ચૂંટણી નજીક છે માહોલ ગરમ છે અને હવામાન પણ. ગરમી સતત વધી રહી છે. તેવામાં ગુજરાતીઓ માટે રાહતના સમાચાર છે. રાજ્યમાં લોકોને ગરમીથી મળશે રાહત..આગામી ત્રણ દિવસ તાપમાનમાં ક્રમશ ઘટાડો થશે જ્યારે અમદાવાદ અને ગાંધીનગરમાં 37 ડિગ્રી તાપમાન નોંધાવાની શક્યતા છે. રાજ્યમાં સૌથી વધુ તાપમાન વલ્લભવિદ્યાનગરમાં 41 ડિગ્રી નોંધાયું. પરંતુ રાહતની વાત એ પણ છે કે હાલ રાજ્યમાં હિટવેવની શક્યતા નથી. હવામાન વિભાગ દ્વારા આગાહી કરવામાં આવી છે કે ત્રણ દિવસ બાદ તાપમાનમાં વધારો નોંધાવાની શક્યતા છે.
દેશના કેટલાક રાજ્યોમાં હીટવેવની આગાહી હવામાન વિભાગ દ્વારા કરવામાં આવી છે પરંતુ રાહતની વાત એ ચે કે હાલ ગુજરાતમાં હીટવેવની કોઇ આગાહી નથી. જોકે આગામી ત્રણ દિવસ બાદ તાપમાનમાં વધારો થઇ શકે છે જેથી ગરમી વધવાની શક્યતા પણ છે. જોકે ભારે ગરમીના કારણે લોકોને આડઅસર ન થાય તે માટે પ્રશાસન પણ સજ્જ છે. અમદાવાદ સહિત સમગ્ર રાજ્યમાં ગરમીનો પારો ઘટ્યો છે.ત્યારે તમામ જિલ્લાનું મહત્તમ તાપમાન 38થી 39 ડિગ્રી સુધી પહોંચ્યું છે.અને અમદાવાદ સહિત સૌરાષ્ટ્ર અને કચ્છના જિલ્લાનું મહત્તમ તાપમાન 40 ડિગ્રી સેલ્સિયસથી વધુ થાય તેવી શક્યતાઓ હવામાન વિભાગે વ્યક્ત કરી હતી.
હીટવેવની શક્યતાને જોતા કમિશનર ઓફ સ્કૂલની કચેરી દ્રારા ગરમી- હિટવેવ સંદર્ભે સ્કૂલો માટે ગાઈડલાઈન જાહેર કરી છે અને ગુજરાત હિટવેવ એક્શન પ્લાનની સૂચના મુજબ સ્કૂલોમાં અમલ કરાવવા તમામ ડીઈઓને આદેશ કરવામાં આવ્યો છે. ગાઈડલાઈન મુજબ ગરમીની સિઝનમાં સ્કૂલોના સમયનું નિયંત્રણ સવારે 6 થી 11 સુધી કરવાનુ રહેશે. તેમજ ઉનાળા દરમિયાન કોઈપણ પ્રકારના ઓપન એર વર્ગો ન યોજવા નિર્દેશ કરાયો છે.
સ્કૂલ કમિશનરના પરિપત્રને પગલે અમદાવાદ શહેર અને ગ્રામ્ય ડીઈઓ દ્વારા પ્રાથમિકથી માંડી ઉચ્ચતર માધ્યમિક સુધીની સરકારી, ગ્રાન્ટેડ અને ખાનગી સહિતની તમામ સ્કૂલોને સમયને લઈને પરિપત્ર કરવામાં આવ્યો છે.
આ તરફ સરકારના આરોગ્ય વિભાગે ગરમીથી કઇ રીતે બચાય અને ગરમીમાં બહાર નીકળીએ તો કઇ બાબતોનું ધ્યાન રાખવું તે માટે તૈયારી કરી છે. ગાંધીનગર જિલ્લા પંચાયતમાં આરોગ્ય વિભાગના જિલ્લા આરોગ્ય અધિકારીએ જણાવ્યું હતું કે પ્રાથમિક અને સામુહિક આરોગ્ય કેન્દ્ર ,સબ હેલ્થ સેન્ટર ઉપર ORS કોર્નર બનાવવામા આવ્યા છે.અને અતિશય ગરમીની અસરમાં તકેદારી રાખવા આરોગ્ય શાખા દ્વારા લોકોને જાગૃત કરવામાં આવી રહ્યા છે. સગર્ભા મહિલા,બાળકો,અને વૃદ્ધોને બપોરના સમયે કામ વગર બહાર ન નીકળવા અપીલ કરવામાં આવી હતી.
Published On - 11:13 pm, Mon, 22 April 24