20 સપ્ટેમ્બરના મહત્વના સમાચાર : રાજકોટમાં બેફામ રફ્તારનો કહેર, પારેવડી ચોકમાં આઇસર ટેમ્પોચાલકે અનેક વાહનોને લીધા અડફેટે, ટેમ્પોનું ટાયર ફરી વળતા બાઇકચાલકનું કમકમાટીભર્યુ મોત

અમદાવાદઃ શહેરના અનેક વિસ્તારોમાં ધોધમાર વરસાદ વરસ્યો છે. કેટલાક વિસ્તારોમાં એક કલાકમાં એક ઈંચથી વધુ વરસાદ નોંધાયો છે. ટાગોર હોલ અને નવરંગપુરામાં એક ઈંચથી વધુ વરસાદ વરસ્યો છે, જ્યારે સરખેજ, અસારવા અને વાસણામાં પણ એક ઈંચ જેટલો વરસાદ નોંધાયો છે. ઓઢવ, નિકોલ, વિરાટનગર, ઈસ્કોન અને સેટેલાઈટ સહિતના વિસ્તારોમાં વરસાદ વરસ્યો છે. સામાન્ય વરસાદમાં જ વસ્ત્રાપુરમાં રસ્તાઓ પર પાણી ભરાતા વાહનચાલકોને ભારે હાલાકીનો સામનો કરવો પડ્યો હતો.

અમદાવાદના પૂર્વ વિસ્તારમાં ઘૂંટણસમા પાણી ભરાયા છે. ઓઢવથી સોનીની ચાલી સુધીનો રસ્તો પાણીમાં ગરકાવ થયો છે. સામાન્ય વરસાદમાં જ રસ્તાઓ પર પાણી ભરાતા વાહનચાલકો પરેશાન થયા છે. વરસાદી પાણી ભરાવાના કારણે વાહનચાલકોને ભારે મુશ્કેલીનો સામનો કરવો પડી રહ્યો છે.

જુનાગઢઃ આત્મેશ્વર પાસે પાણીના ધસમસતા પ્રવાહમાં 35 જેટલા યાત્રાળુઓ અટવાઈ જતાં તંત્ર દ્વારા દિલધડક રેસ્ક્યૂ ઓપરેશન હાથ ધરવામાં આવ્યું હતું. ઉપરવાસમાં ધોધમાર વરસાદના કારણે આત્મેશ્વર પાસેનો વોકળો છલકાઈ ગયો હતો. વોકળામાં પાણીનો પ્રવાહ વધતાં સામા કાંઠે ગયેલા 35 જેટલા યાત્રાળુઓ ત્યાં જ અટવાઈ ગયા હતા. યાત્રાળુઓએ તંત્ર પાસે મદદની માગ કરતા વન વિભાગ અને ફાયરની ટીમ ઘટનાસ્થળે પહોંચી હતી. રેસ્ક્યૂ ટીમોએ ભારે જહેમત બાદ તમામ યાત્રાળુઓને સુરક્ષિત રીતે બહાર કાઢ્યા હતા. તમામ યાત્રાળુઓ સલામત બહાર આવી જતા તેમણે રાહતનો શ્વાસ લીધો હતો. ઘટનામાં સદનસીબે કોઈ જાનહાનિ થઈ નથી.

સુરતઃ મિલેનિયમ માર્કેટમાં વેપારીની કારમાંથી ₹2.50 લાખની રોકડ ભરેલી બેગની ચોરીનો ભેદ પોલીસે ઉકેલી આરોપીને ઝડપી પાડ્યો છે. પોલીસ તપાસમાં સામે આવ્યું છે કે ઓનલાઈન ગેમિંગમાં થયેલું દેવું ચૂકવવા આરોપીએ ચોરી કરી હતી. આરોપીએ વેપારીની કારમાંથી રોકડ ભરેલી બેગ ચોરી કરી ફરાર થઈ ગયો હતો. ઘટનાની તપાસ દરમિયાન પોલીસે 100થી વધુ CCTV કેમેરાના ફૂટેજની મદદથી આરોપીને ટ્રેક કર્યો હતો. પોલીસને આરોપી અન્ય ચોરી કરવા માટે ફરી માર્કેટમાં આવવાનો હોવાની માહિતી મળતાં તેને ઝડપી પાડવામાં આવ્યો હતો. પોલીસે આરોપી પાસેથી ચોરી કરેલી સમગ્ર ₹2.50 લાખની રકમ રિકવર કરી છે. પોલીસે આરોપીની વધુ પૂછપરછ હાથ ધરી સમગ્ર મામલે તપાસ આગળ વધારી છે.

રાજકોટઃ શહેરમાં BRTS રૂટ પર જન્મદિવસની ઉજવણીનો વીડિયો સોશિયલ મીડિયામાં વાયરલ થતાં વિવાદ સર્જાયો છે. નવા 150 ફૂટ રિંગ રોડના BRTS રૂટ પર એક યુવતીએ જાહેરમાં કેક કાપીને અને ફટાકડા ફોડીને જન્મદિવસની ઉજવણી કરી હતી. જાહેર માર્ગ પર આ પ્રકારે ઉજવણી કરવામાં આવતા નિયમોના ભંગને લઈને સવાલો ઉઠ્યા છે. યુવતીએ સસ્તી પ્રસિદ્ધિ મેળવવા માટે નિયમોને નેવે મૂકીને જન્મદિવસની ઉજવણી કરી હોવાના આક્ષેપો થઈ રહ્યા છે. ઉજવણીનો વીડિયો સોશિયલ મીડિયા પર વાયરલ થયા બાદ પોલીસનું ધ્યાન દોરાયું છે. યુનિવર્સિટી પોલીસે વાયરલ વીડિયોના આધારે તપાસ શરૂ કરી છે. પોલીસ દ્વારા વીડિયો ક્યારે અને કયા સ્થળે બનાવવામાં આવ્યો હતો તેમજ ઉજવણીમાં કોણ-કોણ સામેલ હતું તે અંગે તપાસ હાથ ધરાઈ છે.

રાજકોટના ધોરાજીમાં વાહનચાલકોની હાલાકી યથાવત છે. સામાન્ય વરસાદમાં જ શહેરના અનેક રસ્તાઓ બિસ્માર બની ગયા છે. દર વર્ષે એકની એક સમસ્યા સર્જાતાં સ્થાનિકોમાં રોષ જોવા મળી રહ્યો છે. ધોરાજીમાં ક્યાંક રસ્તા પર ખાડાનું સામ્રાજ્ય જોવા મળે છે, તો ક્યાંક ખાડામાં વરસાદી પાણી ભરાયેલું નજરે પડે છે. કેટલાક વિસ્તારોમાં રસ્તાની અત્યંત બિસ્માર હાલત વચ્ચે કાદવ-કીચડના ખડકલા પણ જોવા મળી રહ્યા છે. સ્થાનિકોના જણાવ્યા મુજબ, દર ચોમાસામાં ધોરાજીમાં આવી સ્થિતિ સર્જાય છે અને સારો રસ્તો શોધવો મુશ્કેલ બની જાય છે. થોડા સમય પહેલા જ ધોરાજી પાલિકા દ્વારા રસ્તા પરના ખાડા પૂરવાની કામગીરી કરવામાં આવી હતી. જોકે, સામાન્ય વરસાદ બાદ જ આ કામગીરીની પોલ ખુલી ગઈ હોવાના આક્ષેપો થઈ રહ્યા છે. માત્ર કપચી અને માટી નાખીને ખાડા પૂરવામાં આવ્યા હોવાનો સ્થાનિકોનો દાવો છે. વરસાદ બાદ રસ્તાઓ ફરી ધોવાઈ જતાં સોની બજાર, વોકળા કાંઠા, પોસ્ટ ઓફિસ રોડ, બાવલા ચોક, હવેલી શેરી, સ્ટેશન રોડ અને મુખ્ય બજાર વિસ્તારમાં ઠેર-ઠેર ખાડા જોવા મળી રહ્યા છે.

