27 સપ્ટેમ્બરના મહત્વના સમાચાર : રાજ્યમાં રવિવારે સર્જાઈ અકસ્માતોની વણઝાર, ગોંડલમાં કાર અકસ્માતમાં 3ના મોત, તો વાવ-થરાદમાં અકસ્માતમાં 2ના મોત, તો જસદણમાં બે બાઇક વચ્ચે ભીષણ ટક્કર

ગાંધીનગર: ફોર્મ પરત ખેંચવાનાં ડરે કોંગ્રેસે ઉમેદવારોને સુરક્ષિત સ્થળે ખસેડ્યા

કોળી સમાજ હવે એપ થકી વધુ મજબૂત બનશે

અંકલેશ્વરના પાનોલીના ટેકરા ફળીયામાંથી ગૌમાંસ ઝડપાયું

ભરૂચના અંકલેશ્વરના પાનોલીના ટેકરા ફળિયામાં ગૌવંશની કતલનો પર્દાફાશ થયો છે. પોલીસે દરોડો પાડી 510 કિલો ગૌમાંસ કબજે કર્યું હતું. સ્થળ પરથી એક બળદ અને એક ગાયને પણ બચાવી લેવામાં આવ્યા હતા. પોલીસે કતલ માટે ઉપયોગમાં લેવાતા સાધનો, છરા, છરીઓ અને ઇલેક્ટ્રિક વજનકાંટો સહિતનો મુદ્દામાલ કબજે કર્યો છે. સમગ્ર કાર્યવાહી દરમિયાન પોલીસે પાંચ આરોપીઓને ઝડપી પાડ્યા હતા. આરોપીઓ વિરુદ્ધ કાયદેસરની કાર્યવાહી હાથ ધરવામાં આવી છે. પોલીસ દ્વારા સમગ્ર મામલે વધુ તપાસ કરવામાં આવી રહી છે અને ગૌવંશની કતલ સાથે સંકળાયેલા અન્ય લોકોની ભૂમિકા અંગે પણ તપાસ શરૂ કરવામાં આવી છે. ઘટનાને પગલે વિસ્તારમાં પોલીસ બંદોબસ્ત ગોઠવવામાં આવ્યો છે.

સુરત: મોબાઈલ સ્નેચિંગ કરનારો આરોપી ઝડપાયો

સુરતમાં મોબાઈલ સ્નેચિંગ કરનાર આરોપીને લોકોએ પકડી પાડ્યો છે. ડિંડોલી-ભેસ્તાન રોડ પર રાહદારીના હાથમાંથી મોબાઈલ ફોન છીનવી આરોપી ફરાર થયો હતો. મોબાઈલ છીનવીને ભાગેલા આરોપીને જોઈ સ્થાનિક લોકોએ તેનો પીછો કર્યો હતો. લોકોએ લગભગ 500 મીટર સુધી આરોપીનો પીછો કરી તેને ઝડપી પાડ્યો હતો. ત્યારબાદ આરોપી પાસેથી ચોરીનો મોબાઈલ ફોન પણ કબજે કર્યો હતો. સમગ્ર ઘટનાની જાણ ડિંડોલી પોલીસને કરવામાં આવતા પોલીસની ટીમ તાત્કાલિક સ્થળ પર દોડી આવી હતી. પોલીસે આરોપીની અટકાયત કરી વધુ કાર્યવાહી હાથ ધરી છે. ભરચક રસ્તા પર બનેલી આ ઘટનાને પગલે લોકોમાં પણ ચર્ચા જોવા મળી હતી. હાલમાં પોલીસ દ્વારા આરોપીની પૂછપરછ કરવામાં આવી રહી છે.

સતત વરસાદને કારણે બોટાદમાં કપાસને થયુ નુકસાન

બોટાદમાં વરસાદનું ઠંડુ પાણી પડવાથી ખેડૂતોના ખેતરોમાં નુકસાન થયું છે. ખાસ કરીને કપાસના પાકને ભારે નુકસાન થયું હોવાનું ખેડૂતો જણાવી રહ્યા છે. સતત અને વરસાદનું ઠંડુનું પાણી પડવાથી કપાસના છોડને નુકસાન પહોંચ્યું છે. ઉપરાંત ખેતરોમાં રહેલો પાક સડી જવાની સ્થિતિ સર્જાઈ છે. ખેડૂતોના જણાવ્યા પ્રમાણે, કપાસના પાક પાછળ બિયારણ, ખાતર, જંતુનાશક દવાઓ, મજૂરી તેમજ અન્ય ખેતી ખર્ચ મળીને મોટી રકમ ખર્ચવામાં આવી હતી. પરંતુ પાક તૈયાર થવાના તબક્કામાં જ વરસાદનું ઠંડુ પાણી પડવાથી ખેડૂતોની મહેનત પર પાણી ફરી ગયું છે.

