9 ઓક્ટોબરના મહત્વના સમાચાર : સુરત પોલીસે ફાયરિંગ કરીને બોરસરાં ગેંગરેપના બે આરોપીને ઝડપ્યા

વાઇબ્રન્ટ નવરાત્રી ઉત્સવ 2024 નું ઉદ્ઘાટન કેન્દ્રીય ગૃહમંત્રી અમિતભાઈ શાહ દ્વારા 3જી ઓકટોબર, 2024ના રોજ મુખ્યમંત્રી ભૂપેન્દ્રભાઈ પટેલની ઉપસ્થિતિમાં કરવામાં આવ્યું હતું. પ્રથમ દિવસથી જ અદભુત ઉત્સાહ અને જોશનું પ્રદર્શન કરતાં ગુજરાતના નવરાત્રી ચાહકોએ આ ઉત્સવને અપ્રતિમ આવકાર આપ્યો હતો અને 3જા નોરતાથી સરેરાશ 1,50,000 લોકોએ તેની મુલાકાત લીધી હતી. 6ઠ્ઠા નોરતે લગભગ 1,65,000 ગરબાપ્રેમીઓએ આ ઉત્સવમાં જુસ્સાથી ભાગ લીધો હતો. ઉદઘાટન કાર્યક્રમમાં 200 થી વધુ ગરબા અને દાંડિયા કલાકારોએ પરફોર્મ કર્યું હતું.

સુરતના માંગરોળના મોટા બોરસરાં ગામની સીમમાં સગીરા સાથે ગેંગરેપ કેસના 2 આરોપીને પોલીસે ફાયરિંગ કરીને પકડ્યા છે. પોલીસ જ્યારે આરોપીને પકડવા ગઈ ત્યારે આરોપી ભાગવા જતા પોલીસે ફાયરિંગ કર્યું હતું. જો કે ત્રીજો આરોપી હજુ ફરાર છે. જેને પકડવા પોલીસે ચક્રો ગતીમાન કર્યા છે.

સસ્પેન્ડેડ ડિવિઝનલ ફાયર ઓફિસર મનીષ મોડની ACB એ ધરપકડ કરી છે. મનીષ મોડની ધરપકડ લાંચ કેસમાં કરાઈ છે. સ્કૂલને ફાયર NOCની કાર્યવાહી મુદ્દે રૂપિયા 65 હજારની લાંચની માંગ કરી હતી,  25 હજારની લેવડ દેવડ નક્કી થઈ હતી. Acb દ્વારા કેસ દાખલ થયા બાદ મનીષ મોડે ધરપકડથી બચવા માટે આગોતરા જામીન અરજી કરી હતી. સેશન્સ કોર્ટ દ્વારા આગોતરા જામીન અરજી ફગાવવામાં આવ્યા બાદ, હાઇકોર્ટ દ્વારા પણ જામીન અરજી રદ્દ થશે તેવું લાગતા મનીષ મોડ દ્વારા જામીન અરજી પાછી ખેંચવામાં આવી હતી. અંતે આજે અમદાવાદ ACB દ્વારા ધરપકડ કરવામાં આવી છે.

NGTએ નક્કર અને પ્રવાહી કચરા વ્યવસ્થાપનમાં કામ ન કરવા બદલ રાજસ્થાન સરકારને રૂ. 746.88 કરોડનો દંડ ફટકાર્યો છે. AAG શિવ મંગલ શર્માને તાત્કાલિક પગલાં લેવા અને સરકારને સલાહ આપવા માટે ફાઈલ મોકલવામાં આવી છે.

અમદાવાદના કૃષ્ણ નગરના સરદાર ચોકમાં 28 લાખની ચાંદીની લૂંટ થવા પામી છે. લાલભાઈ જવેલર્સ નામની દુકાન આગળના માર્ગ પર લૂંટ થઈ છે. રૂપિયા 28 લાખની ચાંદીની લૂંટ થઈ હોવાના કોલ બાદ પોલીસ દોડતી થઈ છે. એક્ટિવા સવાર મહિલા ચાંદીનો થેલો લૂંટવા વાળી ટોળકીમાં સામેલ હોવાનું સામે આવ્યું છે. સ્થાનિક પોલીસ અને ઉચ્ચ અધિકારીઓ ઘટના સ્થળે દોડીને તપાસ આદરી છે.