અમરેલીઃ બગસરા બાયપાસ રોડ પર તેલ ભરેલા ટેન્કરને અકસ્માત નડ્યો હતો. અકસ્માત બાદ તેલ ભરેલું ટેન્કર પલટી ખાઈ જતાં રસ્તા પર તેલ ઢોળાયું હતું. ટેન્કર પલટી ખાધાની જાણ થતાં આસપાસના લોકો મોટી સંખ્યામાં ઘટનાસ્થળે એકત્ર થયા હતા. ટેન્કરમાંથી ઢોળાયેલા તેલને લેવા માટે લોકો ડબલા અને પ્લાસ્ટિકના કેન લઈને પહોંચ્યા હતા. કેટલાક લોકો ટેન્કરમાંથી તેલ ભરતા હોવાના દૃશ્યો પણ સામે આવ્યા છે. ઘટનાને પગલે રસ્તા પર લોકોના ટોળા ઉમટી પડ્યા હતા. ટેન્કરમાંથી તેલ ભરતા લોકોનો વીડિયો સોશિયલ મીડિયા પર વાયરલ થયો છે. અકસ્માત કેવી રીતે સર્જાયો અને ટેન્કરમાંથી કેટલું તેલ ઢોળાયું તે અંગેની વધુ વિગતો સામે આવવાની બાકી છે.

અમદાવાદઃ ઓશિયા મોલના સંચાલકો સામે છેતરપિંડીના આક્ષેપોને લઈને ભોગ બનનાર વેપારીઓની બેઠક મળી હતી. સાઉથ બોપલમાં યોજાયેલી બેઠકમાં અમદાવાદ ઉપરાંત સુરત, વડોદરા અને મુંબઈના 50થી વધુ વેપારીઓ એકત્ર થયા હતા. 7 જુલાઈએ CID ક્રાઈમમાં ફરિયાદ નોંધાયા બાદ અત્યાર સુધી 17 વેપારીઓના નિવેદન નોંધવામાં આવ્યા છે. CIDની તપાસમાં 17 વેપારીઓ સાથે રૂ.17 કરોડથી વધુની છેતરપિંડી થયાનું સામે આવ્યું છે. જોકે, વેપારીઓનો દાવો છે કે કુલ રૂ.365 કરોડની છેતરપિંડીનો આંકડો હોઈ શકે છે. વેપારીઓએ ઓશિયા મોલના સંચાલકો પર NSEમાં શેરના ભાવમાં અપડાઉન કરીને કમાણી કરવાનો અને ઇરાદાપૂર્વક છેતરપિંડી કરવાનો આક્ષેપ કર્યો છે. હવે વેપારીઓ ફોરેન્સિક ઓડિટ માટે એજન્સીની શોધ કરી તપાસ કરાવશે. સાથે જ NCLTનો ઉપયોગ કરીને કાયદાકીય લડત વધુ મજબૂત બનાવવાની રણનીતિ ઘડવામાં આવી છે.

સુરતઃ PCBને ટોપ મોસ્ટ વોન્ટેડ લિસ્ટમાં સામેલ આરોપીને ઝડપી પાડવામાં મોટી સફળતા મળી છે. વર્ષ 2001માં ઉધના અને લીંબાયત વિસ્તારમાં લૂંટ તથા હત્યાના ગંભીર ગુનામાં ફરાર મિથિલેશ ભૂમિહારને પોલીસે ઝારખંડમાંથી ઝડપી પાડ્યો છે. આરોપી છેલ્લા 25 વર્ષથી પોલીસને ચકમો આપી ફરાર હતો અને તેની માહિતી આપનાર માટે 20 હજાર રૂપિયાનું ઈનામ જાહેર કરવામાં આવ્યું હતું. આરોપીને ઝડપી પાડવા PCBની ટીમ ઝારખંડના અતિસંવેદનશીલ પલામુ જિલ્લામાં પહોંચી હતી. પોલીસે ટપાલીનો વેશ ધારણ કરી પાર્સલ આપવાના બહાને આરોપીના ઘર સુધી પહોંચી તેને ઝડપી પાડ્યો હતો. જોખમી વિસ્તારમાં ઓપરેશન હાથ ધરી આરોપીને સલામત રીતે ઝડપી પાડ્યા બાદ તેને ઉધના પોલીસને સોંપવાની તજવીજ હાથ ધરવામાં આવી છે.

અમદાવાદ જિલ્લામાં સિઝનનો 100 ટકા વરસાદ પૂર્ણ થયો છે. જિલ્લામાં અત્યાર સુધી સરેરાશ 108 ટકાથી વધુ વરસાદ નોંધાયો છે. ધોલેરા, સાણંદ અને બાવળા સિવાયના તમામ તાલુકામાં 100 ટકાથી વધુ વરસાદ નોંધાયો છે. જિલ્લામાં સૌથી વધુ વરસાદ વિરમગામમાં 139.57 ટકા નોંધાયો છે, જ્યારે અમદાવાદ શહેરમાં પણ સિઝનનો 105.45 ટકા વરસાદ નોંધાયો છે.

ખેડાઃ કપડવંજના કોસમ ગામ નજીક વાત્રક નદી પર બનાવવામાં આવેલો ચેકડેમ જર્જરિત થતાં પાણીનો વેડફાટ થઈ રહ્યો છે. સિંચાઈ વિભાગ દ્વારા આશરે પાંચ વર્ષ અગાઉ આ ચેકડેમનું નિર્માણ કરવામાં આવ્યું હતું. જોકે, હાલ ચેકડેમનું ધોવાણ થતાં તે તૂટી જવાની સ્થિતિમાં પહોંચ્યો છે. ચેકડેમની હાલત બિસ્માર બનતા પાણીનો સંગ્રહ થવાને બદલે વહી જતાં જળસંચયની ક્ષમતામાં ઘટાડો થયો છે. સ્થાનિકોના જણાવ્યા મુજબ, ચેકડેમનો ઉપયોગ સિંચાઈ અને પાણીના સંગ્રહ માટે થતો હતો, પરંતુ હાલ તેની સ્થિતિને કારણે તેનો પૂરતો લાભ મળી રહ્યો નથી. નિર્માણના ટૂંકા ગાળામાં જ ચેકડેમ જર્જરિત થતાં કામગીરીની ગુણવત્તા સામે પણ સવાલો ઉઠી રહ્યા છે. ચેકડેમની તાત્કાલિક મરામત કરવાની માંગ ઉઠી છે.

