Breaking News : અમદાવાદના નવા બની રહેલા રેલવે સ્ટેશનનું બાંધકામ 13મા માળ સુધી પહોચ્યું – ફોટા
અમદાવાદ શહેરના કાળુપુર રેલવે સ્ટેશનનું રિડેવલપમેન્ટ થઈ રહ્યું છે. હાલ રેલવે સ્ટેશનના દક્ષિણ દિશા તરફના ભાગે 13 માળ સુધીનુ બાંધકામ પૂર્ણ થઈ ચૂક્યું છે. રેલવે સ્ટેશનથી સાળંગપુર તરફ જતા રિડેવલપમેન્ટ અંતર્ગત થઈ રહેલ બાંધકામ જોઈ શકાય છે. આ બાંધકામ અંગે રેલવે પ્રધાન અશ્વિની વૈષ્ણવે સમીક્ષા હાથ ધરી હતી.
કેન્દ્રીય રેલવે, માહિતી અને પ્રસારણ તથા ઇલેક્ટ્રોનિક્સ અને માહિતી પ્રૌદ્યોગિકી મંત્રી અશ્વિની વૈષ્ણવે આજે ગુજરાતની મુલાકાતે આવ્યા હતા. આ દરમિયાન અશ્વિની વૈષ્ણવે અમદાવાદ ખાતે રેલવે, અમદાવાદના અદ્યતન બની રહેલ રેલવે સ્ટેશન તથા અન્ય મહત્વપૂર્ણ વિષયો અંગે વાત કરી હતી.
અમદાવાદ રેલવે સ્ટેશનના રિડેવલપમેન્ટ અંગે રેલવે મંત્રી અશ્વિની વૈષ્ણવે જણાવ્યું હતું કે, અમદાવાદ સ્ટેશન પુનર્વિકાસ પ્રોજેક્ટનું કાર્ય ઝડપથી પ્રગતિ કરી રહ્યું છે. નવા બની રહેલા અમદાવાદના રેલવે સ્ટેશનની નવી ઇમારતનું નિર્માણ 13મા માળ સુધી પહોંચી ગયું છે.
અમદાવાદ રેલવે સ્ટેશનના પુનર્વિકાસનો ઉદ્દેશ મુસાફરોને આધુનિક, સુવિધાજનક અને વધુ સારી મુસાફર સુવિધાઓ ઉપલબ્ધ કરાવવા તેમજ સ્ટેશનને ભવિષ્યની મુસાફર જરૂરિયાતોને અનુરૂપ વિકસાવવાનો છે.
સ્ટેશનના પુનર્વિકાસના કાર્યોમાં મુસાફર સુવિધાઓ, વધુ સારી કનેક્ટિવિટી તેમજ મલ્ટીમોડલ એકીકરણ પર વિશેષ ધ્યાન આપવામાં આવી રહ્યું છે. રેલવે સ્ટેશનોના પુનર્વિકાસમાં મુસાફરોની સુવિધા જળવાઈ રહે તે સુનિશ્ચિત કરીને તબક્કાવાર રીતે કામ કરવાની નીતિ અપનાવવામાં આવી રહી છે.
રેલવે મંત્રી અશ્વિની વૈષ્ણવે, અમદાવાદ મુલાકાત દરમિયાન રેલવે સંબંધિત વિવિધ વિકાસ કાર્યો અને પ્રોજેક્ટોની પ્રગતિની પણ સમીક્ષા કરી હતી.
આ અગાઉ જુલાઈ 2026માં અશ્વિની વૈષ્ણવે અમદાવાદ રેલવે સ્ટેશનના પુનર્વિકાસ સાથે સંકળાયેલા કાર્યો સહિત શહેરની વિવિધ રેલવે પરિયોજનાઓ અંગે અધિકારીઓ અને ચૂંટાયેલા ધારાસભ્ય અને સાંસદો સાથે સમીક્ષા પણ કરી હતી.
અમદાવાદ રેલવે સ્ટેશનનો પુનર્વિકાસ ગુજરાતના મુખ્ય રેલવે માળખાકીય વિકાસ કાર્યોમાંનો એક છે, જેના માધ્યમથી ભવિષ્યની મુસાફર જરૂરિયાતોને ધ્યાનમાં રાખીને સ્ટેશન પરિસર અને મુસાફર સુવિધાઓને આધુનિક સ્વરૂપ આપવામાં આવી રહ્યું છે.