સુરત : ડુમસ બીચ પર દરિયામાં નહાવા પડેલા બે યુવાનો ડૂબ્યા

સુરતના ડુમસ બીચ પર મોટી દુર્ઘટના સામે આવી છે. ગણેશ મંદિર પાછળ દરિયામાં નહાવા પડેલા બે યુવાનો અચાનક ઊંડા પાણીમાં ગરકાવ થઈ ગયા હતા. મળતી માહિતી મુજબ, ઉધનાથી ચાર મિત્રો ડુમસ બીચ પર ફરવા આવ્યા હતા. આ દરમિયાન બે મિત્રો દરિયામાં નહાવા ગયા હતા અને અચાનક ઊંડા પાણીમાં ડૂબી ગયા હતા. ઘટનાને પગલે સ્થાનિક લોકો બંને યુવાનોને બચાવવા માટે દોડી આવ્યા હતા, પરંતુ બંનેની કોઈ ભાળ મળી નહોતી. ઘટનાની જાણ થતાં ફાયર વિભાગની ટીમ તાત્કાલિક સ્થળ પર પહોંચી હતી અને દરિયામાં બંને યુવાનોની શોધખોળ હાથ ધરી છે. ફાયર ટીમ દ્વારા રેસ્ક્યૂ ઓપરેશન ચલાવવામાં આવી રહ્યું છે.

જામનગર: બ્રાસ ઉદ્યોગો આવતીકાલે સોમવારે બંધ રહેશે

જામનગરમાં GSTની નોટિસ અને જટિલ કાયદાના વિરોધમાં બ્રાસ ઉદ્યોગો આવતીકાલે બંધ રહેશે. ફેક્ટરી ઓનર્સ એસોસિએશન, ચેમ્બર અને પ્લોટ હોલ્ડર્સ દ્વારા બંધનું આહ્વાન કરવામાં આવ્યું છે. શહેરના શંકરટેકરી, ફેઝ-2, ફેઝ-3 સહિતના વિસ્તારોમાં 4,500થી વધુ બ્રાસ એકમો બંધમાં જોડાશે. ઉદ્યોગકારોના જણાવ્યા મુજબ GST સંબંધિત નોટિસો અને જટિલ કાયદાઓને કારણે વેપારીઓમાં રોષ છે. આવતીકાલે સવારે ફેક્ટરી ઓનર્સ એસોસિએશન ખાતેથી મૌન બાઈક રેલી યોજાશે. ત્યારબાદ ઉદ્યોગકારો દ્વારા કલેક્ટરને આવેદનપત્ર આપવામાં આવશે અને GSTના નિયમોમાં સુધારા કરવાની રજૂઆત કરાશે. બ્રાસ ઉદ્યોગ સાથે સંકળાયેલા સંગઠનો દ્વારા સરકાર સમક્ષ પોતાની માંગણીઓ રજૂ કરવા માટે આ કાર્યક્રમનું આયોજન કરવામાં આવ્યું છે.

અમદાવાદ: LCB ની ટીમે કાદર ઉર્ફે ઘુવડ મિયાણાની કરી ધરપકડ

અમદાવાદ LCBની ટીમે કાદર ઉર્ફે ઘુવડ મિયાણા નામના શખ્સની ધરપકડ કરી છે. પકડાયેલો શખ્સ મૂળ જામનગરનો વતની છે અને તે રાજસ્થાનથી એમડી ડ્રગ્સ લાવી દ્વારકામાં સપ્લાય કરતો. જેની માહિતી મળતા પોલીસે વિશાલા પાસેથી આરોપીની ધરપકડ કરી. પકડાયેલા શખ્સ પાસેથી 339 ગ્રામ એમડી ડ્રગ્સ, મોબાઈલ અને ગાડી સહિત કુલ 15.61 લાખનો મુદ્દામાલ કબ્જે કર્યો.

ડ્રગ્સની ડિલેવરી કરનારા આરોપી કાદરની તપાસમાં સામે આવ્યું કે, ડ્રગ્સનો જથ્થો રાજસ્થાનના બાસવાડાથી ફૈઝલખાન નામના ડ્રગ્સ ડીલર પાસેથી લાવ્યો હતો અને તે જથ્થો દ્વારકાના ફકીરા ઉર્ફે છાપી નામના સપ્લાયરને આપવાનો હતો. જે બાદ ફકીરા ડ્રગ્સના જથ્થાનું છુટક વેચાણ અલગ-અલગ વિસ્તારમાં કરતી હોવાનુ સામે આવ્યું છે. જેથી તેની સાથે સંકળાયેલા તમામ આરોપીઓની ધરપકડ માટે કાર્યવાહી શરુ કરી.

નવસારી મનપાના અણઘડ વહીવટને કારણે વિકાસના કામો અદ્ધરતાલ

નવસારી મનપાના સત્તાધિશોના આયોજન વગરના કામોને લીધે મહાનગર પાલિકાના ટીપી મુજબનો વિકાસ રૂંધાયો છે. 1925થી અસ્તિત્વમાં આવેલી નવસારી પાલિકા 2016, 17માં અર્બન ડેવલોપમેન્ટ ઓથોરિટીનું સ્ટેટસ મળ્યું હતું. અને છેલ્લે મહાનગરપાલિકાના સુવ્યવસ્થિત વિકાસ માટે 2025માં મહાનગરપાલિકાનું માળખું મળ્યું. પહેલેથી ચાર ટીપી મહાનગરપાલિકાની અસ્તિત્વમાં હતી. ત્યારબાદ નવી ત્રણ ટીપી મંજૂરી માટે રાજ્ય સરકારમાં મોકલવામાં આવી. નવસારી મનપામાં કુલ સાત ટીપી મંજૂર થઈ છે. ટીપી એટલે સુવિધા સફર વિસ્તાર કે જ્યાં વસવાટ માટે શહેરનો એક નાનો કસબો વિકાસ પામ્યો હોય તેવું સુવિધાવાળું આયોજન કરવાનું હોય. પરંતુ મનપાના સત્તાધીશોની અણ આવડતે ભરડો લીધો છે. ટાઉન પ્લાનિંગના નિયમ મુજબ અને વિકાસ માટે વિવિધ યોજનાઓ રાજ્ય સરકાર દ્વારા મનપાને આપવામાં આવી રહી છે. ભંડોળ પણ ફાળવવામાં આવી રહ્યું છે પરંતુ મનપાની ટીપીઓ વિવિધ વિવાદોના કારણે વિકાસ પામી નથી.