ગેરકાયદે પાર્સલ પકડાયું હોવાનાં બહાને ઠગાઇ કરતી ગેંગને વડોદરા પોલીસે પકડી પાડી છે. નકલી પોલીસ બની છેતરતી ગેંગનાં બે ઠગની મુંબઇથી ધરપકડ કરવામાં આવી છે. વડોદરા સાયબર ક્રાઇમ બ્રાન્ચને, ડિજિટલ અરેસ્ટનાં કેસમાં સફળતા મળી છે. મુંબઇની કુરિયર કંપનીમાંથી સીબીઆઇનાં નામે બોગસ કોલ કર્યો હતો. ફરિયાદીને કાર્યવાહીની ધમકી આપી ખાતામાંથી 32.50 લાખ પડાવ્યાં હતા.

મુખ્યમંત્રી ભૂપેન્દ્ર પટેલે લોથલ ખાતે નેશનલ મેરિટાઈમ હેરિટેજ કોમ્પ્લેક્ષના વિકાસની મંજૂરી આપવા માટે વડાપ્રધાન નરેન્દ્રભાઈ મોદી અને કેન્દ્રીય મંત્રીમંડળનો આભાર વ્યક્ત કર્યો છે.

મુખ્યમંત્રીએ જણાવ્યું છે કે, વડાપ્રધાન નરેન્દ્ર મોદીનો ‘વિકાસ ભી, વિરાસત ભી’નો મંત્ર આ મંજૂરીથી ગુજરાતમાં સાકાર થશે. એટલું જ નહિં, રાજ્યના સમૃદ્ધ દરિયાઈ વારસાને ઉજાગર કરતા આ કોમ્પ્લેક્ષના વિકાસથી ગુજરાતમાં આશરે 22,000 રોજગારીની તકોનું ભવિષ્યમાં સર્જન થશે.

દેવભૂમિ દ્વારકાના ખંભાળિયા તાલુકાના આંબરડી ગામે પ્રેમ લગ્ન કરનાર યુગલનું 13 લોકોએ અપહરણ કરીને હુમલો કર્યો હતો. યુવતીના પરિવારજનો દ્વારા યુવક તેમજ તેમના પરિવાર પર જીવલેણ હુમલો કર્યો છે. આરોપીઓએ યુવક અને યુવતીનું કારમા અપહરણ કર્યું હતું. યુગલને બાંધીને ઢોર મારમારી અને જાનથી મારી નાખવા માટે યુવક ઉપર કાર માથે ફેરવી હતી. યુવકને ગંભીર ઇજાઓ થતા સારવાર માટે ખંભાળિયાની હોસ્પિટલમાં ખસેડાયો હતો જ્યાથી વધુ સારવારઅર્થે જામનગરની હોસ્પિટલમાં રીફર કરાયો છે. દિલીપ જોગલ તેમજ હસ્મિતા કાંબરિયાએ આજથી 20 દિવસ પહેલા પ્રેમ લગ્ન કર્યા હતા. આ મુદ્દે સમાધાન કરવાના બહાને યુવક અને યુવતીને બોલાવી અપહરણ કરીને જીવલેણ હુમલો કર્યો હતો. 13 લોકો ઉપર અપહરણ..લૂંટ તેમજ જાનથી મારી નાખવાની ધમકી આપવા બદલ ગુન્હો દાખલ કરી ખંભાળિયા પોલીસે 7 આરોપીઓની અટકાયત કરી વધુ તપાસ હાથ ધરી છે.

વડોદરા ભાયલી ગેંગરેપના આરોપીઓને ઘટનાસ્થળે લઇ જઈને પોલીસ કર્યું ઘટનાનું રિકન્સ્ટ્રક્શન. પોલીસે આરોપીઓને સાથે રાખી ઘટનાનું રિકન્સ્ટ્રક્શન કર્યું હતું. રિકન્સ્ટ્રક્શન સમયે SIT ટીમના અધિકારીઓ પણ સામેલ થયા હતા.