ખેતરમાં લહેરાતો ડાંગરનો પાક અને અચાનક આખો પાક પીળો પડી જતાં મહીસાગરના ખેડૂતોની ચિંતા વધી છે. લુણાવાડા પંથકમાં ડાંગરના પાક પર અજાણી ચુસિયા પ્રકારની જીવાતનો ભારે ઉપદ્રવ જોવા મળી રહ્યો છે. છાપરી, વક્તાપુરા, ચપટીયા થઈને નમનાર સુધીના વિસ્તારમાં લીલોછમ પાક પીળો પડી સુકાઈ રહ્યો છે. ખેડૂતોના જણાવ્યા મુજબ, સમયસર વરસાદ ન થતાં વાવણી-ઓરવણી મોડી થઈ હતી. ત્યારબાદ વરસાદની ખેંચ અને હવે જીવાતના ઉપદ્રવથી પાક નિષ્ફળ જવાની ભીતિ છે. મોંઘી દવાઓના છંટકાવ છતાં ખાસ પરિણામ ન મળ્યું હોવાનો ખેડૂતોનો દાવો છે. ખેડૂતો તાત્કાલિક સર્વે અને આર્થિક સહાયની માંગ કરી રહ્યા છે. જોકે અધિકારીના જણાવ્યા મુજબ ખેડૂતોને જંતુનાશક દવાના છંટકાવ અંગે ટેકનિકલ માર્ગદર્શન આપવામાં આવી રહ્યું છે.

સુરતઃ ભેસાણ-હજીરા હાઈવે રોડ પર ટેન્કરમાંથી ગેરકાયદે LPG ગેસ રીફિલિંગના કૌભાંડનો પર્દાફાશ થયો છે. રિલાયન્સ ગોડાઉનના પાર્કિંગમાં ગેસની ચોરી કરી રીફિલિંગ કરવામાં આવતું હોવાનો ખુલાસો થયો છે. પોલીસે ગેસ રીફિલિંગ કરતા 9 આરોપીઓને ઝડપી પાડ્યા છે. તપાસમાં મુખ્ય આરોપી પવનસિંહ ગુજ્જર HPCL હજીરામાં નોકરી કરતો હોવાનું સામે આવ્યું છે. જ્યારે આરોપી સુરેશ બોરીવાલા ગેસના બાટલાની ડિલિવરી કરતો હોવાનું પોલીસ તપાસમાં જાણવા મળ્યું છે. પોલીસે કુલ રૂ.56.69 લાખથી વધુનો મુદ્દામાલ જપ્ત કર્યો છે. જેમાં ટેન્કર, કાર, ગેસની બોટલો અને ખાલી ગેસ બાટલા સહિતનો સામાન સામેલ છે. આરોપીઓ સામે BNS અને LPG રેગ્યુલેશન એક્ટ સહિતની કલમો હેઠળ ગુનો નોંધી વધુ તપાસ હાથ ધરાઈ છે.

અમરેલીઃ જિલ્લામાં વરસાદી માહોલ જામ્યો છે. લાઠીના ગ્રામ્ય પંથકમાં ધોધમાર વરસાદ વરસ્યો છે. દુઘાળા અને અકાળા ગામની સીમ વિસ્તારમાં મેઘરાજાએ જોરદાર હાજરી નોંધાવી છે. વરસાદ વરસતા ખેતીના પાકને ફાયદો થવાની આશા ખેડૂતોમાં જાગી છે. લાઠી, સાવરકુંડલા અને ધારી બાદ હવે વડિયા પંથકમાં પણ વરસાદ શરૂ થયો છે. વડિયા શહેરમાં ઘનઘોર વાદળો વચ્ચે ધીમીધારે વરસાદ વરસી રહ્યો છે. આ ઉપરાંત વડિયા પંથકના ગ્રામ્ય વિસ્તારોમાં પણ મેઘરાજાએ એન્ટ્રી કરી છે. વરસાદના કારણે સમગ્ર પંથકમાં ઠંડક પ્રસરી છે અને ખેડૂતોમાં ખુશીનો માહોલ જોવા મળી રહ્યો છે.

ભાવનગરઃ મહુવામાં મેઘરાજાએ ધમાકેદાર એન્ટ્રી કરી છે. મહુવાના ટાઉન વિસ્તારમાં એક કલાકમાં બે ઈંચ જેટલો વરસાદ ખાબક્યો છે. ગાજવીજ સાથે વરસાદનો રાઉન્ડ શરૂ થતાં શહેરના અનેક વિસ્તારોમાં પાણી ભરાઈ ગયા છે. ગાર્ડન રોડ, શાકમાર્કેટ, મુખ્ય બજાર, જનતા પ્લોટ, ખારઝાંપા અને કુંભારવાડા સહિતના માર્ગો પર ઘૂંટણસમા પાણી ભરાતા વાહનચાલકો અને સ્થાનિકોને હાલાકીનો સામનો કરવો પડ્યો હતો. સિટી વિસ્તારમાં સાર્વત્રિક વરસાદ વરસતા ચારે તરફ પાણી જ પાણી જોવા મળ્યું હતું. અચાનક ભારે વરસાદના કારણે નીચાણવાળા વિસ્તારોમાં પણ પાણી ભરાયા હતા. બીજી તરફ, વરસાદના આગમનથી ખેતરોમાં ઉભા પાકને જીવનદાન મળવાની આશા ખેડૂતોમાં જાગી છે.

સુરતઃ શહેરમાં બપોર બાદ છૂટોછવાયો વરસાદ વરસ્યો છે. કતારગામ, પીપલોદ, અઠવા ગેટ અને ઉધના સહિતના વિસ્તારોમાં વરસાદી ઝાપટું પડ્યું હતું. જોકે, કેટલાક વિસ્તારોમાં ધોધમાર વરસાદ વરસતા જળબંબાકારની સ્થિતિ સર્જાઈ હતી. સુરતના નીચાણવાળા વિસ્તારોમાં ઘૂંટણસમા પાણી ભરાઈ જતા લોકોને હાલાકીનો સામનો કરવો પડ્યો હતો. છેલ્લા કેટલાક દિવસથી શહેરમાં છૂટોછવાયો વરસાદ વરસી રહ્યો છે. સામાન્ય વરસાદમાં જ રસ્તાઓ પર પાણી ભરાઈ જતાં તંત્રની કામગીરી સામે પણ સવાલો ઊભા થયા છે. ભારે વરસાદી ઝાપટા બાદ અનેક વિસ્તારોમાં પાણી ભરાવાના દૃશ્યો સામે આવ્યા છે.

નર્મદાઃ ડેડીયાપાડામાં કુનબાર ઈકો ટુરિઝમ નજીક ખેતરના કૂવામાં દીપડો ખાબક્યો હતો. ઈકો ટુરિઝમ પાસે આવેલા ખેતરના કૂવામાં દીપડો પડ્યો હોવાની જાણ થતાં ખેડૂતે તાત્કાલિક વનવિભાગને જાણ કરી હતી. માહિતી મળતા વનવિભાગની ટીમ ઘટનાસ્થળે પહોંચી હતી અને દીપડાને બહાર કાઢવા રેસ્ક્યૂ ઓપરેશન હાથ ધર્યું હતું. વનકર્મીઓએ ભારે જહેમત બાદ દીપડાને સલામત રીતે કૂવામાંથી બહાર કાઢ્યો હતો. રેસ્ક્યૂ બાદ દીપડાની તબીબી તપાસ કરવામાં આવી હતી. દીપડાની સ્થિતિની તપાસ કર્યા બાદ વનવિભાગ દ્વારા નિયમ મુજબ આગળની કાર્યવાહી હાથ ધરવામાં આવી છે. સમગ્ર રેસ્ક્યૂ કામગીરી દરમિયાન વનવિભાગની ટીમે તકેદારી રાખી દીપડાને સુરક્ષિત રીતે બહાર કાઢ્યો હતો.

