ શંકાસ્પદ લક્ષણો દેખાય તો તાત્કાલિક આરોગ્ય ટીમને જાણ કરવા સૂચના આપવામાં આવી છે. તંત્ર દ્વારા પોલટ્રી ફાર્મ સંચાલકોને ખાસ સાવચેતી રાખવા તેમજ સ્વચ્છતા જાળવવા અપીલ કરવામાં આવી છે.

સુરત જિલ્લાના માંગરોળ તાલુકાના છમુછલ ગામમાં આવેલી Orilon Pvt. Ltd. કંપનીમાં ભીષણ આગ લાગતા ભારે અફરાતફરીનો માહોલ સર્જાયો હતો. યાર્ન બનાવતી કંપનીમાં અચાનક આગ ભભૂકી ઊઠતા સ્થાનિક ફાયર ફાઇટરની ટીમ તાત્કાલિક ઘટના સ્થળે પહોંચી હતી અને આગ પર કાબૂ મેળવવાના પ્રયાસો શરૂ કર્યા હતા. આગની ગંભીરતા જોતા વધુ ફાયર ટીમોને પણ રવાના કરવામાં આવી છે. ઘટનાની જાણ થતાં સ્થાનિક પોલીસ પણ સ્થળ પર પહોંચી તપાસ હાથ ધરી છે. હાલ આગ લાગવાનું ચોક્કસ કારણ સામે આવ્યું નથી. મહત્વની વાત એ છે કે અગાઉ પણ આ જ કંપનીમાં ભીષણ આગ લાગી ચૂકી હોવાથી સુરક્ષા વ્યવસ્થાને લઈને પ્રશ્નો ઊભા થયા છે.

રાજ્યમાં ફરી એકવાર ગરમીનો પ્રકોપ વધવાની શક્યતા વ્યક્ત કરવામાં આવી છે. હવામાન વિભાગે આગામી દિવસોમાં તાપમાનમાં બેથી ત્રણ ડિગ્રી સુધીનો વધારો થવાની આગાહી કરી છે. ખાસ કરીને 15 મે સુધી રાજ્યના વિવિધ જિલ્લાઓમાં યલો એલર્ટ જાહેર કરવામાં આવ્યું છે. સૌરાષ્ટ્ર વિસ્તાર સાથે અમદાવાદ અને ગાંધીનગરમાં હીટવેવ જેવી પરિસ્થિતિ સર્જાઈ શકે તેવી શક્યતા દર્શાવવામાં આવી છે. બપોરના સમયે ગરમીનું પ્રમાણ વધુ રહેવાની આગાહી વચ્ચે લોકોને અનાવશ્યક બહાર ન નીકળવા, પૂરતું પાણી પીવા અને તાપથી બચવા તકેદારી રાખવા સૂચના આપવામાં આવી છે.