રાજ્યમા બળાત્કારની વધેલી જતી ઘટના વચ્ચે વધુ એક દુષ્કર્મનો કિસ્સો સામે આવ્યો છે.  કચ્છના આડેસરમાં ગરબી જોઈ ઘરે જતી દલિત યુવતી પર પેવર બ્લોકના કારખાનામાં બળાત્કારથી ચકચાર મચી જવા પામી છે. યુવતીને અચાનક ચક્કર આવતાં બે જણ તેને પાણી પીવડાવવા કારખાનામાં લઈ ગયેલાં. બાદમાં કારખાનાના માલિક દ્વારા બળાત્કાર કર્યાની ફરિયાદ નોંધાઇ છે. પોલીસે 7 તારીખે બનેલી ઘટના સંદર્ભે વધુ તપાસ હાથ ધરી છે.

મહેસાણા વિજાપુરમાં આવેલ સેન્ટ જોસેફ ઈંગ્લીશ મીડિયમ શાળામાં ધોરણ 9 માં અભ્યાસ કરતા બાળકને શાળામાં કરંટ લાગતા મોત થયું છે. 3 બાળક અને 2 કારીગરને કરંટ લાગ્યો હતો. કરંટ લાગવાથી ધોરણ 9માં અભ્યાસ કરતા આર્યરાજસિંહ ઉપેન્દ્રસિંહ સિસોદિયાનું મોત થયું છે. જ્યારે અન્ય 2 વિદ્યાર્થી અને કારીગર સારવાર હેઠળ છે.

અરબી સમુદ્રમાં લક્ષદ્વિપ નજીક લો પ્રેશર સક્રિય થયું છે. લો પ્રેશરના કારણે ગુજરાત તરફ ભેજ આવશે. આગામી 4 દિવસ દક્ષિણ ગુજરાત અને સૌરાષ્ટ્રના અમુક જિલ્લામાં છુટાછવાયા વરસાદની આગાહી હવામાન વિભાગે કરી છે. ગાજવીજ સાથે હળવા વરસાદની પણ આગાહી હવામાન વિભાગ દ્વારા કરવામાં આવી છે. આજે બુધવારે ગીર સોમનાથ, અમરેલી, ભાવનગર, નર્મદા સુરત ડાંગ વલસાડ નવસારી તાપીમાં સામાન્ય વરસાદની આગાહી કરવામાં આવી છે.

બોગસ કંપની અને બીલ બનાવી કરોડો રૂપિયાની જીએસટી ચોરીના મામલે, મહેશ લાંગાંની કંપનીના 3 કરોડ 70 લાખના બીલ જીએસટી વિભાગે તપાસ માટે અમદાવાદ ક્રાઈમ બ્રાન્ચને સોપ્યાં છે. કરોડો રૂપિયાની જીએસટી ચોરી પ્રકરણમાં હવે ઈન્કમટેક્સ વિભાગ પણ જોડાયું છે. પત્રકાર મહેશ લાંગાની મિલકતને લઈને પણ તપાસ હાથ ધરાઈ છે. બોગસ કંપની ધ્રુવીનાં કનેક્શન આંગડિયા પેઢી સાથે પણ જોડાયા હોવાની શક્યતા વ્યક્ત કરાઈ છે. બોગસ બિલિંગ કૌભાંડનુ એપી સેન્ટર ભાવનગર હોવાનું તપાસમાં સામે આવ્યું છે. બોગસ કંપની ધ્રુવી એન્ટરપ્રાઇઝ રાજકોટનાં શાપરમાં રજીસ્ટર થઈ હતી.ક્રાઈમ બ્રાન્ચે પકડેલા આરોપી એઝાઝ અને અબ્દુલ કાદરે ધ્રુવી એન્ટરપ્રાઇઝ બનાવી 80 હજાર રૂપિયામાં વેચી નાખી હતી.

છેલ્લા ઘણા સમયથી પડતર માંગણી નહીં સંતોષાતા ભાંભણ ગામના યુવાન દ્વારા, બોટાદ જિલ્લા પંચાયત કચેરીના ગેટ પાસે આજે આત્મવિલોપનનો પ્રયાસ કરાયો હતો.બોટાદ તાલુકાના ભાંભણ ગામના હરેશભાઈ સાંથળીયા નામના વ્યક્તિ
છેલ્લા ઘણા સમયથી બોટાદ તાલુકાના ભાંભણ ગામમાં મફત પ્લોટ માંગણીને લઈ અનેક રજૂઆતો અને ધક્કા ખાધા બાદ નક્કર કામગીરી ન થતાં આત્મવિલોપનનો પ્રયાસ કર્યો હતો. પેટ્રોલ છાંટીને શરીર પર ઢોળી દઈ આત્મવિલોપનનો પ્રયાસ કરાયો જેમાં પેટ્રોલ પી જતા તબિયત લથડતા સ્થળ પર ઢળી પડ્યો હતો. પોલીસે પહોંચીને આત્મવિલોપનનો પ્રયાસ કરનાર હરેશભાઈ સાંથળીયાની અટકાયત કરી પોલીસ જીપમાં સારવાર માટે સરકારી સોનાવાલા હોસ્પિટલ ખસેડાયો છે.