ભરૂચઃ અંકલેશ્વરના સારંગપુર ગામે બે યુવકોના શંકાસ્પદ મોતના મામલે ચોંકાવનારો ખુલાસો થયો છે. પ્રાથમિક માહિતી મુજબ, ત્રણ યુવકોએ પેઈન કિલર લીધી હતી. પેઈન કિલરનો ઓવરડોઝ લેવાતા ત્રણેયની તબિયત લથડી હતી. સારવાર દરમિયાન બે યુવકોના મોત થયા છે, જ્યારે અન્ય એક યુવકની હાલ સારવાર ચાલી રહી છે. થાક ઉતારવાના ઇરાદે યુવકોએ પેઈન કિલર લીધી હોવાની આશંકા વ્યક્ત કરવામાં આવી રહી છે. પેઈન કિલરની સાઈડ ઈફેક્ટના કારણે કાર્ડિયાક અરેસ્ટ આવવાથી બંને યુવકોના મોત થયાનું પ્રાથમિક અનુમાન છે. જોકે, મોતનું ચોક્કસ કારણ પોસ્ટમોર્ટમ રિપોર્ટ આવ્યા બાદ જ સ્પષ્ટ થશે. સમગ્ર મામલે પોલીસ દ્વારા વધુ તપાસ હાથ ધરવામાં આવી છે.

રાજકોટઃ જસદણ શહેર અને ગ્રામ્ય વિસ્તારોમાં ધોધમાર વરસાદ વરસ્યો છે. જસદણમાં માત્ર એક કલાકમાં એક ઈંચ જેટલો વરસાદ ખાબકતાં શહેરના અનેક રસ્તાઓ પર પાણી ભરાઈ ગયા હતા. ભારે વરસાદના કારણે ચિતલીયા રોડ અને નવા બસ સ્ટેન્ડ વિસ્તારના માર્ગો પર પાણી ફરી વળ્યા હતા, જેના કારણે વાહનચાલકોને મુશ્કેલીનો સામનો કરવો પડ્યો હતો. જસદણ ઉપરાંત વીરનગર, કમળાપુર, ભાડલા સહિતના ગ્રામ્ય વિસ્તારોમાં પણ વરસાદ વરસ્યો છે. અચાનક ધોધમાર વરસાદના કારણે નીચાણવાળા વિસ્તારોમાં પાણી ભરાયા હતા. વરસાદથી સમગ્ર પંથકમાં ઠંડક પ્રસરી છે. લાંબા વિરામ બાદ સારો વરસાદ વરસતાં ખેડૂતોમાં પણ ખુશીનો માહોલ જોવા મળી રહ્યો છે.

વડોદરાઃ નવા ગંભીરા બ્રિજનું મુખ્યમંત્રી ભૂપેન્દ્ર પટેલના હસ્તે લોકાર્પણ કરવામાં આવ્યું છે. મહી નદી પર ₹212 કરોડના ખર્ચે તૈયાર થયેલા આ બ્રિજથી વડોદરા-આણંદ વચ્ચેની કનેક્ટિવિટી વધુ સરળ બનશે. પાદરા-આણંદને જોડતો ગંભીરા બ્રિજ માત્ર એક વર્ષમાં તૈયાર થયો છે. દરિયાકાંઠા નજીક નદી પર માત્ર 12 મહિનામાં તૈયાર થયેલો આ પ્રથમ બ્રિજ હોવાનું જણાવવામાં આવ્યું છે. બ્રિજ શરૂ થતાં વાહનચાલકોને આશરે 70 કિલોમીટરનો વધારાનો ફેરો ઘટશે, જેના કારણે સમય અને ઈંધણની પણ બચત થશે. આ પ્રસંગે મુખ્યમંત્રી ભૂપેન્દ્ર પટેલના હસ્તે વડોદરાને ₹1,273 કરોડના વિવિધ વિકાસકાર્યોની ભેટ પણ આપવામાં આવી છે. નવા બ્રિજથી આસપાસના વિસ્તારોના લોકો તેમજ વાહનચાલકોને સીધો લાભ મળશે.

સુરતઃ ઓલપાડના સરોલી ગામે અમીષ પટેલના મોતના મામલે પોલીસે 7 આરોપીઓ સામે સાપરાધ મનુષ્યવધનો ગુનો દાખલ કર્યો છે. પોલીસ તપાસમાં સામે આવ્યું છે કે દીહેણ ગામ પાસે ગણેશ આગમન દરમિયાન અમીષ પટેલની કારને અકસ્માત નડ્યો હતો. અકસ્માત બાદ કેટલાક લોકોએ કાર રોકીને અમીષ પટેલ પર હુમલો કર્યો હોવાની માહિતી સામે આવી છે. હુમલાથી બચવા અમીષ પટેલે કાર પૂરપાટ ઝડપે દોડાવી હતી, જે અંગેના CCTV ફૂટેજ પણ સામે આવ્યા છે. મૃતક કારમાં ફરાર થતાં હુમલાખોરોએ અન્ય બે કારથી તેનો પીછો કર્યો હતો. આ દરમિયાન સ્ટિયરિંગ પરથી કાબૂ ગુમાવતા કાર ઝાડ સાથે અથડાઈ હતી. ગંભીર ઈજાઓ થતાં અમીષ પટેલનું મોત થયું હતું. હવે આરોપીઓ સામે વધુ કલમો ઉમેરી પોલીસે કાર્યવાહી હાથ ધરી છે. અમીષ પટેલના મોત બાદ કોળી સમાજે હત્યાના આક્ષેપ કર્યા હતા.

વલસાડઃ ઉમરગામમાં જાહેરમાં એક યુવકે આપઘાતનો પ્રયાસ કરતા ચકચાર મચી છે. ગોકુલધામ નજીક સોનુ પ્રસાદ નામના યુવકે પોતાના હાથથી ગળા પર તીક્ષ્ણ હથિયાર ફેરવી જીવન ટૂંકાવવાનો પ્રયાસ કર્યો હતો. યુવકને બચાવવા ગયેલા લોકોએ તેને રોકવાનો પ્રયાસ કરતાં તેણે તેમના પર પણ હુમલો કરવાનો પ્રયાસ કર્યો હતો. જોકે, ગળામાં ગંભીર ઈજા થતાં લોહીલુહાણ હાલતમાં યુવક ઢળી પડ્યો હતો. ત્યારબાદ સ્થાનિકોએ તેને એમ્બ્યુલન્સ મારફતે હોસ્પિટલ ખસેડ્યો હતો. ગળામાં ગંભીર ઈજા થતાં યુવકને ટાંકા લેવામાં આવ્યા છે અને હાલ તેની સ્થિતિ સુધારા પર હોવાનું જાણવા મળ્યું છે. ગળામાં ટાંકા આવ્યા હોવાથી યુવકને બોલવામાં તકલીફ થઈ રહી છે, જેના કારણે આપઘાતના પ્રયાસનું ચોક્કસ કારણ હજુ સામે આવ્યું નથી. પ્રેમ પ્રકરણને કારણે યુવકે આ પગલું ભર્યું હોવાની ચર્ચા છે, જોકે પોલીસ તપાસ બાદ જ સાચું કારણ સ્પષ્ટ થશે.

