07 જુલાઈના મહત્વના સમાચાર : સુરતમાં ભારે વરસાદની આગાહીને પગલે શિક્ષણ વિભાગનો નિર્ણય, શહેર-જિલ્લાની શાળા-કોલેજોમાં જાહેર કરવામાં આવી રજા

ભરૂચ જિલ્લાના અંકલેશ્વરમાં છેલ્લા 24 કલાકમાં પડેલા આશરે 2 ઇંચ વરસાદથી જનજીવન પ્રભાવિત બન્યું છે. નવાગામ અને કરાવેલ ગામને જોડતા માર્ગ પર બ્રિજની કામગીરી દરમિયાન બનાવવામાં આવેલ ડાયવર્ઝન વરસાદી પાણીમાં ધોવાઈ જતાં વાહનવ્યવહાર ખોરવાયો છે. તંત્રની ધીમી કામગીરીને કારણે ચાર ગામોના લોકોને આશરે 15 કિલોમીટરનો લાંબો ફેરો કરીને અવરજવર કરવાની ફરજ પડી રહી છે, જેના કારણે સ્થાનિકોમાં ભારે રોષ જોવા મળી રહ્યો છે.

વર્ષ 2008ના અમદાવાદ સિરિયલ બ્લાસ્ટ કેસમાં આજે ગુજરાત હાઇકોર્ટ મહત્વપૂર્ણ ચુકાદો સંભળાવશે. સવારે 11 વાગ્યે હાઇકોર્ટ 38 દોષિતોને નીચલી અદાલતે ફટકારેલી ફાંસીની સજા અને અન્ય 11 દોષિતોની આજીવન કેદ અંગે નિર્ણય આપશે. કેસની ગંભીરતાને ધ્યાનમાં રાખીને હાઇકોર્ટે સ્પેશિયલ બેન્ચની રચના કરી હતી અને માર્ચ 2025થી ડે-ટુ-ડે ધોરણે નિયમિત સુનાવણી હાથ ધરી હતી. નોંધનીય છે કે કાયદાકીય જોગવાઈ મુજબ નીચલી અદાલત દ્વારા અપાયેલી ફાંસીની સજા હાઇકોર્ટની મંજૂરી બાદ જ અમલમાં આવી શકે છે.

વડોદરામાં મોડી રાતે મેઘરાજાએ ધુંઆધાર બેટિંગ કરતાં શહેરભરમાં સાર્વત્રિક ધોધમાર વરસાદ વરસ્યો હતો. ભારે વરસાદના કારણે શહેરના અનેક વિસ્તારો જળબંબાકાર બન્યા હતા, જ્યારે નીચાણવાળા વિસ્તારોમાં વરસાદી પાણી ભરાઈ જતાં લોકોને અવરજવરમાં મુશ્કેલીનો સામનો કરવો પડ્યો હતો. વરસાદને પગલે શહેરના મુખ્ય માર્ગો પર પણ પાણી ફરી વળતાં જનજીવન પર અસર જોવા મળી હતી.

અમરેલી જિલ્લાના લાઠી, દામનગર અને લીલીયા પંથકમાં ધોધમાર વરસાદને કારણે જનજીવન પ્રભાવિત થયું છે. લીલીયા તાલુકાના ખારા અને ગુંદરણ ગામમાં પૂર જેવી સ્થિતિ સર્જાતા NDRFની ટીમ રાહત અને બચાવ કામગીરીમાં જોડાઈ હતી. ખારા ગામમાંથી 40 લોકોને અને ગુંદરણ ગામમાંથી 20 લોકોને સુરક્ષિત રીતે રેસ્ક્યૂ કરીને સલામત સ્થળે ખસેડવામાં આવ્યા

જૂનાગઢ જિલ્લાના માળીયાહાટીના તાલુકાના પાણકવા ગામે એક વાડીના મકાનમાં દીપડો ઘૂસી જતાં ગ્રામજનોમાં ભારે અફરાતફરી મચી હતી. જાણ થતાં વન વિભાગની ટીમે સ્થળ પર પહોંચી ભારે જહેમત બાદ દીપડાને બેભાન કરીને સફળતાપૂર્વક રેસ્ક્યૂ કર્યું હતું. બાદમાં દીપડાને સારવાર અને નિરીક્ષણ માટે ‘સીમાર એનિમલ કેર સેન્ટર’ ખાતે ખસેડવામાં આવ્યો હતો. દીપડો પકડાઈ જતાં ગામલોકોએ રાહતનો શ્વાસ લીધો હતો.

ભાવનગર જિલ્લાના મહુવામાં આખો દિવસ સૂકું વાતાવરણ રહ્યા બાદ મધરાતે અચાનક કડાકા-ભડાકા અને ભારે પવન સાથે મુશળધાર વરસાદ શરૂ થયો હતો. સ્વામિનારાયણ ધામ, કોલેજ રોડ, ગાર્ડન રોડ, કુબેર બાગ, ગાંધીબાગ સહિત શહેરના અનેક વિસ્તારોમાં ધોધમાર વરસાદ વરસતા રસ્તાઓ પર વરસાદી પાણી વહેવા લાગ્યા અને સમગ્ર શહેરમાં વરસાદી માહોલ છવાઈ ગયો.

દક્ષિણ ગુજરાતમાં ભારે વરસાદની હવામાન વિભાગની આગાહીને ધ્યાનમાં રાખીને સુરત શહેર અને જિલ્લામાં આવેલી તમામ શાળા-કોલેજોમાં રજા જાહેર કરવામાં આવી છે. વિદ્યાર્થીઓની સલામતી અને હિતને પ્રાથમિકતા આપતાં શિક્ષણ વિભાગે આ મહત્વપૂર્ણ નિર્ણય લીધો છે. ભારે વરસાદને કારણે સર્જાઈ શકે તેવી પરિસ્થિતિને ધ્યાનમાં રાખીને વાલીઓ અને વિદ્યાર્થીઓને પણ જરૂરી સાવચેતી રાખવા અપીલ કરવામાં આવી છે.