રાજ્યના તબીબી શિક્ષકોના હિતમાં મહત્વપૂર્ણ નિર્ણય લેવામાં આવ્યો છે. રાજ્યની સરકારી મેડિકલ કૉલેજ સંલગ્ન હોસ્પિટલમાં ફરજ પર કરાર આધારિત વર્ગ-1 અને વર્ગ-2ના તબીબી શિક્ષકોને અપાતા માસિક વેતનમાં વધારો થયો છે. શિક્ષકોને માસિક વેતનમાં 30% થી 55% સુધીનો વધારો મળશે.

દિવસેને દિવસે રાજ્યમાં દુષ્કર્મ અને છેડતીના કિસ્સાઓમાં વધારો થઈ રહ્યો છે. ત્યારે વધુ બે બાળાઓ સાથે છેડતીની ઘટના બની છે.. ગીર ગઢડાના એક ગામમાં બે બાળાઓ શાળાથી પરત ફરીને મંદિર નજીક રમી રહી હતી. તે દરમિયાન 35 વર્ષીય નરાધમે એકલતાનો લાભ ઉઠાવ્યો. જે બાદ બન્ને બાળાઓને બોલાવીને બિભત્સ વીડિયો બતાવ્યો અને શારીરિક અડપલાં કર્યા. એટલું જ નહીં આરોપીએ છરી બતાવીને કોઈને ઘટના અંગે જાણ ન કરવાની ધમકી આપી હતી, પરંતુ થોડા દિવસ બાદ બાળકીએ આપવીતી પરિવારને જાણ કરતા તેનીના માતા-પિતાએ પોલીસ મથકે ફરિયાદ નોંધાવી હતી. જે બાદ પોલીસે આરોપી કાળુ જેઠવાની ધરપકડ કરીને પોક્સો એક્ટ સહિતની કલમો હેઠળ ગુનો દાખલ કર્યો.

અમદાવાદઃ GST સબંધિત ખોટા દસ્તાવેજ મુદ્દે ફરિયાદનો કેસમાં ક્રાઇમ બ્રાન્ચે પકડેલા આરોપીઓને કોર્ટમાં રજૂ કર્યા છે. કોર્ટે તમામ આરોપીઓ 10 દિવસના રિમાન્ડ મંજૂર કર્યા છે. 13 કંપનીઓ વિરૂધ્ધ ક્રાઇમ બ્રાન્ચે ફરિયાદ નોંધી હતી. તપાસ ટીમે રાજ્યના 13 સ્થળોએ દરોડા પાડી તપાસ કરી હતી. ગેરકાયદે નાણાકીય લેવડ દેવડ અને ખોટા પ્રોપ્રાઈટર મળ્યા હતા. 200 કંપનીઓમાં નાણાકીય વ્યવહારો થયાનો પણ ખુલાસો થયો છે. ક્રાઇમ બ્રાંચે મહેશ લાંગા સહિત 4 આરોપીઓની ધરપકડ કરી છે.

રિઝર્વ બેંક ઓફ ઈન્ડિયાની મોંઘવારી સામેની લડાઈ ચાલુ રહેશે. રિઝર્વ બેંકના ગવર્નર શક્તિકાંત દાસે એમપીસીની બેઠક બાદ પોતાના નિર્ણયમાં આનો સંકેત આપ્યો છે. આરબીઆઈ એમપીસીની બેઠકમાં લેવાયેલા નિર્ણયોની માહિતી આપતા ગવર્નરે કહ્યું કે આરબીઆઈના રેપો રેટમાં કોઈ ફેરફાર કરવામાં આવશે નહીં. આનો અર્થ એ થયો કે RBI MPCએ સતત 10મી વખત રેપો રેટને સ્થિર કર્યો છે. ઉપરાંત, તેણે પોતાનું વલણ તટસ્થ રાખ્યું છે. RBI MPCના 6માંથી 5 સભ્યોએ વ્યાજ દરોમાં કોઈ ફેરફાર ન કરવાનો નિર્ણય લીધો છે. ફેબ્રુઆરી 2023 થી રેપો રેટમાં કોઈ ફેરફાર થયો નથી.