જુનાગઢ: ગિરનાર પર સુવિધાના અભાવે પ્રવાસીઓ પરેશાન

જુનાગઢના ગિરનાર પર વિશ્વ પ્રવાસન દિવસ અને રજાના દિવસે પ્રવાસીઓનો ભારે ઘસારો જોવા મળ્યો હતો. રોપવેમાં પ્રવાસીઓની લાંબી લાઈનો લાગતા લોકોને રાહ જોવી પડી હતી. બીજી તરફ ગિરનાર પર શૌચાલયની પૂરતી સુવિધા ન હોવાથી પ્રવાસીઓને હાલાકીનો સામનો કરવો પડ્યો હતો. શૌચાલયની જગ્યાએ કચરાના ગંજ જોવા મળતા સ્વચ્છતા સામે પણ સવાલો ઉઠ્યા છે. ખાસ કરીને મહિલા પ્રવાસીઓને વધુ મુશ્કેલીનો સામનો કરવો પડી રહ્યો છે. પ્રવાસીઓએ વહેલી તકે શૌચાલયની સુવિધા શરૂ કરવાની માંગ કરી છે. ગિરનાર પર પાણીની સુવિધા ન હોવાની વાતને કલેક્ટરે પણ સ્વીકારી છે. પ્રવાસીઓની મોટી સંખ્યા વચ્ચે પાયાની સુવિધાઓના અભાવે તંત્રની કામગીરી સામે સવાલો ઉઠી રહ્યા છે.

નર્મદા : સાગબારા જંગલ જમીન વિવાદમાં સાંસદ મનસુખ વસાવાનું નિવેદન

નર્મદાના સાગબારામાં જંગલ જમીન વિવાદને લઈને સાંસદ મનસુખ વસાવાએ ફોરેસ્ટ વિભાગ સામે આક્ષેપો કર્યા છે. મનસુખ વસાવાએ જણાવ્યું કે દાવા અરજીની પ્રક્રિયામાં ખેડૂતોને ફોરેસ્ટ વિભાગ તરફથી જરૂરી મદદ મળતી નથી અને ખેડૂતોને ધમકાવવામાં આવતા હોવાનો પણ આક્ષેપ કર્યો. તેમણે કહ્યું કે મંત્રી અર્જુન મોઢવાડિયાને ત્યાંની સ્થિતિની સંપૂર્ણ જાણકારી નથી. ફોરેસ્ટર અને DFO દ્વારા થતા કથિત જુલમના વીડિયો જોઈ લેવા તેમણે જણાવ્યું હતું. મનસુખ વસાવાએ સ્પષ્ટ કર્યું કે તેઓ અર્જુનભાઈનું સન્માન કરે છે અને સરકાર વિરુદ્ધ નથી, કારણ કે તેઓ પણ સરકારનો ભાગ છે. જોકે, બે ધારી નીતિ સામે વાંધો હોવાનું જણાવ્યું. સાગબારાના લોકો સાથે અન્યાય થઈ રહ્યો હોવાનો દાવો કરી, ખેડૂતો ઉગ્ર આંદોલન કરશે તો તેમાં જોડાવાની પણ જાહેરાત કરી છે.

રાજકોટ : જસદણની ખાનપર ચોકડી નજીક બે બાઈક વચ્ચે અકસ્માત

રાજકોટના જસદણમાં ખાનપર ચોકડી નજીક બે બાઈક વચ્ચે અકસ્માતની ઘટના સામે આવી છે. બે બાઈક સામસામે અથડાતા એક બાઈકસવાર રોડ પર પટકાયો હતો. અકસ્માતમાં બાઈકસવારને માથાના ભાગે ગંભીર ઈજા પહોંચી હતી. ઘટનાને પગલે આસપાસના લોકો દોડી આવ્યા હતા અને ઈજાગ્રસ્તને તાત્કાલિક સારવાર માટે હોસ્પિટલ ખસેડવામાં આવ્યો હતો. સમગ્ર અકસ્માતની ઘટના નજીકના CCTV કેમેરામાં કેદ થઈ છે. CCTVમાં બે બાઈક સામસામે અથડાયા બાદ બાઈકસવાર રોડ પર પટકાતો જોવા મળે છે. ઘટનાની જાણ થતાં જસદણ પોલીસ પણ સ્થળ પર પહોંચી હતી અને અકસ્માત અંગે વધુ તપાસ હાથ ધરી છે. અકસ્માત કયા કારણોસર થયો તે અંગે પોલીસ દ્વારા તપાસ કરવામાં આવી રહી છે.

