Gujarat Rain Forecast: ભાદરવો ગાજશે ! ગુજરાતમાં ફરી ચોમાસુ જામશે, 11થી 13 સપ્ટેમ્બર ભારે વરસાદની હવામાન વિભાગની આગાહી
ગુજરાતમાં વરસાદના નવા રાઉન્ડની શરૂઆત થવાના સંકેતો મળી રહ્યા છે. હવામાન વિભાગની આગાહી મુજબ 11 સપ્ટેમ્બરથી બંગાળની ખાડીમાં નવી લો-પ્રેશર સિસ્ટમ સક્રિય થવાની શક્યતા છે. આ સિસ્ટમની અસરથી 12 સપ્ટેમ્બરથી ગુજરાતમાં વરસાદનું જોર વધવાની સંભાવના છે.
ગુજરાતમાં વરસાદની રાહ જોઈ રહેલા લોકો અને ખેડૂતો માટે સારા સમાચાર સામે આવ્યા છે. રાજ્યમાં આગામી દિવસોમાં ફરી વરસાદી માહોલ સક્રિય થવાના સંકેતો મળી રહ્યા છે. હવામાન વિભાગે 11થી 13 સપ્ટેમ્બર દરમિયાન રાજ્યના વિવિધ વિસ્તારોમાં વરસાદની આગાહી કરી છે. ખાસ કરીને 12 અને 13 સપ્ટેમ્બરે વરસાદનું જોર વધવાની શક્યતા છે.
12-13 સપ્ટેમ્બરે દક્ષિણ ગુજરાતમાં ભારે વરસાદ
હવામાન વિભાગની આગાહી મુજબ 12 અને 13 સપ્ટેમ્બરે દક્ષિણ ગુજરાત તથા સૌરાષ્ટ્રમાં ભારે વરસાદ પડી શકે છે. આ બંને દિવસ દરમિયાન કેટલાક વિસ્તારો માટે યલો એલર્ટ જાહેર કરવામાં આવ્યું છે. દક્ષિણ ગુજરાતના નર્મદા, તાપી, ડાંગ, નવસારી અને વલસાડ જિલ્લામાં ભારે વરસાદની શક્યતા છે. આ ઉપરાંત કેન્દ્રશાસિત પ્રદેશ દમણ અને દાદરા-નગર હવેલીમાં પણ વરસાદ પડી શકે છે.
સૌરાષ્ટ્રના આ જિલ્લાઓમાં પણ વરસાદનું જોર
13 સપ્ટેમ્બરે દક્ષિણ ગુજરાત ઉપરાંત સૌરાષ્ટ્રના ભાવનગર અને અમરેલી જિલ્લામાં પણ યલો એલર્ટ આપવામાં આવ્યું છે. આ વિસ્તારોમાં ભારે વરસાદની સાથે કેટલાક સ્થળોએ ગાજવીજ થવાની શક્યતા છે. સૌરાષ્ટ્રના અન્ય વિસ્તારોમાં પણ હળવાથી મધ્યમ વરસાદના ઝાપટાં પડી શકે છે.
ગાજવીજ સાથે વરસાદની શક્યતા
વરસાદની સાથે રાજ્યના કેટલાક વિસ્તારોમાં ગાજવીજ અને વીજળીના કડાકા સાથે વરસાદ પડવાની શક્યતા વ્યક્ત કરવામાં આવી છે. જેને પગલે હવામાન વિભાગે લોકોને સાવચેતી રાખવા અને ગાજવીજ દરમિયાન ખુલ્લા મેદાન તથા વૃક્ષો નીચે ઊભા ન રહેવાની સલાહ આપી છે.
વરસાદની આગાહીએ ખેડૂતોમાં આશા જગાવી
રાજ્યના કેટલાક વિસ્તારોમાં વરસાદની અછત વચ્ચે હવામાન વિભાગની આ આગાહીથી ખેડૂતોમાં પણ આશા જાગી છે. આગામી દિવસોમાં જો આગાહી મુજબ સારો વરસાદ થાય તો પાણીની અછતનો સામનો કરી રહેલા વિસ્તારોને રાહત મળી શકે છે. ખાસ કરીને દક્ષિણ ગુજરાત અને સૌરાષ્ટ્રમાં ભારે વરસાદથી સ્થાનિક જળાશયો અને ડેમોમાં પાણીની આવક વધવાની આશા છે.
આ પણ વાંચો- Ahmedabad Honor Killing : બાઈક અકસ્માત કે બહેનની હત્યાનો ખતરનાક પ્લાન? CCTVમાં ખુલ્યું સત્ય!
