06 જુલાઈના મહત્વના સમાચાર : અમરેલીના લીલીયામાં વરસાદી કહેર, શેત્રુંજીના પાણી વચ્ચે 9 લોકો ફસાયા

મહારાષ્ટ્રના અનેક જિલ્લાઓમાં ધોધમાર વરસાદથી જનજીવન પર ભારે અસર જોવા મળી રહી છે. મુંબઈ સાથે જોડાયેલા વસઈ-વિરાર વિસ્તારમાં ભારે પવન સાથે વરસેલા વરસાદે જળબંબાકારની સ્થિતિ સર્જી છે. લિંક રોડ અને સ્ટેશન રોડ સહિતના વિસ્તારોમાં પાણી ફરી વળતાં રસ્તાઓ પાણીમાં ગરકાવ થઈ ગયા છે. અનેક માર્ગો પર પાણી ભરાતા વાહનચાલકોને ભારે હાલાકીનો સામનો કરવો પડી રહ્યો છે. હવામાન વિભાગે આગામી કલાકોમાં વધુ ભારે વરસાદની શક્યતાને પગલે એલર્ટ જાહેર કર્યું છે અને નાગરિકોને સાવચેતી રાખવા અપીલ કરવામાં આવી છે.

પુણેમાં ધોધમાર વરસાદને કારણે જનજીવન અસ્તવ્યસ્ત બન્યું છે. નીચાણવાળા વિસ્તારોમાં જળબંબાકારની સ્થિતિ સર્જાઈ છે, જ્યારે પૌડ રોડ પર રસ્તાઓ નદીમાં ફેરવાઈ ગયા હોય તેવા દ્રશ્યો જોવા મળી રહ્યા છે. ભારે પવન સાથે વરસેલા વરસાદથી એક જ દિવસમાં 100થી વધુ વૃક્ષો ધરાશાયી થયા છે. હવામાન વિભાગે આજે અતિભારે વરસાદની આગાહીને પગલે રેડ એલર્ટ જાહેર કર્યું છે, જેના પગલે સાવચેતીના ભાગરૂપે શાળા-કોલેજોમાં રજા જાહેર કરવામાં આવી છે.

અમરેલી જિલ્લાના લીલીયા તાલુકામાં પડેલા મુશળધાર વરસાદથી બવાડી ગામની સીમમાં શેત્રુંજી નદીના પાણી ખેતરોમાં ફરી વળતાં પરપ્રાંતિય પરિવારના 9 લોકો ફસાઈ ગયા હતા. જીવ બચાવવા પરિવાર ખેતરમાં આવેલી ઓરડીની છત પર આશરો લેવા મજબૂર બન્યો હતો. ઘટનાની જાણ થતાં મામલતદાર, TDO અને ફાયર વિભાગની ટીમે રેસ્ક્યૂ કામગીરી શરૂ કરી હતી, પરંતુ નદીમાં સતત વધી રહેલા પાણીના પ્રવાહને કારણે બચાવ કામગીરીમાં ભારે મુશ્કેલીઓનો સામનો કરવો પડી રહ્યો છે.

મુંબઈ સહિત મહારાષ્ટ્રના અનેક વિસ્તારોમાં ભારે વરસાદની આગાહીને પગલે હવામાન વિભાગે રેડ એલર્ટ જાહેર કર્યું છે. સ્થિતિને ધ્યાનમાં રાખીને મુંબઈ, પુણે, થાણે અને પાલઘરમાં આજે તમામ શાળા-કોલેજો બંધ રાખવાનો નિર્ણય લેવામાં આવ્યો છે. સાથે જ શાળા-કોલેજોમાં યોજાનારી પરીક્ષાઓ પણ રદ કરવામાં આવી છે. સ્થાનિક તંત્રએ નાગરિકોને બિનજરૂરી બહાર ન નીકળવા અને સાવચેતી રાખવા અપીલ કરી છે.