Ahmedabad : ભારે પવન સાથે વરસાદની શરૂઆત, અનેક વિસ્તારોમાં પાણી ભરાયા, વૃક્ષો ઘરાશાયી

અમદાવાદ(Ahmedabad)  શહેરમાં છેલ્લા બે દિવસથી ભારે  ઉકળાટ બાદ આજે સાંજે  ભારે પવન સાથે વરસાદની(Rain) શરૂઆત થઈ છે.  જેમાં મેમનગર, જીવરાજ પાર્ક, અસારવા, ઘી કાંટા, વાડજ, આરટીઓ, અંજલિ, પાલડી, દાણીલીમડા, વાસણા, રિવરફ્રન્ટ  વિસ્તારમાં ધોધમાર વરસાદ પડ્યો છે. અસહ્ય બફારાને કારણે લોકો પણ અકળાઈ ઉઠ્યા હતા. ત્યારે બપોર બાદ વાતાવરણમાં પલ્ટો જોવા મળતા અને વરસાદ આવતા લોકોને પણ રાહત મળી છે.

ભારે પવન સાથે વરસાદ વરસતા ઠેર ઠેર પાણી ભરાયા છે. તો વાહનચાલકોને પણ મુશ્કેલીનો સામનો કરવો પડ્યો ત્યારે જીવરાજ, વેજલપુર, ઘી કાંટા, વાડજ, અંજલી ચાર રસ્તા, મેમનગર, સેટેલાઈટ સહિતના વિસ્તારમાં ભારે પવન સાથે વરસાદ વરસ્યો. તો રસ્તા પર પાણી ભરાવાના પણ દ્રશ્યો જોવા મળ્યા હતા. અમદાવાદમાં 30 થી 40 કિલોમીટરની ઝડપે ફુંકાઇ રહ્યો છે.

આ તરફ ઠેર ઠેર વૃક્ષો ધરાશાયી થવાની ઘટના પણ બની. તો રસ્તા પર પાણી ભરાતા વાહનચાલકોને મુશ્કેલીનો સામનો કરવો પડ્યો હતો. ઘણા વિસ્તારોમાં વાહનો પર વૃક્ષો પડતા પણ ફાયર વિભાગે કાર્યવાહી હાથ ધરી હતી.

હવામાન વિભાગે કરી હતી આગાહી

ઉલ્લેખનીય છે હવામાન વિભાગ (IMD) દ્વારા રાજ્યમાં આગામી પાંચ દિવસ સારા વરસાદની આગાહી કરવામાં આવી છે. દક્ષિણ ગુજરાતમાં પાંચ દિવસ ભારે વરસાદ રહેશે. જ્યારે સૌરાષ્ટ્રમાં એક દિવસ સારા વરસાદની આગાહી કરવામાં આવી છે. દક્ષિણ ગુજરાતમાં સુરત, વલસાડ, નવસારી, તાપી અને ડાંગમાં વરસાદ પડી શકે છે. જ્યારે, સૌરાષ્ટ્રમાં જૂનાગઢ, રાજકોટ, પોરબંદર, અમરેલી અને ભાવનગરમાં વરસાદની શક્યતા છે.

ભારે વરસાદની આગાહી વચ્ચે દક્ષિણ ગુજરાતના માછીમારોને એલર્ટ રહેવા માટે પણ સૂચન અપાઈ છે. સામાન્ય રીતે જૂન મહિનામાં 3 ઈંચ જેટલો વરસાદ હોવો જોઈએ. પરંતુ, આ વર્ષે જૂનમાં સરેરાશ દોઢ ઈંચ જેટલો વરસાદ નોંધાયો છે. મહત્વનું છે કે સૌરાષ્ટ્રમાં મેઘમહેર યથાવત છે. ગઈકાલે પણ અમરેલી, રાજકોટ અને જૂનાગઢ પર મેઘરાજા મહેરબાન રહ્યા હતા.

સૌથી વધુ જૂનાગઢ, વિસાવદરમાં પોણા બે ઈંચ વરસાદ પડ્યો. તો માળિયાહાટીમાં પણ મેઘરાજા મન મુકીને વરસ્યા. આ ઉપરાંત માણાવદરમાં પણ દોઢ ઈંચ વરસાદ વરસ્યો. તો રાજકોટના ઉપલેટામાં દોઢ ઈંચ અને ધોરાજીમાં અડધો ઈંચ વરસાદ વરસ્યો. તો આ તરફ અમરેલીના લાઠીમાં એક ઈંચ અને બગસરામાં અડધો ઈંચ વરસાદ પડ્યો હતો.