ગીર સોમનાથ : કોડીનારના સુગાળા ગામે નાળા નજીક મગર દેખાયો

ગીર સોમનાથના કોડીનારના સુગાળા ગામે નાળા નજીક મગર દેખાતા સ્થાનિકોમાં ભયનો માહોલ જોવા મળ્યો હતો. માનવ વસાહત નજીક મગર દેખાતા ગ્રામજનોએ તાત્કાલિક વન વિભાગને જાણ કરી હતી. ઘટનાની જાણ થતાં ઘાંટવડ વન વિભાગની ટીમ સ્થળ પર પહોંચી હતી. વન વિભાગની ટીમે તકેદારીપૂર્વક મગરનું રેસ્ક્યૂ ઓપરેશન હાથ ધર્યું હતું. ભારે જહેમત બાદ ટીમે મગરને સફળતાપૂર્વક રેસ્ક્યૂ કરી લીધો હતો. મગરનું રેસ્ક્યૂ થતાં સ્થાનિકોએ રાહતનો શ્વાસ લીધો હતો. માનવ વસાહત નજીક મગર દેખાતા કોઈ અનિચ્છનીય ઘટના ન બને તે માટે વન વિભાગની ટીમે સતર્કતા દાખવી હતી.

તાપી: મનસુખ વસાવાના આક્ષેપો પર અર્જુન મોઢવાડીયાની પ્રતિક્રિયા

રાજકોટ: દરબારગઢ જાળવણીના અભાવે જર્જરિત

રાજકોટ જિલ્લામાં ઐતિહાસિક સ્મારકની દુર્દશા સામે આવી. ધોરાજીમાં ગોંડલ સ્ટેટના રાજા સર ભગવતસિંહજીના જન્મસ્થળ તરીકે ઓળખાતો ઐતિહાસિક દરબારગઢ આજે જર્જરિત હાલતમાં જોવા મળી રહ્યો છે. એક સમયે આ દરબારગઢ ધોરાજીની ઐતિહાસિક ઓળખ અને પ્રવાસન સ્થળ તરીકે જાણીતો હતો પરંતુ જાળવણીના અભાવે હવે ઐતિહાસિક મહેલ ખંડેરમાં ફેરવાઈ રહ્યો છે..સ્થાનિકોનો આક્ષેપ છે કે દરબારગઢને સરકારે રક્ષિત સ્મારક જાહેર કર્યું હોવા છતાં તેની યોગ્ય કાળજી લેવામાં નથી આવી. સમયસર ઐતિહાસિક વારસાનું રિનોવેશન નહીં થાય તો ગોંડલ સ્ટેટના રાજવીઓ દ્વારા ધોરાજીને મળેલો અમૂલ્ય વારસો નામશેષ થવાની ભીતિ

ગાંધીનગર: GMC ચૂંટણીને લઈ કોંગ્રેસે પૂર પહેલા પાળ બાંધી

ગાંધીનગર મ્યુનિસિપલ કોર્પોરેશનની ચૂંટણીને લઈ કોંગ્રેસે સાવચેતીના પગલાં ભર્યા છે. ઉમેદવારો ફોર્મ પરત ખેંચી લે તેવી શક્યતાને ધ્યાનમાં રાખીને કોંગ્રેસે પોતાના ઉમેદવારોને સુરક્ષિત સ્થળે ખસેડ્યા છે. અગાઉની સ્થાનિક સ્વરાજ્યની ચૂંટણીમાં કોંગ્રેસના કેટલાક ઉમેદવારોએ ફોર્મ પરત ખેંચ્યા હોવાના અનુભવને પગલે આ નિર્ણય લેવાયો છે. ઉમેદવારોની સુરક્ષાની જવાબદારી વોર્ડના સિનિયર નેતાઓને સોંપવામાં આવી છે. ફોર્મ ચકાસણી દરમિયાન દરેક ઉમેદવાર સાથે સિનિયર નેતા અને વકીલ હાજર રહેશે. કોંગ્રેસના જણાવ્યા અનુસાર, ફોર્મ પરત ખેંચવાના અંતિમ દિવસે સાંજથી ઉમેદવારો ચૂંટણી પ્રચાર શરૂ કરશે. ચૂંટણી પ્રક્રિયા દરમિયાન ઉમેદવારો પર કોઈ પ્રકારનું દબાણ ન આવે તે માટે પક્ષ દ્વારા આ વ્યવસ્થા કરવામાં આવી છે.

મહેસાણા : મેકડોનાલ્ડ્સના કોલ્ડ્રિંક્સમાંથી જીવડું નીકળ્યું

મહેસાણામાં મેકડોનાલ્ડ્સમાંથી લીધેલા કોલ્ડ્રિંકમાં જીવડું નીકળ્યું હોવાનો દાવો કરતા ગ્રાહકોએ હોબાળો કર્યો હતો. બે મિત્રો બર્ગર અને કોક લેવા મેકડોનાલ્ડ્સ પહોંચ્યા હતા. કોક પીધા બાદ ગ્લાસમાં જીવડું જોવા મળ્યું હોવાનો યુવાનોનો દાવો છે. આ અંગે તેમણે તાત્કાલિક સ્ટાફને ફરિયાદ કરી હતી. જોકે, સ્ટાફ દ્વારા જીવડું બહારથી ઉડીને આવ્યું હોવાનું કહી ભૂલ નકારી હોવાનો ગ્રાહકોનો આક્ષેપ છે. ફરિયાદ કર્યા બાદ પણ યોગ્ય ઉકેલ ન મળ્યો હોવાનો યુવાનોએ આરોપ લગાવ્યો છે. સમગ્ર ઘટનાનો વીડિયો પણ બનાવવામાં આવ્યો છે, જે સોશિયલ મીડિયા પર વાયરલ થયો છે. ઘટનાને લઈને ફૂડ સેફ્ટી અને સ્વચ્છતાને લઈ સવાલો ઉઠ્યા છે.

