બોલીવુડમાં લગ્નસરાનો માહોલ છે ત્યારે અભિનેત્રી નીના ગુપ્તાની પુત્રી મસાબા ગુપ્તા એ પણ આજે સવારે સામાન્ય વીધીથી લગ્ન કર્યા છે. મસાબા બોલિવૂડ એક્ટર સત્યદીપ મિશ્રાને લાંબા સમયથી ડેટ કરી રહી હતી. હવે ફેશન ડિઝાઈનરે જાહેરાત કરી છે કે તેણે આજે સવારે એક પારિવારીક સમારોહમાં તેણે તેના બોયફ્રેન્ડ સાથે લગ્ન કર્યા છે. મસાબા અને સત્યદીપના લગ્નની તસવીરો પણ સામે આવી છે.
મસાબા ગુપ્તા નેટફ્લિક્સની લોકપ્રિય શ્રેણી ‘મસાબા મસાબા’માં જોવા મળી હતી. આ શોમાં તેના પતિનું પાત્ર સત્યદીપે ભજવ્યું હતું. બંને શોના સેટ પર મળ્યા અને પછી પ્રેમમાં પડ્યા. હવે મસાબા અને સત્યદીપ પરણિત છે. તેણે ઈન્સ્ટાગ્રામ પર પોતાના લગ્નની તસવીરો શેર કરીને આની જાહેરાત કરી હતી.
તેણે પોતાની પોસ્ટમાં લખ્યું, ‘Married my ocean of calm,this morning.Here’s to many many lifetimes of love,peace,stability & most importantly laughter. And thanks for letting me pick the caption – this is gonna be great!.’
ફોટામાં બંને ગુલાબી આઉટફિટમાં જોઈ શકાય છે. મસાબા ગુપ્તા પ્રખ્યાત ફેશન ડિઝાઇનર છે. તેણીએ તેની પોતાની બ્રાન્ડ હાઉસ ઓફ મસાબાના નવા બ્રાઈડલ કલેક્શનમાંથી કપડાં પહેર્યા હતા. સત્યદીપ મિશ્રા બરફી ગુલાબી સિલ્ક શેરવાનીમાં જોવા મળે છે, જ્યારે મસાબા ગુપ્તાએ લગ્ન માટે બરફી ગુલાબી લહેંગા પસંદ કર્યો હતો. તેણે સોનાના દાગીના પણ પહેર્યા હતા. મસાબાએ એક ઈન્ટરવ્યુમાં જણાવ્યું હતું કે આ એક સાદા કોર્ટ મેરેજ હતા, જેમાં તેનો પરિવાર સામેલ હતો.
મસાબા ગુપ્તાએ સત્યદીપ મિશ્રા પહેલા મધુ મન્ટેના સાથે લગ્ન કર્યા હતા. મધુ બોલિવૂડની જાણીતી નિર્માતા છે. બંનેના લગ્ન વર્ષ 2015માં થયા હતા. જોકે ચાર વર્ષ પછી જ 2019માં બંનેએ છૂટાછેડા લીધા હતા. બીજી તરફ સત્યદીપ મિશ્રાના પણ આ બીજા લગ્ન છે. મસાબા ગુપ્તા પહેલા તેણે અભિનેત્રી અદિતિ રાવ હૈદરી સાથે લગ્ન કર્યા હતા. આ લગ્ન 2009 માં થયા હતા અને 2013 માં સમાપ્ત થયા હતા. સત્યદીપ ‘નો વન કિલ્ડ જેસિકા’, ‘બોમ્બે વેલ્વેટ’, ‘ચિલ્લર પાર્ટી’, ‘ફોબિયા’ અને ‘વિક્રમ વેધા’ ફિલ્મોમાં જોવા મળ્યો હતો. નવા દંપતિને તેમના લગ્ન પર ખૂબ ખૂબ અભિનંદન!