Tejas માટે સેનાની ટ્રેનીંગ લઈ રહી છે કંગના રનૌત, ચાહકો સાથે શેર કરી એક ઝલક

બોલિવૂડ એક્ટ્રેસ કંગના રનૌત આજકાલ તેની ઘણી ફિલ્મ્સના કારણે ચર્ચામાં છે. આ વર્ષે તે ઘણી ફિલ્મોમાં નજરે પડનાર છે, જેમાંથી એક છે ‘તેજસ’. આ દિવસોમાં કંગના રનૌત તેની આગામી ફિલ્મ તેજસનું શૂટિંગ કરી રહી છે. આ ફિલ્મમાં કંગના ભારતીય વાયુ સેનાના અધિકારીની ભૂમિકા ભજવશે. ફિલ્મના સેટ પરથી અભિનેત્રીએ એક વીડિયો શેર કર્યો છે, જેમાં તે સૈન્યની ટ્રેઈનીંગ લેતી જોવા મળી રહી છે.

અભિનેત્રીએ તેમના ટ્વિટર અને ઇન્સ્ટાગ્રામ પર એક વીડિયો શેર કર્યો છે. આ વીડિયો શેર કરતી વખતે અભિનેત્રીએ ખુલાસો કર્યો છે કે, તે ‘તેજસ’ માટે આર્મીની ટ્રેનીંગ લઈ રહી છે. વીડિયોની સાથે અભિનેત્રીએ કેપ્શનમાં લખ્યું કે, ‘ઈર્ષાળુ કરચલા હંમેશા આપણને નીચે ખેંચવાનો પ્રયત્ન કરશે. પરંતુ આપણે ઉપર વધુ ઉપર ઉઠવું પડશે! # Tejas આર્મી તાલીમ પછી. તેજસનું દિગ્દર્શન Sarvesh Mewara કરી રહ્યા છે.

થોડા દિવસો પહેલા અભિનેત્રીએ ફિલ્મમાં તેના યુનિફોર્મનો ફોટો શેર કર્યો હતો, જેના પર લખ્યું હતું ‘TEJAS GILL’. યુનિફોર્મનો ફોટો શેર કરતી વખતે કંગનાએ કેપ્શનમાં લખ્યું કે, ‘હું તેજસમાં એક શીખ સૈનિકની ભૂમિકા નિભાવી રહી છું.’

તમને જણાવી દઈએ કે ‘તેજસ’ સિવાય કંગના ‘ધાકડ’ અને ‘થલાઈવી’માં પણ જોવા મળશે. તાજેતરમાં જ કંગનાએ થલાઈવીની રિલીઝ ડેટ જાહેર કરી છે. આ ફિલ્મ 23 એપ્રિલે થિયેટરોમાં રિલીઝ થશે. ફિલ્મમાં કંગના જયલલિતાની ભૂમિકા ભજવશે.