08 જુલાઈના મહત્વના સમાચાર : સુરતમાં 12 કલાકમાં મેઘતાંડવ, 14 ઈંચ વરસાદથી જનજીવન અસ્તવ્યસ્ત

તાપી જિલ્લામાં ભારે વરસાદના પગલે 38 આંતરિક રસ્તાઓ પાણીમાં ગરકાવ થઈ ગયા છે, જેના કારણે અનેક વિસ્તારોમાં વાહનવ્યવહાર પ્રભાવિત થયો છે. વ્યારા તાલુકાના 9, ડોલવણના 12 અને વાલોડના 15 ગામોનો સંપર્ક તૂટી ગયો છે, જ્યારે સોનગઢ તાલુકાના 2 રસ્તાઓ પર પણ પાણી ફરી વળ્યાં છે. અનેક કોઝવે પાણીમાં ડૂબી જતાં સ્થાનિક લોકોને અવરજવરમાં ભારે મુશ્કેલીનો સામનો કરવો પડી રહ્યો છે, જ્યારે તંત્ર લોકોને બિનજરૂરી મુસાફરી ટાળવાની અપીલ કરી રહ્યું છે.

નવસારીમાં ભારે વરસાદ અને ત્રણ નદીઓની વધેલી જળસપાટીને કારણે પૂરની સ્થિતિ હજુ પણ યથાવત છે. શહેરના આશરે 15 જેટલા વિસ્તારો હજુ પણ પાણીમાં ગરકાવ હોવાથી જનજીવન પર ગંભીર અસર પડી છે. પરિસ્થિતિને ધ્યાનમાં રાખીને 2 હજારથી વધુ લોકોને સુરક્ષિત સ્થળોએ સ્થળાંતર કરવામાં આવ્યા છે, જ્યારે તંત્ર દ્વારા સતત રાહત અને બચાવ કામગીરી હાથ ધરવામાં આવી રહી છે.

સુરતના ભરથાણા આઉટ ઓફ રિંગ રોડ વિસ્તારમાં વરસાદી પાણીના જોરદાર પ્રવાહમાં એક યુવક ત્રણ કલાકથી વધુ સમય સુધી ફસાઈ ગયો હતો. પાણીના પ્રવાહમાં તેની બાઈક અને બેગ તણાઈ ગયા હતા, જ્યારે યુવકે ફેન્સિંગના થાંભલાને પકડી રાખીને જીવ બચાવ્યો હતો. મોબાઇલની ફ્લેશલાઇટના આધારે તેની હાજરીની જાણ થતાં સેવાભાવી RD Group સેવા ટ્રસ્ટ ટ્રેક્ટર સાથે સ્થળે પહોંચ્યું અને દોરીની મદદથી સફળ રેસ્ક્યુ કરીને યુવકને સુરક્ષિત બહાર કાઢ્યો. યુવકે પોલીસ અને ફાયર વિભાગને ફોન કરવા છતાં સમયસર મદદ ન મળ્યાનો આક્ષેપ કર્યો હતો અને પોતાનો જીવ બચાવવા બદલ RD Group સેવા ટ્રસ્ટનો આભાર વ્યક્ત કર્યો.

સુરતમાં માત્ર 12 કલાકમાં સરેરાશ 14 ઈંચ વરસાદ વરસતાં સમગ્ર શહેર બેહાલ બની ગયું છે. ભારે વરસાદને કારણે સર્જાયેલી વિવિધ દુર્ઘટનાઓમાં 9 લોકોએ જીવ ગુમાવ્યો છે. સરથાણા વિસ્તારમાં સૌથી વધુ 18.9 ઈંચ વરસાદ નોંધાયો, જ્યારે વરાછામાં 18.4 ઈંચ અને લિંબાયતમાં 16.9 ઈંચ વરસાદ ખાબક્યો. શહેરમાંથી પસાર થતી પાંચમાંથી ચાર ખાડીઓ ઓવરફ્લો થતાં અનેક વિસ્તારોમાં પાણી ભરાઈ ગયા છે. દુકાનો અને ઘરોમાં પાણી ઘૂસી જતાં લોકોને ભારે આર્થિક નુકસાન વેઠવાનો વારો આવ્યો છે.

ભાવનગર જિલ્લાના મહુવા તાલુકાના બાંભણિયા ગામમાં દીપડાએ 10 વર્ષના માસૂમ બાળક પર જીવલેણ હુમલો કરી તેનું મોત નિપજાવ્યું છે. ઘટનાથી સમગ્ર વિસ્તારમાં ભયનો માહોલ છવાઈ ગયો છે. મહુવા વિસ્તારમાં છેલ્લા બે મહિનામાં વન્ય પ્રાણીના હુમલાની આ ત્રીજી ઘટના છે. અગાઉ પણ દીપડાના હુમલામાં પાંચ વર્ષની બાળકી અને એક વ્યક્તિનું મોત થયું હતું, જેના કારણે સ્થાનિકોમાં વન વિભાગ સામે રોષ જોવા મળી રહ્યો છે.

હવામાન વિભાગે આજે દક્ષિણ ગુજરાત અને સૌરાષ્ટ્રના અનેક વિસ્તારોમાં ભારે વરસાદની આગાહી કરી છે. નવસારી અને ડાંગ જિલ્લામાં ઓરેન્જ એલર્ટ જાહેર કરવામાં આવ્યું છે, જ્યારે ભાવનગર, ભરૂચ, છોટાઉદેપુર, દાહોદ, સુરત, તાપી અને અમરેલી જિલ્લામાં યલો એલર્ટ આપવામાં આવ્યું છે. અમદાવાદમાં પણ વીજળીના કડાકા-ભડાકા સાથે વરસાદ વરસવાની શક્યતા વ્યક્ત કરવામાં આવી છે. સાથે જ 40થી 50 કિમી પ્રતિ કલાકની ઝડપે પવન ફૂંકાઈ શકે તેવી આગાહી હોવાથી લોકોને સાવચેતી રાખવા સૂચના આપવામાં આવી છે.