09 નવેમ્બરના મહત્વના સમાચાર : આજથી દેશના 13 રાજ્યના વાતાવરણમાં આવશે પલટો, IMDની વાવાઝોડા અને હિમવર્ષાની આગાહી

દાહોદના લીમખેડામાં બે જૂથો વચ્ચે ઘર્ષણની ઘટના સામે આવી છે. દૂધિયા ગામ નજીક બે જૂથો સામસામે આવી જતાં લાકડીઓ અને પથ્થરો વડે મારામારી થઈ હતી. બંને જૂથો વચ્ચે પથ્થરમારો થતાં વિસ્તારમાં ભારે અફરાતફરીનો માહોલ સર્જાયો હતો. આ જૂથ અથડામણમાં એક વ્યક્તિને ગંભીર ઈજા પહોંચી હોવાનું જાણવા મળ્યું છે. ઘટનાની જાણ થતાં જ પોલીસ કાફલો ઘટનાસ્થળે દોડી આવ્યો હતો અને પરિસ્થિતિ પર કાબૂ મેળવ્યો હતો.

દેશના હવામાનમાં આજથી મોટો પલટો આવવાની શક્યતા છે. હવામાન વિભાગ (IMD) દ્વારા દેશનાં 13 રાજ્યોમાં વરસાદ, વાવાઝોડું અને હિમવર્ષાને લઈને આગાહી કરવામાં આવી છે. કેટલીક જગ્યાએ પવનની ઝડપ 90 કિમી પ્રતિ કલાક સુધી પહોંચવાની શક્યતા છે. બિહાર અને ઝારખંડમાં હળવાથી મધ્યમ વરસાદ પડી શકે છે, જ્યારે પશ્ચિમ બંગાળ અને સિક્કિમમાં ગાજવીજ સાથે વરસાદની આગાહી છે. બીજી તરફ તમિલનાડુ, કેરળ, કર્ણાટક અને આંધ્રપ્રદેશમાં ભારે વરસાદને લઈને ચેતવણી આપવામાં આવી છે. જ્યારે 12 નવેમ્બરે કાશ્મીર ઘાટીમાં હિમવર્ષાનું એલર્ટ જાહેર કરવામાં આવ્યું છે. આ આગાહીને પગલે અનેક રાજ્યોમાં હવામાનની સ્થિતિ બદલાવાની શક્યતા છે.