અમરેલીઃ જિલ્લામાં મોટાભાગના વિસ્તારોમાં ઘોઘમાર વરસાદ વરસી રહ્યો છે. બાબરા પંથકમાં પણ ધોધમાર વરસાદની શરૂઆત થતાં સુખપુર, ખંભાળા સહિતના ગામોમાં મેઘરાજાએ જોરદાર બેટિંગ કરી છે. અચાનક વરસાદના આગમનથી સમગ્ર પંથકમાં ઠંડક પ્રસરી છે. સારા વરસાદની રાહ જોઈ રહેલા ખેડૂતોમાં ખુશીનો માહોલ જોવા મળી રહ્યો છે. વરસાદના કારણે કપાસ, મગફળી, સોયાબીન સહિતના પાકને ફાયદો થવાની આશા ખેડૂતોમાં જાગી છે. વરસાદથી ખેતરોમાં જરૂરી ભેજ મળતાં પાકને રાહત મળશે. બાબરા સહિત આસપાસના ગ્રામ્ય વિસ્તારોમાં વરસાદી માહોલ જામતા ખેડૂતોમાં ખેતીના પાકને લઈને આશા વધી છે. મેઘરાજાની મહેરથી ગ્રામ્ય વિસ્તારોમાં ચોમાસું ફરી સક્રિય થયું છે.

બોટાદઃ ગઢડા તાલુકા પંથકમાં ત્રણ દિવસના વિરામ બાદ ફરી વરસાદનું આગમન થયું છે. જિલ્લાના કેટલાક વિસ્તારોમાં આજે મેઘરાજાએ હાજરી નોંધાવી છે. ઢસા, પાટણા, રણીયાળા, માલપરા અને ગુંદાળા સહિતના ગામોમાં વરસાદ વરસ્યો છે. ભડલીના ઝાંપા, સામા કાંઠા વિસ્તાર તેમજ ગોપીનાથજી મંદિર વિસ્તારમાં પણ વરસાદ નોંધાયો છે. વરસાદ પહેલાં આકાશમાં કાળા ડિબાંગ વાદળો ઘેરાતા અંધકાર જેવો માહોલ સર્જાયો હતો. ત્યારબાદ વરસાદ વરસતા વાતાવરણમાં ઠંડક પ્રસરી છે. ત્રણ દિવસના વિરામ બાદ વરસાદનું આગમન થતાં સ્થાનિકોમાં પણ ખુશીનો માહોલ જોવા મળી રહ્યો છે. ગ્રામ્ય વિસ્તારોમાં વરસાદથી ખેતીના પાકને પણ ફાયદો થવાની આશા ખેડૂતોમાં જાગી છે.

ગીર સોમનાથઃ વેરાવળના ગ્રામ્ય વિસ્તારોમાં ગાજવીજ સાથે વરસાદની શરૂઆત થઈ છે. વેરાવળ, કોડીદરા, ભેટાળી, ખંઢેરી સહિતના ગામોમાં મેઘરાજાએ ધમાકેદાર એન્ટ્રી કરી છે. ગ્રામ્ય વિસ્તારોમાં ધોધમાર વરસાદ વરસતા રસ્તાઓ પર પાણી વહેતા જોવા મળ્યા હતા. વરસાદની સાથે ગાજવીજ અને પવનના કારણે વાતાવરણમાં પલટો આવ્યો છે. લાંબા વિરામ બાદ વરસાદ વરસતા ખેડૂતોમાં પણ રાહતનો માહોલ જોવા મળી રહ્યો છે. વેરાવળ પંથકમાં વરસાદી માહોલ છવાતા ચોમાસું ફરી સક્રિય થયું છે. ગ્રામ્ય વિસ્તારોમાં શરૂ થયેલા ધોધમાર વરસાદથી ખેતીના પાકને પણ ફાયદો થવાની આશા ખેડૂતોમાં જોવા મળી રહી છે.

ગીર સોમનાથઃ સુત્રાપાડા અને આસપાસના ગ્રામ્ય વિસ્તારોમાં બે દિવસના વિરામ બાદ ફરી વરસાદનું આગમન થયું છે. વાવડી, પ્રશ્નાવડા, લોઢવા સહિતના ગામોમાં મેઘરાજાએ હાજરી નોંધાવી છે. વરસાદ વરસતા સમગ્ર પંથકમાં ઠંડક પ્રસરી છે અને ખેડૂતોમાં ખુશીનો માહોલ જોવા મળી રહ્યો છે. બે દિવસના વિરામ બાદ વરસાદ વરસતા પાકને મોટી રાહત મળી છે. ખાસ કરીને સોયાબીન અને મગફળી સહિતના પાકને વરસાદથી જીવનદાન મળ્યું છે. વરસાદના કારણે પાકને જરૂરી ભેજ મળતાં ખેડૂતોમાં રાહતની લાગણી જોવા મળી રહી છે. આગામી દિવસોમાં પણ વરસાદ યથાવત રહે તેવી ખેડૂતો આશા રાખી રહ્યા છે. ગ્રામ્ય વિસ્તારોમાં ફરી ચોમાસું જામતા ખેતીના કામોમાં પણ વેગ આવવાની શક્યતા છે.

અમરેલીઃ બગસરા પંથકમાં ધોધમાર વરસાદનું આગમન થયું છે. રફાળા, મુંજીયાસર, સાપર સહિતના અનેક ગામડાઓમાં મેઘરાજાએ ધમાકેદાર એન્ટ્રી કરી છે. પીઠડીયા ગામમાં વીજળીના કડાકા-ભડાકા સાથે વરસાદ વરસ્યો હતો. ભારે વરસાદ વચ્ચે માતાજીના મંદિર ઉપર વીજળી પડતાં સામાન્ય નુકસાન થયું હોવાનું સામે આવ્યું છે. જોકે સદનસીબે કોઈ જાનહાનિ થઈ નથી અને મોટી દુર્ઘટના ટળી ગઈ છે. વરસાદને કારણે ગ્રામ્ય વિસ્તારોમાં રસ્તાઓ પર પાણી ભરાયા હતા. લાંબા સમય બાદ ધોધમાર વરસાદ વરસતા ખેડૂતોમાં ખુશીનો માહોલ જોવા મળ્યો છે. વરસાદથી ખેતીના પાકને પણ ફાયદો થવાની આશા ખેડૂતોમાં જાગી છે. સમગ્ર પંથકમાં હાલ વરસાદી માહોલ છવાયો છે.

અમદાવાદઃ ગુજરાત વિદ્યાપીઠની હોસ્ટેલની મેસમાં ABVP દ્વારા સરપ્રાઇઝ ચેકિંગ હાથ ધરવામાં આવ્યું હતું. ચેકિંગ દરમિયાન મેસમાંથી એક્સપાયર થયેલી ખાદ્ય સામગ્રી મળી આવ્યાનો ABVP દ્વારા આક્ષેપ કરવામાં આવ્યો છે. વિદ્યાર્થીઓને ગુણવત્તાયુક્ત અને સુરક્ષિત ભોજન મળી રહે તે શિક્ષણ સંસ્થાની જવાબદારી હોવાનું ABVPએ જણાવ્યું છે. ભોજનની ગુણવત્તા અને સલામતી મામલે કોઈપણ પ્રકારની બેદરકારી સ્વીકાર્ય ન હોવાનો પણ ABVPએ ઉલ્લેખ કર્યો છે. મેસમાં નિર્ધારિત સમયે નિયમિતપણે ખાદ્ય સામગ્રીની ગુણવત્તા અને તેની સમયમર્યાદાની ચકાસણી કરવી જરૂરી હોવાનું ABVPએ જણાવ્યું છે. વિદ્યાર્થીઓના સ્વાસ્થ્યને ધ્યાનમાં રાખીને મેસ સંચાલનમાં યોગ્ય તકેદારી રાખવાની માગ પણ કરવામાં આવી છે.

