PM Kisan: 31 ડિસેમ્બર સુધીમાં કરી લો આ કામ, નહીંતર ખાતામાં નહીં આવે 13મો હપ્તો

પીએમ કિસાન યોજનાના લાભાર્થી ખેડૂતોએ 31 ડિસેમ્બર સુધીમાં તેમનું ઈ-કેવાયસી વેરિફિકેશન કરાવવું પડશે. સ્ટેટ નોડલ ઓફિસર મેઘરાજ સિંહ રત્નુએ જણાવ્યું હતું કે PM-કિસાન યોજનાના તમામ લાભાર્થી ખેડૂતો માટે 31 ડિસેમ્બર, 2022 સુધીમાં ઈ-કેવાયસી વેરિફિકેશન કરાવવાનું ફરજિયાત કરવામાં આવ્યું છે, જેથી તેઓ આ યોજના હેઠળના તમામ લાભો સરળતાથી મેળવી શકે. તેમણે કહ્યું કે ઈ-કેવાયસી વેરિફિકેશન ન કરાવવા પર લાભાર્થી ખેડૂતોને આગામી હપ્તા મેળવવામાં મુશ્કેલી પડી શકે છે.

ક્યાંથી કરાવી શકશો ઈ-કેવાયસી?

મેઘરાજ સિંહ રત્નુએ કહ્યું કે આ માટે લાભાર્થી ખેડૂતોએ ઈ-મિત્ર કેન્દ્ર પર જઈને આધાર કાર્ડ દ્વારા બાયોમેટ્રિક સિસ્ટમથી ઈ-કેવાયસી વેરિફિકેશન પૂર્ણ કરવું પડશે. તમામ ઈ-મિત્ર કેન્દ્રો પર ઈ-કેવાયસી માટેની ફી રૂ. 15 પ્રતિ લાભાર્થી (કર સહિત) નક્કી કરવામાં આવી છે. ખેડૂતોને આ યોજનામાં આવતા હપ્તાનો લાભ ઈ-કેવાયસી પૂર્ણ થયા બાદ જ મળશે.

આપને જણાવી દઈએ કે વડાપ્રધાન નરેન્દ્ર મોદીએ 17 ઓક્ટોબરે જ પીએમ કિસાન સન્માન નિધિનો 12મો હપ્તો જાહેર કર્યો હતો. આ વખતે દેશના 8 કરોડ ખેડૂતોને ફાયદો થયો છે. દરેકના ખાતામાં 2000 રૂપિયા ટ્રાન્સફર કરવામાં આવ્યા હતા. આ માટે કેન્દ્ર સરકારે 16,000 કરોડ રૂપિયાનો ખર્ચ કરવો પડ્યો હતો. ત્યારે હવે ખેડૂતો 13મા હપ્તાની રાહ જોઈ રહ્યા છે.

નકલી ખેડૂતોને ઓળખવામાં મદદ મળશે

કેન્દ્ર સરકારે ઈ-કેવાયસી ફરજિયાત કર્યું છે. કેન્દ્ર સરકારને લાગે છે કે દર વર્ષે લાખો પાત્ર ન હોય તેવા ખેડૂતો પીએમ કિસાન યોજનાનો લાભ ઉઠાવી રહ્યા છે. તેનાથી સરકાર પર નાણાકીય બોજ વધ્યો છે. પરંતુ, ઈ-કેવાયસી ફરજિયાત થતાં જ હવે નકલી ખેડૂતોની ઓળખ થશે. આવી સ્થિતિમાં તેમને પીએમ કિસાન યાદીમાંથી બાકાત રાખવામાં આવશે.

આ પહેલા કેન્દ્ર સરકારે 11મા હપ્તા માટે 21 હજાર કરોડ રૂપિયા જાહેર કર્યા હતા. ત્યારબાદ 10 કરોડ ખેડૂતોના ખાતામાં પૈસા ટ્રાન્સફર કરવામાં આવ્યા. બીજી તરફ ઇ-કેવાયસી ફરજિયાત થતાં જ નકલી ખેડૂતોની સંખ્યામાં નોંધપાત્ર ઘટાડો થયો છે. એકલા ઉત્તર પ્રદેશમાં જ 21 લાખ નકલી ખેડૂતોના નામ કાઢી નાખવામાં આવ્યા છે. ત્યારે પતિ-પત્ની પણ એકસાથે પીએમ કિસાન યોજનાનો લાભ લઈ શકતા નથી. જો આમ કરતા પકડાશે તો તેઓ નકલી જાહેર કરવામાં આવશે. આ સાથે તેમની પાસેથી પૈસા પણ પરત લેવામાં આવશે.