12 ડિસેમ્બરના મહત્વના સમાચાર : સુરત એરપોર્ટને બોંબથી ઉડાવાની ધમકી આપનાર પકડાયો, સુરત LCBએ કરી ધરપકડ

સુરત: વરિયાવ વિસ્તારમાં 10 વર્ષીય બાળકે આપઘાત કર્યો હોવાનું સામે આવ્યુ છે. માતા-પિતા કામે ગયા બાદ બાળકે ઘરે ગળે ફાંસો ખાધો. મામા ભાઇએ પતંગની દોરી ના આપતા બાળકને માઠું લાગતા તેણે આત્મહત્યા કરી છે. બાળકે ઘરમાં જઇને ગળે ફાંસો ખાઇ લેતા મોત થયુ છે.

સુરતમાં બોગસ તબીબ ઝડપાયા બાદ આયુર્વેદ કાઉન્સિલ એક્શનમાં છે. ગુજરાત બોર્ડ ઓફ આયુર્વેદિક સંસ્થાએ મહત્વનો નિર્ણય લીધો છે. 12 માર્ચ 2025 સુધી આયુર્વેદિક તબીબોનું રજિસ્ટ્રેશન ફરજિયાત કરવામાં આવ્યુ છે. ક્લિનિકલ એસ્ટાબ્લિશમેન્ટ એક્ટ 2021 હેઠળ રજિસ્ટ્રેશન જરૂરી છે. રાજ્યમાં 27000 જેટલા તબીબો હાલ કાર્યરત છે. રજિસ્ટ્રેશન નહીં કરાવે તો 5 લાખ સુધીનો દંડ ફટકારાશે.

રાજકોટઃ જામકંડોરણાના સનાળા ગામે પરિવારે આપઘાત કર્યો છે. ખેત મજૂરી કરતા શ્રમિક પરિવારે ઝેરી દવા પી લીધી હતી. બે સંતાનો અને માતાનું મોત થયું હતુ. દાહોદ જિલ્લામાંથી ખેત મજૂરી કરવા પરિવાર આવ્યો હતો. જો કે પતિએ પત્નીને કામ બાબતે સામાન્ય ઠપકો આપતા પત્નીએ સંતાનો સાથે ઝેરી દવા પીધી હોવાની પ્રાથમિક માહિતી સામે આવી છે.

છોટા ઉદેપુરઃ ઢાબામાં પુરઝડપે કાર ઘુસાડનાર કારચાલકની અટકાયત કરવામાં આવી છે. બોડેલીના વિશાલ ઠક્કર નામના યુવાનની પોલીસે અટકાયત કરી છે. ઢાબાના ગ્રાહકે કારચાલક સામે બોડેલી પોલીસ મથકે ફરિયાદ નોંધાવી. અકસ્માતમાં ત્રણ લોકોને નાની મોટી ઈજા થઈ હતી. સોમવારે રાત્રીના 10:30 વાગ્યે ચાલકે કાર ઢાબામાં ઘુસાડી હતી.

સુરત એરપોર્ટને બોંબથી ઉડાવાની ધમકી મામલે સુરત જિલ્લા LCBએ આરોપી યુવકની ધરપકડ કરી. આરોપીની ધરપકડ કર્યા બાદ સુરત પોલીસને સોંપાયો. પોલીસ કંટ્રોલ રૂમમાં કોલ કરી ધમકી આપી હતી. ઉમરા પોલીસે આરોપીને પકડી તપાસ હાથ ધરી.

વડોદરાવાસીઓને ફરી એક વાર પાણીના ફાંફાં પડશે. આવતીકાલથી 2 દિવસ સુધી શહેરમાં પાણી કાપ રહેશે. 2 દિવસ સુધી 2.50 લાખ નાગરિકોને પાણી નહીં મળે. સુભાનપુરા, વાસણા, ગાયત્રીનગર સહિતના વિસ્તારોમાં પાણીકાપ રહેશે. હરીનગર વિસ્તારમાં પાણીની લાઈનના જોડાણની કામગીરી ચાલી રહી છે. પાણીની લાઈનનું જોડાણ કામગીરીને લીધે પાણીકાપ રહેશે.

ભૂપેન્દ્ર પટેલ સરકારને આજે બે વર્ષ પૂર્ણ થયા છે. બે વર્ષ પુર્ણ થવાને લઈને અલગ અલગ કાર્યક્રમ યોજાશે. વિકસિત ભારત @ ૨૦૪૭ના થીમ પર કાર્યક્રમ કરવામાં આવશે. શ્રમિક સુવિધા કેન્દ્રનું લોકાર્પણ થશે. 600 યુવાનોને નિમણૂંક પત્ર આપવામાં આવશે. અન્નદાતાઓ સાથે સંવાદનો કાર્યક્રમ યોજાશે. મહિલા સ્ટાર્ટઅપ-ઈનોવેટર્સ સાથે સંવાદ થશે.