ગીર સોમનાથ: કોડીનાર અને સુત્રાપાડા પંથકમાં પણ મેઘરાજાની એન્ટ્રી થઈ છે. ગ્રામ્ય વિસ્તારોમાં ધોધમાર વરસાદ વરસતા વાતાવરણમાં ઠંડક પ્રસરી છે. સુત્રાપાડાના પ્રાચી, ઘંટીયા, ટીંબડી અને અમરાપુર સહિતના ગામોમાં વરસાદ નોંધાયો છે. આ ઉપરાંત આલિધ્રા, પ્રાસલી, ગાંગેથા, વાસવાડ અને રંગપુરમાં પણ મેઘો મહેરબાન થયો છે. કેટલાક વિસ્તારોમાં મુશળધાર વરસાદ વરસતા રસ્તાઓ પર પાણી વહેતા જોવા મળ્યા હતા. લાંબા સમય બાદ વરસાદી માહોલ જામતા ખેડૂતોમાં ખુશીનો માહોલ જોવા મળ્યો છે. વરસાદથી ખેતીના પાકને પણ ફાયદો થવાની આશા ખેડૂતો વ્યક્ત કરી રહ્યા છે. મેઘમહેરથી સમગ્ર પંથકમાં ચોમાસાનો માહોલ છવાયો છે.

અમદાવાદ: પૂર્વ વિસ્તારમાં ફરી મેઘ સવારી જોવા મળી છે. શહેરના નિકોલ, વિરાટનગર સહિતના અનેક વિસ્તારોમાં છૂટો છવાયો વરસાદ વરસ્યો હતો. પવનના સૂસવાટા સાથે અચાનક ભારે વરસાદ ખાબકતા વાતાવરણમાં ઠંડક પ્રસરી હતી. સામાન્ય વરસાદમાં જ કેટલાક વિસ્તારોમાં રસ્તાઓ પર પાણી ભરાઈ જતાં વાહનચાલકોને મુશ્કેલીનો સામનો કરવો પડ્યો હતો. નીચાણવાળા વિસ્તારોમાં પાણી ભરાતા સ્થાનિકોની હાલાકી વધી હતી. વરસાદના કારણે રસ્તાઓ પર વાહનોની ગતિ ધીમી પડી હતી. છેલ્લા કેટલાક દિવસથી શહેરમાં વરસાદી માહોલ જોવા મળી રહ્યો છે ત્યારે આજે પણ પૂર્વ અમદાવાદના વિવિધ વિસ્તારોમાં મેઘરાજાએ હાજરી નોંધાવી હતી.

અમદાવાદના ગોતા વોર્ડમાં સ્મશાન નજીક મુખ્ય રોડ બિસ્માર હાલતમાં છે. રસ્તા પર પાંચ – છ ફૂટથી વધારે પહોળા ગાબડા પડી ગયા છે. ખાડામાં વરસાદી પાણી ભરાયા છે. AMC ટીમ દ્વારા કપચી અને ડામર નાખી ખાડા ભરી રહ્યા છે. રોડ પર પસાર થનાર વાહન ચાલકો ભારે હેરાન થઈ રહ્યા છે. અતિ બિસ્માર હાલતમાં રોડ હોવાથી વાહન ચાલકો અકસ્માત સર્જાય છે. ભ્રષ્ટ એએમસી વેટ્મિકસના થીંગડા મારી રોડને રીપેરીંગ કરાય છે. નવો રોડ મંજૂર થઈ ગયો છે, પરંતુ એસટીપીની લાઈન નાખવામાં આવી હોવાથી કામ અધૂરું હોવાનું એએમસી બચાવ કરી રહી છે. સ્થાનિકો રોષ વ્યક્ત કરીને કહ્યું કે દર વર્ષે આ સ્થિતિ રોડની હોય છે. ચોમાસા પહેલા રોડ બનાવે અને વરસાદ આવતા જ રોડ ધોવાઈ જાય છે. ટેક્સના પૈસા ભર્યે તો પણ સારા રોડ મળતા નથી. આવા રોડ પર પસાર થતા અમારા જેવા સિનિયર સિટીઝન પડી જાય તો પણ સારવાર જાતે કરાવી પડે છે.

ઊંઝાના મક્તુપુરમાં વરિયાળીની ફેક્ટરી પર ફૂડ વિભાગે દરોડા પાડ્યા છે. ગણેશ ક્લીનિંગ ફેક્ટરીમાંથી શંકાસ્પદ નકલી વરિયાળી બનાવવાનું કૌભાંડ પકડાયું છે. ફેક્ટરીમાંથી કુલ 4911 કિલો વરિયાળીનો જથ્થો પકડાયો. ભેળસેળ કરવા માટે રાખેલો 17 કિલો ગ્રીન કલર ઝડપાયો. તંત્ર દ્વારા કુલ 2,47,154 રૂપિયાનો મુદ્દામાલ સીઝ કરવામાં આવ્યો છે. ફૂડ વિભાગ અને સીઆઈડી પોલીસે સંયુક્ત કાર્યવાહી કરી. અધિકારીઓએ તમામ નમૂના લઈ આગળની કાયદેસર તપાસ હાથ ધરી છે.

રાજકોટમાં કોંગ્રેસના પ્રદેશ OBC સેલના ચેરમેન સાથે છેતરપિંડીની ઘટના આવી સામે. મહેશ રાજપૂત સાથે 65 લાખની છેતરપિંડી થવા પામી છે. પોરબંદરના રોમી મોરજરીયા સામે ફરિયાદ નોંધાવી છે. 1 મહિના માટે 65 લાખ રૂપિયા હાથ ઉછીના મેળવ્યા બાદ પરત ન કર્યા. પ્રોમિસનરી નોટ લખી 4 વર્ષ સુધી પરત ન કરતા ફરિયાદ નોંધાવી છે.

ચોમાસા અંગે મોટા સમાચાર. ગુજરાતમાંથી ચોમાસાના વિદાય લેવાની થશે શરૂઆત. 2 થી 4 દિવસમાં ચોમાસુ વિદાય લેવાની શરૂઆત થશે. હવામાન વિભાગે કરી આગાહી. રાજ્યમાં હળવા વરસાદની આગાહી. લો પ્રેશર, સાયકલોનીક સર્ક્યુલેશન સક્રિય છે. બે દિવસ પવન સાથે વરસાદ રહેવાની સંભાવના છે. દક્ષિણ ગુજરાતમાં પવન સાથે વરસાદ રહેશે. અમદાવાદમાં હળવા વરસાદની આગાહી કરવામાં આવી છે. દમણ 64 MM, ખેડા 61 MM વરસાદ નોંધાયો છે. 30MM અમરેલીમાં વરસાદ નોંધાયો છે.

ભાવનગરના મહુવા ટાઉન વિસ્તારમાં શરૂ થયો જોરદાર વરસાદ. સીટી વિસ્તારમાં સાર્વત્રિક વરસાદ વરસતા મુખ્ય માર્ગો પર ભરાયા પાણી. થોડીવાર પહેલા જ વાદળોના કારણો સર્જાયેલા ઘેરા વાતાવરણ વચ્ચે ગાજવીજ સાથે વરસાદનો રાઉન્ડ શરૂ થયો છે. વરસાદ આવતાની સાથે જ અનેક નીચાણવાળા વિસ્તારોમાં પાણી ભરાવાની પણ શરૂઆત થઈ ચૂકી છે.