અમદાવાદ: સાયબર ક્રાઇમ અંગે CBIની મોટી કાર્યવાહી

સાયબર ક્રાઇમ સામે CBIએ મોટી કાર્યવાહી હાથ ધરી છે. ઓપરેશન ચક્ર-VI હેઠળ CBIએ 10 રાજ્યોમાં 22 સ્થળોએ દરોડા પાડ્યા હતા. રૂ.11.42 કરોડના ડિજિટલ અરેસ્ટ કેસમાં હિમાંશુ પ્રસાદ અને યુનિસ બિસ્વાસ નામના બે આરોપીની ધરપકડ કરવામાં આવી છે. તપાસમાં સામે આવ્યું છે કે આરોપીઓએ હેક્સાક્વેસ્ટ ગ્લોબલના ખાતામાં રૂ.2.5 કરોડ મેળવ્યા હતા. TRAIના અધિકારી તરીકે ઓળખ આપીને પીડિતને ત્રણ મહિના સુધી ડિજિટલ અરેસ્ટ રાખી છેતરપિંડી કરાઈ હતી. CBIએ દરોડા દરમિયાન બેંકના દસ્તાવેજો, ડિજિટલ ડિવાઈસ અને અન્ય મહત્વના પુરાવા જપ્ત કર્યા છે. છેલ્લા 30 દિવસમાં દેશના 22 રાજ્યોમાં 142 સ્થળોએ સર્ચ ઓપરેશન હાથ ધરાયું છે, જેમાં કુલ 17 આરોપીઓની ધરપકડ કરાઈ છે.

અમદાવાદ યુનિવર્સિટી પાસ સિસ્ટમ પર નાયબ મુખ્યમંત્રી હર્ષ સંઘવીએ આપ્યું નિવેદન

અમદાવાદમાં યુનિવર્સિટી ગ્રાઉન્ડ ખાતે નવરાત્રિમાં પ્રવેશ માટે પાસ સિસ્ટમ અંગે ચાલી રહેલા વિવાદ વચ્ચે નાયબ મુખ્યમંત્રી હર્ષ સંઘવીએ સ્પષ્ટતા કરી છે. હર્ષ સંઘવીએ જણાવ્યું કે, પાસ નહીં પરંતુ ટોકનની વ્યવસ્થા કરવામાં આવી છે. માત્ર 100થી 200 રૂપિયાના નજીવા દરે ટોકન ઉપલબ્ધ કરાવવામાં આવશે. સામાન્ય અને મધ્યમ વર્ગને સારી સુવિધા મળે તે હેતુથી આ આયોજન કરાયું હોવાનું તેમણે જણાવ્યું. ઓનલાઈન ટોકન લઈને સીધી એન્ટ્રી મેળવી શકાય તેવી વ્યવસ્થા પણ કરવામાં આવશે. સમગ્ર મામલે કોંગ્રેસને પૂરતી માહિતી આપવામાં આવશે તેમ હર્ષ સંઘવીએ જણાવ્યું છે. બીજી તરફ કોંગ્રેસે નવરાત્રિ જેવા આસ્થાના પર્વના વ્યાપારીકરણનો આક્ષેપ કરી ટોકન વ્યવસ્થાનો વિરોધ કર્યો છે.

રાજકોટ : જસદણમાં શાળાની હોસ્ટેલમાં વિદ્યાર્થીનો આપઘાત

રાજકોટના જસદણમાં આંબરડીની જીવન શાળાની હોસ્ટેલમાં ધોરણ 11ના વિદ્યાર્થીએ ગળેફાંસો ખાઈ આપઘાત કરી લીધો હોવાની ઘટના સામે આવી છે. મૃતક વિદ્યાર્થી ચોટીલા તાલુકાના રાજપરા ગામનો હોવાનું સામે આવ્યું છે. હોસ્ટેલમાં વિદ્યાર્થીના આપઘાતની જાણ થતાં શાળા સંચાલકો અને અન્ય વિદ્યાર્થીઓમાં ચકચાર મચી હતી. ઘટનાની જાણ પોલીસને કરવામાં આવતા જસદણ પોલીસની ટીમ ઘટનાસ્થળે પહોંચી હતી અને મૃતદેહને પોસ્ટમોર્ટમ માટે મોકલી વધુ તપાસ હાથ ધરી છે. વિદ્યાર્થીએ કયા કારણોસર આ પગલું ભર્યું તે અંગે હાલ કોઈ સ્પષ્ટ માહિતી સામે આવી નથી. પોલીસે સમગ્ર મામલે તપાસ તેજ કરી છે અને આપઘાત પાછળના કારણો જાણવા કાર્યવાહી હાથ ધરી છે.

