Gujarat Government Job : 6 વર્ષની કાનૂની લડાઈ, ગુજરાત હાઈકોર્ટના ચુકાદા બાદ SC/ST/OBC મહિલાઓને રાહત, જુઓ Video
ગુજરાત હાઈકોર્ટે 2018ના વિવાદિત મહિલા અનામત પરિપત્રને કારણે નોકરીથી વંચિત રહેલી SC/ST/OBC શ્રેણીની ત્રણ યુવતીઓને છ વર્ષની લાંબી કાયદાકીય લડત બાદ ન્યાય અપાવ્યો છે.
ગુજરાત હાઈકોર્ટે મહિલા અનામત સંબંધિત વર્ષ 2018ના એક વિવાદિત સરકારી પરિપત્રને કારણે ઉદ્ભવેલા કેસમાં મહત્વપૂર્ણ ચુકાદો આપ્યો છે. આ ચુકાદાને પગલે SC/ST અને OBC શ્રેણીની ત્રણ યુવતીઓને છ વર્ષની લાંબી કાયદાકીય લડત બાદ આખરે ન્યાય મળ્યો છે.
આ યુવતીઓને લાયકાત અને ઉચ્ચ માર્ક્સ હોવા છતાં, તે સમયે અમલમાં રહેલા પરિપત્રની જોગવાઈઓના કારણે નોકરીથી વંચિત રાખવામાં આવી હતી.
વર્ષ 2018માં ગુજરાત સરકારે એક પરિપત્ર બહાર પાડ્યો હતો જેમાં SC/ST અને OBC મહિલા ઉમેદવારો ફક્ત અનામત બેઠકો પર જ ઉમેદવારી કરી શકે તેવી જોગવાઈ હતી. આ જોગવાઈને કારણે લાયકાત ધરાવતી મહિલાઓ, ભલે તેમને ઓપન મેરિટના ઉમેદવારો કરતાં વધુ માર્ક્સ મળ્યા હોય, તેમ છતાં ઓપન મેરિટની બેઠકો પર પસંદગી પામી શકતી ન હતી.
આ પરિપત્રને કારણે ભારે વિવાદ થયો હતો અને આખરે સરકારે તે પરિપત્ર રદ કરીને નવો પરિપત્ર બહાર પાડ્યો હતો. જોકે, આ વિવાદિત પરિપત્રને કારણે તે સમયે જે યુવતીઓને નોકરી મળી ન હતી, તેમને છ વર્ષ સુધી કાયદાકીય લડત લડવી પડી હતી.
આ કેસમાં ત્રણ યુવતીઓ – અંકિતાબેન અમૃતભાઈ પરમાર (86 માર્ક્સ), રમિલાબેન કાંતિભાઈ વાઘેલા (85 માર્ક્સ) અને સુધાબેન હિતેનભાઈ વરણ (83 માર્ક્સ) – સેનેટરી ઇન્સ્પેક્ટરની નોકરી માટે સંપૂર્ણ પાત્રતા ધરાવતી હતી. તેમના માર્ક્સ અન્ય કેટલાક પસંદ થયેલા ઉમેદવારો (જેમના 76-77 માર્ક્સ હતા) કરતાં ઘણા વધારે હતા, તેમ છતાં તેમને નોકરી આપવામાં આવી ન હતી. આ અન્યાય સામે ત્રણેય યુવતીઓએ ગુજરાત હાઈકોર્ટમાં પીટીશન દાખલ કરી હતી.
હાઈકોર્ટે આ યુવતીઓની દલીલોને ધ્યાનમાં રાખીને તેમના પક્ષમાં ચુકાદો આપ્યો છે. હાઈકોર્ટે ગુજરાત ગૌણ સેવા પસંદગી મંડળને આદેશ કર્યો છે કે તેઓ બે અઠવાડિયામાં આ ત્રણેય યુવતીઓની તરફેણમાં સરકાર સમક્ષ ભલામણ કરે. આ ઉપરાંત, ગુજરાત સરકારને છ અઠવાડિયામાં આ ત્રણેય દીકરીઓને ફરજ પર હાજર કરવા માટેનો હુકમ કરવામાં આવ્યો છે.
આ ચુકાદાનો એક અન્ય મહત્વપૂર્ણ પાસું એ છે કે આ ત્રણેય અરસદારોની નોકરીમાં સિનિયોરિટી તેમની મૂળ ભરતીના સમયથી જ ગણવામાં આવશે, જેથી તેમને થયેલા વિલંબના કારણે ભવિષ્યમાં કોઈ નુકસાન ન ભોગવવું પડે. આ ચુકાદો અનામત નીતિઓમાં મહિલાઓના અધિકારો અને લાયકાતને પ્રાધાન્ય આપવાની દિશામાં એક પ્રેરક પગલું છે.
ગુજરાતની 12 વર્ષની યુવા ટેનિસ ખેલાડીએ તોડ્યો સાનિયા મિર્ઝાનો 25 વર્ષ જૂનો રેકોર્ડ, જુઓ Video