રાજકોટના આજીડેમ પોલીસ સ્ટેશનના ASI અને GRD જવાન લાંચ લેતા ઝડપાયા છે. આરોપીઓને લોકઅપમાં નહીં રાખવા અને જલ્દી જામીનની કાર્યવાહી કરવા માટે માંગી હતી લાંચ. ફરિયાદી લાંચ આપવા ન માંગતા હોય ACB ને જાણ કરતા ACB એ છટકું ગોઠવતા લાંચ લેતા ASI રાજેશ મેર અને GRD જવાન મનોજ ચૌહાણ ઝડપી પાડ્યા છે.

અમરેલીના લાઠી બાદ હવે લીલીયા શહેર સહિત આસપાસના ગ્રામ્ય વિસ્તારમાં વરસાદ વરસ્યો છે. હાથીગઢ, એકલેરા, નાના રાજકોટ, સાજણ ટીંબા, નાના લીલીયા, પીપળવા, વાઘણીયા, પુંજાપાદર દાડમા સહિતના ગામડામાં વરસાદના સમાચાર સામે આવ્યા છે. અમરેલી પંથકમા ગ્રામ્ય વિસ્તાર અને સાવરકુંડલા પંથકમાં ગ્રામ્ય વિસ્તારમાં વરસાદી ઝાપટા. વરસાદ વરસતા ખેડૂતો અને ગ્રામજનોમાં ખુશીની લહેર જોવા મળી.

મહેસાણાના કડી નજીક કેનાલમાંથી 2 મૃતદેહ મળ્યા છે. બંને મૃતદેહ મહિલાઓના હોવાનું જાણવા મળ્યું છે. 16 થી 17 વર્ષની સગીરા અને 40 વર્ષની મહિલા હોવાનું જાણવા મળ્યું છે. બંને શીલજ ગામના હોવાનું પોલીસની પ્રાથમિક તપાસમાં જણાયું. પોલીસે બંને મૃતદેહો બહાર કાઢી પીએમ કરવાની તજવીજ હાથ ધરી છે.

જામનગરના સિક્કા નગરપાલિકાનાં નિવૃત્ત સિનિયર ક્લાર્ક સહિત બે કર્મચારી સામે ACBએ ગુનો નોંધ્યો છે. ​નિવૃત્ત ક્લાર્ક અતુલકુમાર પંડ્યા અને કરાર આધારિત ક્લાર્ક નીલેશ મેસવાણીયા સામે કાર્યવાહી કરવામાં આવી છે. ​મકાનનાં દસ્તાવેજમાં નામ ટ્રાન્સફર કરી NOC આપવા માટે રૂ.1,000 ની લાંચ માંગ્યાનો આરોપ. ​વર્ષ 2022માં ગોઠવેલ લાંચનું છટકું નિષ્ફળ રહ્યા બાદ ACB દ્વારા ખુલ્લી તપાસ હાથ ધરાઈ છે. ​તપાસનાં અંતે બંને આરોપીઓએ હોદ્દાનો દુરૂપયોગ કરી મદદગારી કરી હોવાનું સામે આવ્યું. ​જામનગર ACBએ ગુનો દાખલ કરી કાયદેસરની કાર્યવાહી કરી. ​સરકારી હોદ્દાનો દુરુપયોગ કરી ગેરકાયદે લાભ મેળવવા બદલ ACBની કડક કાર્યવાહી.

ભરૂચ જિલ્લાના અંકલેશ્વરનાં સાળંગપુર ગામમાં નશાનાં કારણે બે યુવાનોનાં મોતની આશંકા સેવાઈ રહી છે. ત્રણ યુવાનોએ નશો કર્યા બાદ બેના મોત થયા છે. જ્યારે બાકીના એકની તબિયત લથડી હોવાની માહિતી સામે આવી છે. જો કે આ બન્ને યુવાનોના મોત કયા કારણોથી થયા તેનુ સાચુ કારણ પોસ્ટ પોર્ટમ રિપોર્ટ સામે આવ્યા બાદ આવી શકે છે. ગંભીર ઘટનાની જાણ થતા જ, જિલ્લાના ઉચ્ચ પોલીસ અધિકારીઓ દોડતા થઈ ગયા છે. જિલ્લાની પોલીસ પણ એકાએક એક્ટિવ થઈ ગઈ છે.

નાયબ કલેક્ટરની આકસ્મિક તપાસમાં ₹12 લાખથી વધુની સ્ટેમ્પ ડ્યુટી ચોરીનો પર્દાફાશ થયો છે. નાના સોનેલા ગામે અર્બુદા બંગલોઝ ખાતે દસ્તાવેજોમાં ખુલ્લા પ્લોટ દર્શાવી સ્ટેમ્પ ડ્યુટી ચોરી કરાઈ હોવાનો ખુલાસો થયો છે. સ્થળ તપાસ દરમિયાન ખુલ્લા પ્લોટની જગ્યાએ 2 માળના RCC બાંધકામો ઊભા હોવાનું સામે આવ્યું. નાયબ કલેક્ટર એચ. ટી. મકવાણાની ટીમે સ્થળ પર તપાસ કરી ગેરરીતિ પકડી પાડી. પ્લોટ નં. 17, 21, 23 અને 26ના દસ્તાવેજોમાં વાસ્તવિક બાંધકામ છુપાવાયું હોવાનું સામે આવ્યું છે. દસ્તાવેજોમાં બાંધકામની વિગતો છુપાવી સ્ટેમ્પ ડ્યુટી ઓછી ભરાઈ હોવાની આશંકા. ગુજરાત સ્ટેમ્પ અધિનિયમ હેઠળ ખૂટતી સ્ટેમ્પ ડ્યુટી અને દંડ વસૂલવા કાયદેસરની કાર્યવાહી શરૂ કરાઈ છે. સમગ્ર મામલે તંત્ર દ્વારા વધુ તપાસ હાથ ધરાઈ.

સુરત જિલ્લાના માંગરોળના કંટવા ખાતે યોજાયું ભવ્ય ખેડૂત સંમેલન. ગણેશ સુગર વટારિયાના મજબૂતીકરણ અર્થે યોજાયું ખેડૂત સંમેલન. માંગરોળ અને વાલિયા તાલુકાના ખેડૂતો મોટી સંખ્યામાં સંમેલનમાં હાજર રહ્યા.
ફેક્ટરીને વધુમાં વધુ શેરડીનો પુરવઠો મળે તે અંગે કરાઈ વિસ્તૃત ચર્ચા. ફેક્ટરી મહત્તમ ક્ષમતા સાથે પિલાણ કરે તે માટે ખેડૂતોએ કરી વિચારણા. ગણેશ સુગર ફેક્ટરીમાં વધુમાં વધુ શેરડી પહોંચાડવા ખેડૂતોએ લીધો સંકલ્પ.

દીવની હોટલના પાર્કિંગમાં કારમાંથી મળ્યો મૃતદેહ. સિક્યુરિટી ગાર્ડને શંકા જતા કારમાં તપાસ કરતાં થઇ જાણ. પોલીસે કારનો કાચ તોડી મૃતદેહ બહાર કાઢ્યો. પોલીસ તપાસમાં મૃતક જેતપુરનો યુવાન હોવાનું આવ્યું સામે.
મોતનું કારણ જાણવા પોલીસે હાથ ધરી વધુ તપાસ.