રાજકોટ સિવિલ હોસ્પિટલ ફરી વિવાદોમાં આવી છે, દર્દીઓને અપાતા ભોજનમાં નીકળી જીવાંત

રાજકોટ સિવિલ હોસ્પિટલ ફરી વિવાદોમાં ! ભોજનમાં જીવાં જોવા મળી. દર્દીઓને હોસ્પિટલમાંથી અપાય છે જમવાનું. જો કે જમવામાં જીવાત નીકળતા અનેક સવાલો ઊભા થયા. સમગ્ર ઘટનાનો વીડિયો થયો વાયરલ. અગાઉ પણ સિવિલ હોસ્પિટલ આવી ચૂકી છે વિવાદમાં.

ગોંડલના ધોધાવદર નજીક કાર અને બાઈક વચ્ચે અકસ્માત સર્જાયો, 3ના મોત

રાજકોટના ગોંડલમાં સર્જાયેલ કાર અકસ્માતમાં 3 લોકોના મોત થયા છે. સસરાના ઘરે જતાં ધોધાવદર નજીક અકસ્માત સર્જાયો હતો. કાર અને બાઈક વચ્ચે ગંભીર અકસ્માત સર્જાતા 3ના મોત થયા છે. એક જ પરિવારના 3 લોકોનું મૃત્યું થયું હોવાનું સામે આવ્યું. પરિવાર અનીડાગામથી રામોદ ખાતે સસરાના ઘરે જઈ રહ્યો હતો, દરમિયાન ધોધાવદર નજીક અકસ્માત સર્જાયો હતો. અકસ્માત એટલો ગંભીર હતો કે ત્રણેયના ઘટનાસ્થળે જ મોત નીપજ્યાં. પરિવારજનોમાં શોકનો માહોલ છે.

ખેડાના ડભાણ નજીક કેટલ ફીડ ફેક્ટરીના ગોડાઉનમાં આગ

ખેડાના ડભાણ નજીક કેટલ ફીડ ફેક્ટરીના ગોડાઉનમાં આગ લાગી હતી. વેસ્ટેજ મટીરિયલમાંથી તૈયાર કરાતો હતો પશુ આહાર. 4 કલાકની ભારે જહેમત બાદ આગ પર કાબૂ મેળવાયો છે.

કચ્છમાં સગીરા વિદ્યાર્થિની સાથે દુષ્કર્મ આચરીને ફરાર થઈ ગયેલ આચાર્ય મધ્ય ગુજરાતમાંથી ઝડપાયો

નીલપર શાળા દુષ્કર્મ કેસમાં પૂર્વ કચ્છ પોલીસની મોટી કાર્યવાહી.  કેસમાં ફરાર આચાર્ય આખરે પોલીસ પકડમાં આવ્યા છે. સગીરા વિદ્યાર્થિની સાથે દુષ્કર્મના આરોપી આચાર્યની ધરપકડ કરવામાં આવી છે. શાળાના આચાર્ય સામે દુષ્કર્મ અને POCSO હેઠળ ગુનો નોંધાયો હતો. રાપર પોલીસે આચાર્ય વિપુલ ભાનુભાઈ ગોહિલને સોજીત્રાથી ઝડપી પાડ્યો. ટેક્નિકલ એનાલિસિસ અને હ્યુમન સોર્સના આધારે આરોપી ઝડપાયો. આણંદના સોજીત્રા તાલુકાના દેવાતલપડ ગામેથી આરોપી ઝડપાયો. રાપર પોલીસ સ્ટેશનમાં BNS અને POCSOની વિવિધ કલમો હેઠળ ગુનો નોંધાયો. બોર્ડર રેન્જ IG ચિરાગ કોરડિયા અને પૂર્વ કચ્છ SP સાગર બાગમારની સૂચના બાદ કાર્યવાહી. DySP સાગર સાંબડાના માર્ગદર્શન હેઠળ રાપર પોલીસની કાર્યવાહી.

બાળકી પર હુમલો કર્યાની ઘટના બાદ, જૂનાગઢના દેડકયાળી ગામે બીજો દીપડો પણ પાંજરે પુરાયો

જૂનાગઢના દેડકયાળી ગામે બીજો દીપડો પણ પાંજરે પુરાયો છે. પ્રથમ પકડાયેલ દીપડી, જ્યારે આજે પકડાયેલો દીપડો. પ્રાથમિક શાળા નજીક પટેલ સમાજ પાસેથી નર દીપડો પાંજરે પુરાયો. પાંચ વર્ષની બાળકી પર હુમલા બાદ વન વિભાગે 8 પાંજરા ગોઠવ્યા હતા. ત્રણ દિવસ બાદ પ્રથમ દીપડો પાંજરે પુરાયો હતો. આજે વધુ એક દીપડો પકડાતા ગામલોકોમાં ભયનો માહોલ. બાળકી પર હુમલાની ઘટના સ્થળથી માત્ર 200 મીટર દૂર પ્રાથમિક શાળા. બાળકોની સુરક્ષાને લઈને વાલીઓમાં ચિંતા અને ભય પ્રસર્યો છે. ગ્રાઉન્ડ રિપોર્ટમાં ગામલોકોએ ભય વચ્ચે જીવવાની વ્યથા વ્યક્ત કરી છે.

