અરવલ્લીમાં નવા વર્ષના પ્રથમ દિવસે પશુઓની ભડકાવવાની પરંપરા, વર્ષભર સૌનું સ્વાસ્થ્ય સારું રહે તેવી લોકમાન્યતા

અરવલ્લીના મોટાભાગના ગામડાઓમાં નવા વરસના પ્રથમ દિવસે પશુઓને ભડકાવવાની અનોખી પરંપરા છે. ગામના મુખ્ય મંદિર પાસે ગાય,ભેંસ સહિતના દૂધાળા પશુઓએ એકઠા કરવામાં આવે છે. જે બાદ યુવાનો પશુઓની પાસે ફટાકડા ફોડીને તેમને ભડકાવે છે. આ અનોખી પરંપરા સદીઓથી ચાલી આવી છે. ગામ લોકોમાં એવી માન્યતા છે કે દૂધાળા પશુઓને ભડકાવવાથી વર્ષભર સૌનું સ્વાસ્થ્ય સારૂ રહે છે. જો કે પશુઓની પાસે ફટાકડા ફોડવા સમયે કોઈ દાઝે નહીં તેનું પૂરતું ધ્યાન પણ રાખવામાં આવે છે. બેસતા વરસના દિવસે ગામના યુવાનો, વડીલો, બાળકો સૌ મંદિરે એકઠા થઈને એકબીજાને શુભેચ્છા પણ પાઠવે છે.