પ્રાથમિક અહેવાલો મુજબ, મરીન ડ્રાઈવથી હાજી અલી તરફ જઈ રહેલી BMW કારની વધુ પડતી ઝડપને કારણે આ અકસ્માત સર્જાયો હતો. મુંબઈના કોસ્ટલ રોડ પર લાલા કોલેજની સામે, લોટસ જેટી નજીક એક પૂરપાટ ઝડપે આવતી BMW કારનો અકસ્માત થયો હતો. પ્રાથમિક માહિતી અનુસાર, મરીન ડ્રાઈવથી હાજી અલી તરફ જઈ રહેલી આ કારની વધુ પડતી ઝડપને કારણે આ દુર્ઘટના ઘટી હતી. આ અકસ્માતમાં ત્રણ લોકોનાં ઘટનાસ્થળે જ મોત થયાં હતાં અને અન્ય ચાર લોકો ઘાયલ થયા હતા.

નવસારી વાંસદા પંથકમાં સતત બીજા દિવસે સવારથી જ છવાયું ગાઢ ધુમ્મસ. ​રસ્તા પર વિઝીબિલિટી શૂન્ય સમાન થતા વાહનવ્યવહારને અસર થવા પામી છે. પંથકમાં સર્જાયા હિલ સ્ટેશન જેવા નયનરમ્ય અને દ્રશ્યો. ​વરસાદની વિદાય બાદ ધુમ્મસ છવાતા જગતના તાતની ચિંતામાં વધારો થયો છે.

વડોદરાને CMના હસ્તે ₹1273 કરોડના વિકાસકામોની ભેટ મળશે. નવનિર્મિત ગંભીરા બ્રિજ અને ભવ્ય આંબેડકર મેમોરિયલનું કરાશે લોકાર્પણ. વડોદરા જિલ્લાના વરણામા ખાતે મુખ્યમંત્રી ભૂપેન્દ્ર પટેલ આવશે. શહેર તેમજ જિલ્લાના નાગરિકો માટે રૂ. 1273 કરોડના વિવિધ જનહિતકારી વિકાસ કામોની ભેટ. ₹212 કરોડથી વધુના ખર્ચે તૈયાર થયેલા નવનિર્મિત ગંભીરા બ્રિજનું લોકાર્પણ અને બીજું વડોદરા શહેરમાં નવનિર્માણ પામેલા અત્યાધુનિક ડો. બાબાસાહેબ આંબેડકર મેમોરિયલનું લોકાર્પણ. વિવિધ વિભાગોના ₹1273 કરોડના કામોનું લોકાર્પણ-ખાતમુહૂર્ત કરવામાં આવશે.

સુરત શહેરના પાંડેસરા GIDC માં આગ. પ્રિયાંશી ડાઈન મીલમાં લાગી આગ. મિલના સેન્ટર મશીનમાં અચાનક જ આગ ફાટી નીકળી. ફાયરની ટિમ દ્વારા આગ કાબુમાં લેવા પ્રયાસ કરાયો છે. આગને કારણે કોઇ જાનહાની નહીં.
શોર્ટ સર્કિટથી આગ લાગી હોવાનુ પ્રાથમિક અનુમાન. કરોડો રૂપિયાનો માલ સામાન સહિત મશીનો બળીને ખાખ થઈ ગઈ છે.

બનાસકાંઠાના પાલનપુરમાં ગત રાતે વરસ્યો ભારે પવન સાથે વરસાદ. ભારે પવન અને વરસાદથી પદયાત્રીઓ માટે બાંધેલ સેવા કેમ્પને નુકસાન. વરસાદ ખેંચાતા બાદ 3 દિવસથી ફરી વરસાદી માહોલથી ખેડૂતોના પાકને મળ્યું જીવનદાન…

દિલ્હીથી કાઠમંડુ જઈ રહેલી એર ઈન્ડિયાની ફ્લાઈટ AI219માં સર્જાયેલ ટેકનિકલ ખામીને કારણે રાજધાની દિલ્હીમાં પાછી ફરી હતી. 19 સપ્ટેમ્બરે રવાના થયેલી આ ફ્લાઈટને ‘સ્ટાન્ડર્ડ ઓપરેટિંગ પ્રોસિજર્સ’ (SOPs) મુજબ સાવચેતીના પગલાં રૂપે પાછી બોલાવી લેવામાં આવી હોવાનું કહેવામાં આવી રહ્યું છે.

આજથી અંબાજી ખાતે શરૂ થશે ભાદરવી મહાકુંભ. ભાદરવી મહાકુંભને મુકાશે ખુલ્લો. જિલ્લા કલેકટર સિંહ દ્વારથી મંદિરના રથને પ્રયાણ કરાવી ભાદરવી મહાકુંભને મુકશે ખુલ્લો. 6 દિવસીય મહાકુંભમાં લાખોની સંખ્યામાં ઉમટશે પદયાત્રી. લાખો પદયાત્રીઓને ધ્યાનમાં લઇ તંત્ર તમામ તૈયારીઓથી સજ્જ. મહામેળાની સુરક્ષા અર્થે 2 sp, 25 DySP સહીત PI, PSI તેમજ 6000 થી વધુ પોલીસ જવાનો રહેશે ખડેપગે.

આણંદના શેખડી રોડ પર વીજળી પડતાં 3 મકાન ધરાશાયી થયા છે.  રબારીયાપુરા-મોટી કેનાલ પાસે ભારે વરસાદ દરમિયાન બનાવ બન્યો હતો. સદનસીબે જાનહાનિ ટળી છે. વહીવટી તંત્રની ટીમે સ્થળ પર પહોંચી નુકસાનીનો તાગ મેળવ્યો હતો.

મોરબી નગરપાલિકાના પૂર્વ કાઉન્સિલર અને ભાજપના આગેવાન વિરુદ્ધ એક મહિલાએ બળાત્કારની ફરિયાદ નોંધાવી છે. પાંચ વર્ષ પહેલા ભોગ બનનાર પરિણીતાએ પતિની બિમારી માટે આરોપીની પત્ની પાસેથી ઉછીના લીધેલ રૂપિયાની આડમાં ભાજપ આગેવાન શૈલેષ માકાસણાએ બળાત્કાર ગુજાર્યો. વર્ષ 2020માં પરિણીતાને પોતાના રહેણાંક ફ્લેટમાં બોલાવી કર્યો બળાત્કાર. આ દરમિયાન પરિણીતાને ગર્ભ રહી જતા આરોપી શૈલેષે પોતાનું પાપ છુપાવવા બાળકની જવાબદારી ઉઠાવવાનું બહાનું કર્યું. બાદમાં પોતાના ઓમ વિલા બંગલા ખાતે બોલાવી પણ બળજબરીથી શરીર સંબંધ બાંધવાની કોશિષ કરી. આરોપી શૈલેષે પરિણીતા આ બાબતે કોઈને કહેશે તો મારી નાખવાની ધમકી આપી. બનાવના પાંચ વર્ષ બાદ પરિણીતાના ઘરે બાળક બાબતે જાણ થતાં પરિવારજનોએ હિંમત આપી ફરિયાદ નોંધાવી. મોરબી સિટી એ ડિવિઝન પોલીસે આરોપી શૈલેષને પકડવા શોધખોળ હાથ ધરી છે.આરોપી શૈલેષ માકાસણાના ઓમવીલા બંગલો ખાતેથી ગત જુલાઈ માસમાં પકડાયું હતું જુગારધામ. જોકે તે જુગારધામ ઉપરના દરોડા વખતે શૈલેષ ત્યાં હાજર ન હતો.