સોલાર પ્લાન્ટ માટે ભાડેથી વાહન લેવાની લાલચ આપી રૂ. 3.49 કરોડના વાહનો બારોબાર ગીરવે મુકવાના કૌંભાડનો પર્દાફાશ

સુરેન્દ્રનગર પોલીસે, પોન્ઝી સ્કીમના નામે પડાલેવા 3.49 કરોડના વાહન જપ્ત કર્યાં છે. સોલાર પ્લાન્ટ માટે ભાડેથી વાહનો મુકવાની લાલચ આપી 4 ઇસમોની ટોળકીએ રાજ્યવ્યાપી કૌભાંડ આચર્યુ હતું. પંચમહાલ, દાહોદ સહિતના જિલ્લાઓમાંથી 51 વાહન છેતરપીંડીથી મેળવી અને ગીરવે મૂકી કરોડોની છેતરપિંડી કરાઈ હોવાનો ધડાકો પોલીસે કર્યો છે. 38 ટ્રેકટર, 3 JCB મશીન, ડમ્પર અને કાર સહિતનો મુદામાલ જપ્ત કરવામાં આવ્યો છે. મૂળી પોલીસ મથક વાહન મુકવા નાનું પડ્યું છે. અરજણ જોગરાણાની ધરપકડ કરી આગળની કાર્યવાહી હાથ ધરવામાં આવી છે.

અનૈતિક સંબંધનો કરુણ અંજામ, વિસાવદરમાં પ્રેમી એવા કૌંટુંબિક કાકાએ, ભત્રીજીની હત્યા કરીને ઝેરી દવા ગટગટાવીને મોતને વ્હાલુ કર્યું

જૂનાગઢના વિસાવદરમાં પ્રેમી એવા કૌંટુંબિક કાકાએ, ભત્રીજીની હત્યા કરીને ઝેરી દવા ગટગટાવીને મોતને વ્હાલુ કર્યું છે. ​પ્રેમપરાની સીમમાં મહિલાની થઈ હત્યા. ​હત્યા બાદ કૌટુંબિક કાકાએ પીધી હતી દવા. ​સારવાર દરમિયાન હત્યાના આરોપી કાકાનું થયું મોત. ​સિવિલ હોસ્પિટલમાં સારવાર બંદોબસ્ત વચ્ચે દમ તોડ્યો. ​મૃતક મહિલાની ઓળખ સુમિતાબેન તરીકે થઈ. ​આરોપી કાકાનું નામ અરજણ ગોવિંદ ભડેલીયા. ​બંને વચ્ચે હતો અનૈતિક સંબંધ. ​એક થઈ શકે તેમ ન હોવાથી લીધો નિર્ણય. ​અરજણે મરી જવાની વાત રજૂ કરી હતી. ​સુમિતાબેને પણ મારી નાખવા જણાવી દીધું. ​તિક્ષણ હથિયાર વડે ગળું કાપી કરી હત્યા. ​હત્યા કર્યા બાદ અરજણે ઝેરી દવા પીધી. ​જૂનાગઢ સિવિલ હોસ્પિટલ ખાતે ખસેડાયો હતો આરોપી. હવે ​આરોપીના મોત બાદ પોલીસ કેસ બંધ કરશે.

આરોગ્ય મંત્રીના આદેશથી રસીકરણ દરમિયાન બેદરકારી દાખવનાર હેલ્થ વર્કરને સસ્પેન્ડ કરાયા

પલસાણામાં રસીકરણ દરમિયાન બેદરકારી બદલ આરોગ્ય મંત્રીના આદેશથી હેલ્થ વર્કર સસ્પેન્ડ. મમતા દિવસના રસીકરણ કાર્યક્રમમાં આરોગ્ય કર્મચારીની બેદરકારી સામે આવતાં લેવાયા પગલાં. રસીકરણ બાદ 5 બાળકોને પેરાસિટામોલના બદલે ડાયાબિટીશની ગોળી આપવામાં આવી. દવાની આડઅસર થતાં જ પાંચેય બાળકને સારવાર અર્થે હોસ્પિટલ ખસેડવામાં આવ્યા હતા. આરોગ્ય મંત્રી પ્રફુલ પાનશેરિયાએ ઘટનાની જાણ થતાં જ આપ્યા હતા તપાસના આદેશ. ફરજમાં બેદરકારી દાખવનાર મહિલા આરોગ્ય કર્મચારીને તાત્કાલિક અસરથી કરાઈ સસ્પેન્ડ. આરોગ્ય વિભાગના ઉચ્ચ અધિકારીઓએ રાત્રે જ હોસ્પિટલ પહોંચી સ્થિતિની કરી સમીક્ષા. હાલ તબીબોની દેખરેખ હેઠળ તમામ 5 બાળકની સ્થિતિ સ્થિર હોવાની સત્તાવાર પુષ્ટિ. બાળકોના સ્વાસ્થ્ય સાથે લાપરવાહી કોઈપણ સંજોગોમાં ન ચલાવવા આરોગ્ય મંત્રીની ચેતવણી.

ભુજમાં હમીરસર તળાવ નજીકનો વોકવે બન્યો ‘જોખમી વે’

ભુજમાં હમીરસર તળાવ પાસેનો વોકવે વાહનચાલકની બેદરકારીને કારણે ‘જોખમી વે’ બન્યો હોવાની ઘટના સામે આવી છે. વાહનો માટે પ્રતિબંધિત વોકવે પર એક ચાલકે કાર દોડાવી હતી. રવિવારે હમીરસર તળાવની પાળે હજારો લોકો પરિવાર સાથે સમય પસાર કરી રહ્યા હતા. નાના બાળકો સહિત લોકો વોકવે પર ફરતા અને રમતા હતા, તે દરમિયાન અચાનક કાર પસાર થતાં લોકોમાં ચકચાર મચી હતી. વાહનચાલકની હરકત જોઈ સ્થળ પર હાજર લોકો પણ ચોંકી ઉઠ્યા હતા. વોકવે પર વાહનોની અવરજવર સામે હવે તંત્રની કામગીરીને લઈને સવાલો ઉઠ્યા છે. ઘટનાનો વીડિયો સામે આવ્યા બાદ લોકો દ્વારા તાત્કાલિક તપાસ કરી, વીડિયો આધારે નિયમોનો ભંગ કરનાર વાહનચાલક સામે કડક કાર્યવાહી કરવાની માંગ કરવામાં આવી છે.