સુરતઃ બારડોલી-કડોદરા રોડ પર ગંગાધરા ગામની સીમમાં અકસ્માત થયો છે. પૂરપાટ ઝડપે આવતી માલિબા કોલેજની બસે અકસ્માત સર્જ્યો છે. માલિબા કોલેજની ખાનગી બસે અન્ય એક સ્કૂલ બસ તેમજ રીક્ષાને અડફેટે લીધી. માર્ગ પરથી પસાર થતા એક રાહદારીનું અડફેટે આવી જતા મોત થયું છે. તો રીક્ષામાં સવાર અન્ય બે વ્યક્તિઓ ઇજાગ્રસ્ત થતાં હોસ્પિટલ ખસેડાયા છે. સ્કૂલ બસ ખાલી હોવાથી મોટી જાનહાની ટળી.

અમદાવાદઃ સોલાના માંગલ્ય પાર્ટી પ્લોટમાં મારામારી થવાની ઘટના બની છે. પાસ મુદ્દે આયોજકો અને ખેલૈયાઓ વચ્ચે મારામારી થઇ હતી. ફોર સિઝન ઇવેન્ટનાં 20થી 25 આયોજકો પર આરોપ છે.
માંગલ્ય પાર્ટી પ્લોટના આયોજકો પર હુમલાનો આરોપ છે. પોલીસે ઘટનાસ્થળે પહોંચી કાર્યવાહી હાથ ધરી છે. સોલા પોલીસે 8થી 10 લોકો વિરૂદ્ધ તપાસ હાથ ધરી છે. ભોગ બનનારની તબિયત લથડતા હોસ્પિટલ ખસેડાયો છે.

સુરતઃ રાજ્યમાં વધુ એક શર્મનાક ઘટના સામે આવી છે. માંગરોળના બોરસરાં ગામની સીમમાં સગીરા સાથે દુષ્કર્મ થયુ છે. સગીરા તેના મિત્ર જોડે બેસી હતી ત્યારે અજાણ્યા શખ્શોએ આવી દુષ્કર્મ કર્યું.
અજાણ્યા લોકોએ સગીરા સાથેના યુવકને માર મારી ભગાડી દીધો હોવાની માહિતી છે. નજીકમાં અવાવરૂ જગ્યાએ લઈ જઈને દુષ્કર્મ આચર્યું હોવાનું સામે આવ્યુ છે.

સુરતમાં ગિલોલની મદદથી કારના કાચ તોડી કારમાં રહેલી કિંમતી ચીજવસ્તુઓની ઉઠાંતરી કરનાર આંધ્ર પ્રદેશની નેલ્લોર ગેંગ ઝડપાઇ છે. સુરત ક્રાઇમ બ્રાંચની ટીમે અડાજણ રામજી ઓવારા પાસેથી નેલ્લોર ગેંગના 5 આરોપીઓની ધરપકડ કરી છે. આ પાંચેય લોકો ગુજરાતના જાહેર અને ધાર્મિક સ્થળોએ ફરી લોકોની ગાડીઓને ટાર્ગેટ કરતા હતા. જેમાં ગાડીના બોનેટના નીચેનો ભાગ હોય ત્યાં ઓઈલ ટપકે છે તેમ કહીં લોકોનું ધ્યાન ભટકાવી પાછળથી સમાન ચોરી કરતા હતા.

અમદાવાદ: 11માં માળેથી બાળક પડી જતાં તેનું મોત થયુ છે. છારોડીના માલાબાર કાઉન્ટીના એપાર્ટમેન્ટમાં આ ઘટના બની છે. 5 વર્ષીય બાળકનું બાલ્કનીમાંથી પડી જતાં મોત થયુ. પોલીસે ઘટના અંગે તપાસ હાથ ધરી છે.