05 જુલાઈના મહત્વના સમાચાર : વીજળીના કડાકા-ભડાકા વચ્ચે મધ્યરાત્રીએ વરસેલા વરસાદથી અમદાવાદમાં વૃક્ષો ધરાશાયી

અમદાવાદ શહેરમાં ગત મોડી રાત્રે વીજળીના કડાકા-ભડાકા સાથે વરસેલા વરસાદથી કેટલાક સ્થળે વૃક્ષ ધરાશાયી થવાના બનાવ બન્યા હતા. અમદાવાદ ફાયર બ્રિગેડ સમક્ષ મોડી રાત્રે ઝાડ પડી ગયાની ફરિયાદ આવી હતી. જે અનુસાર, ગત્ત મોડી રાત્રે વરસાદથી અમદાવાદના ગોતા, પ્રગતિનગર, અરવિંદ મીલ પાસે ઝાડ પડવાના બનાવ બન્યો હતો. જો કે, આ ઘટનામાંકોઈ જાનહાની સર્જાઇ નથી.

ગીર સોમનાથ જિલ્લાના ગીર ગઢડાના કરેણી ગામમાં અનેક ઘરમાં પાણી ઘૂસ્યા. મોડી રાત્રીના ભારે વરસાદને લીધે ભરાયા પાણી. ખેતર અને ઉપરવાસના પાણી ઘરમાં ઘૂસ્યા. ગામના યુવાનો દ્વારા લોકોની ઘરવખરી બચાવવા કરાઈ કામગીરી.

અમરેલીમાં રાજુલા જાફરાબાદ ખાંભા પંથકમાં મુશળધાર વરસાદ વરસ્યો હતો. રાજુલા ધાતરવડી ડેમ 2 ઓવરફ્લો થયો હતો. ઓવરફ્લો થતા 6 દરવાજા ખોલાયા છે. નીચાણ વાળા 8થી વધુ ગામડાને એલર્ટ આપ્યું છે. ખાખબાઈ, હિંડોરણા, વડ, ભચાદર, કોવાયા, લોઠપૂર, ઉચેયા સહીત ગ્રામજનોને સાવચેત રહેવા સૂચના મળી છે. ખાંભા રાયડી ડેમ ઓવરફ્લો થતા નદી કાંઠે આવતા નાગેશ્રી ચૌત્રા બારમણ સહીત ગામડાને એલર્ટ રહેવા સૂચના આપવામાં આવી છે. રાજુલા ધાતરવડી ડેમ (1) 70% ઉપરાંત ભરાયો છે.

આજે 5 જુલાઈને રવિવારના રોજ સવારના 6 વાગ્યાથી આઠ વાગ્યા સુધીના બે કલાકમાં 49 તાલુકામાં વરસાદ નોંધાયો છે. જેમાં સૌથી વઘુ વરસાદ અમરેલીના રાજૂલામાં 2 ઈંચથી પણ વધુ વરસાદ વરસ્યો છે. ભાવનગરના મહુવામાં દોઢ ઈંચ જેટલો વરસાદ નોંધાયો છે. અમરેલી, ભાવનગર, રાજકોટ, ગીર સોમનાથ, અમદાવાદ, જામનગર, સુરેન્દ્રનગર, બોટાદ, મોરબી, બનાસકાંઠા, ભરૂચ જિલ્લાના 49 તાલુકામાં વરસાદ નોંધાયો છે.

ગીર સોમનાથના ઉનાના ગાંગડા ગામે ફાયર વિભાગ દ્વારા લોકોનું સ્થળાંતર કરવામાં આવ્યુ હતું. મોડી રાત્રે માલણ નદીએ રૌદ્ર સ્વરૂપ ધારણ કરતા લોકોનું સ્થળાંતર કરાવવાની ફરજ પડી હતી. માલણ નદીના પાણી ગામમાં ઘૂસ્યા હતા. જે બાદ ઉના ફાયર વિભાગે મોડી રાત્રે નીચાણવાળા વિસ્તારના અનેક લોકોના સ્થળાંતરીત કર્યા હતા.

અમરેલીના સાવરકુંડલા પંથકના કેરાણા-હાવડ કોઝવે પર પાણીમા ઈકો કાર સહિત 7 વ્યક્તિઓ ફસાયા હતા. મધરાતે અમરેલી ફાયર બ્રિગેડની ટીમને મેસેજ મળતા તાત્કાલિક ઘટનાસ્થળે પહોંચી હતી. ધસમસતા પાણી વચ્ચે લગભગ 3 કલાકની ભારે જહેમત બાદ તમામ 7 વ્યક્તિઓનું સફળ રેસ્ક્યુ કરાયુ. ફાયર ઓફિસરની ટીમ દ્વારા રેસ્ક્યુ ઓપરેશન કર્યું. ફાયર બ્રિગેડની સમયસૂચકતાના કારણે સંભવિત મોટી જાનહાનિ ટળી.

શનિવાર સવારના 6 વાગ્યાથી રવિવાર સવારના 6 વાગ્યા સુધીના વિતેલા 24 કલાકમાં રાજ્યના 196 તાલુકામાં વરસાદ વરસ્યો છે. સૌથી વધુ વરસાદ અમરેલીના ખાંભામાં 8 ઈંચ વરસાદ નોંધાયો છે.