હડતાળીયા બેંક કર્મચારીઓને સરકારનો કડક આદેશ, આજે રવિવારે રજાના દિવસે પણ ખુલ્લી રાખો બેંક

સમગ્ર દેશના બેંક ગ્રાહકો માટે એક મહત્વપૂર્ણ સમાચાર છે. આવતીકાલ 28 સપ્ટેમ્બરથી 30 સપ્ટેમ્બર, 2026 દરમિયાન ત્રણ દિવસની બેંક હડતાળની જાહેરાત કરવામાં આવી છે. આનાથી બેંકિંગના જરૂરી કામો કરવા માંગતા લોકોને અસુવિધા થઈ શકે છે. ગ્રાહકોને રાહત આપવા માટે, સરકારે જાહેર ક્ષેત્રની બેંકો અને પ્રાદેશિક ગ્રામીણ બેંકોની શાખાઓ 27 સપ્ટેમ્બર (રવિવાર) ના રોજ ખુલ્લી રાખવાનો નિર્ણય કર્યો છે. તેનો ઉદ્દેશ્ય એ છે કે લોકો હડતાળ શરૂ થાય તે પહેલાં તેમના જરૂરી બેંકિંગ વ્યવહારો પૂર્ણ કરી શકે.

અમદાવાદના લાંભા વોર્ડના પૂર્વ કાઉન્સીલરે, પોલીસ વિભાગની ગરિમાને લાંછન લગાડતો વીડિયો સોશિયલ મીડિયામાં પોસ્ટ કરતા વિવાદ

અમદાવાદના લાંભા વોર્ડના પૂર્વ કાઉન્સીલરે સોશિયલ મીડિયા પર પોસ્ટ મુકતા વિવાદ સર્જાયો છે. પૂર્વ કાઉન્સીલર માનસિંગ સોલંકીએ “મયુરી બા” “લાડકી ભાણી બા” નામથી વીડિયો સોશિયલ મીડિયા પર પોસ્ટ કર્યો છે. પોલીસ વિભાગની ગરિમાને લાંછન લગાડતો વીડિયો પોસ્ટ કરાયો છે. વીડિયોમાં દેખાતી મહિલા પોલીસકર્મીએ પોલીસ યુનિફોર્મમાં ડાન્સ કર્યો. મહિલા પોલીસકર્મીએ બોલીવુડના મુવીના સોંગનો ડાયલોગ ઉચ્ચાર્યો. યે પોલીસ સ્ટેશન હે તુમ્હારે બાપ કા ઘર નહી જબ તક બેઠને કો બોલા ન જાયે તબ તક શરાફત સે ખડે રહો. પારિવારિક કાર્યક્રમમાં મહિલા પોલીસ કર્મીની દબંગાઈ સામે આવી.

ગુજરાત સરકારના ટુરિઝમ કોર્પોરેશને કમાવાનો ધંધો શોધ્યો ! GMDC ગ્રાઉન્ડના ગરબા માટે હવે રૂપિયાથી વેચશે એન્ટ્રી પાસ

ગુજરાત સરકારની માલિકીના ગુજરાત પ્રવાસન નિગમે, હવે નવરાત્રીમાં કમાવાનો નવો ધંધો શોધી કાઢ્યો છે. કુછ દિન તો ગુજારો ગુજરાત મે..થી વિશ્વના ફલક પર ગુજરાતનો ગરબો પહોચાડનાર નિગમે હવે તેના રૂપિયા પાછા મેળવવા માટે આ વર્ષથી વેચાણ પાસથી એન્ટ્રી આપશે. સોશિયલ મીડિયા ઉપર ગુજરાત ટુરિઝમ કોર્પોરેશને કરેલ જાહેરાત અનુસાર, સવારના 4 વાગ્યા સુધી ગરબા રમવા મળશે, પરંતુ તેના માટે વ્યક્તિ દિઠ રૂપિયા ખર્ચવા પડશે. ગુજરાતના તત્કાલિન મુખ્ય પ્રધાન  અને હાલના વડાપ્રધાન નરેન્દ્ર મોદીએ, અમદાવાદના જીએમડીસી-ગુજરાત યુનિવર્સિટી ગ્રાઉન્ડ ખાતે વાઈબ્રન્ટ નવરાત્રી મહોત્સવનું સફળ આયોજન કર્યું હતું. જો કે, વર્તમાન ભૂપેન્દ્ર પટેલની સરકારે, નરેન્દ્ર મોદીના એ સમયથી ચાલી આવતા ફ્રિ ટુ ઓલના નિર્ણયને ફેરવી તોળીને કોર્પોરેશનને વેપાર માટે છુટો દૌર આપી દીધો હોવાની ટીકાઓ થઈ રહી છે.