Agriculture Drone: આગામી ખરીફ સિઝનથી ખેતરોમાં ડ્રોન દ્વારા ખાતર છાંટવાની તૈયારીઓ શરૂ, ખેડૂતોને મળશે તેનો લાભ

કેન્દ્ર સરકારની સાથે સાથે રાજ્ય સરકારો પણ ખેતીમાં ટેકનોલોજીનો ઉપયોગ વધારવા માટે કામ કરી રહી છે. આ અંતર્ગત આંધ્ર પ્રદેશ સરકાર હવે ખેતરોમાં ખાતર છંટકાવ માટે ડ્રોન ટેક્નોલોજીનો (Agriculture Drone) ઉપયોગ કરવાની યોજના પર કામ કરી રહી છે. સરકારના આ પગલાથી પાકનું ઉત્પાદન વધશે અને ખેડૂતોને (Farmers) ખાતરનો છંટકાવ કરતી વખતે જે સમસ્યાઓનો સામનો કરવો પડે છે તેનો સામનો નહીં કરવો પડે તેવી અપેક્ષા છે. નોંધનીય છે કે આંધ્ર પ્રદેશ એકમાત્ર એવું રાજ્ય છે જેણે ખેતી માટે ઈન્ફ્રાસ્ટ્રક્ચર વિકસાવવામાં સૌથી વધુ ખર્ચ કર્યો છે અને અહીંની કૃષિ ઈન્ફ્રાસ્ટ્રક્ચર બાકીના રાજ્યો કરતાં ઘણી સારી છે.

કૃષિમાં ડ્રોનના ઉપયોગના ઘણા ફાયદા છે. તેનો ઉપયોગ સુનિશ્ચિત કરશે કે ડાંગર, મરચાં, કપાસ, મગફળી અને અન્ય પાકો પર પૂરતા પ્રમાણમાં ખાતર અને જંતુનાશક દવાઓનો ઓછામાં ઓછા સમયમાં છંટકાવ કરી શકાય છે. કૃષિ અધિકારીઓએ જણાવ્યું કે કેન્દ્ર અને રાજ્ય સરકારોએ આગામી ખરીફ સિઝનથી જ ખેતીમાં ટેક્નોલોજી દાખલ કરવાની યોજના શરૂ કરી છે. યોજના તૈયાર થયા બાદ તેને રાજ્યમાં લાગુ કરવામાં આવશે, તેનાથી ખેડૂતોને ઘણો ફાયદો થવાની આશા છે.

ખેડૂતો ડ્રોન ભાડે લઈ શકશે

ડ્રોન વડે છંટકાવ કરવાની યોજના હેઠળ રાજ્યના વિવિધ જિલ્લાઓને ડ્રોન આપવામાં આવશે. રાયલસીમાને સૌથી વધુ 500 ડ્રોન મળવાની સંભાવના છે, જેમાંથી 120 ચિત્તૂર માટે, 100 કડપા માટે, 100 અનંતપુર માટે, 50-60 નંદ્યાલ માટે, 70 કુર્નૂલ માટે અને બાકીના રાયચોટી, પુટ્ટપર્થી અને શ્રી બાલાજી માટે હશે. ખેડૂતો ડ્રોન રાયથુ કેન્દ્રો પાસેથી ભાડે લેવામાં સક્ષમ હશે અને અધિકૃત ડ્રોન પાઇલોટ્સ દ્વારા સંચાલિત કરવામાં આવશે. વધુને વધુ લોકોને ડ્રોન ઉડાડવાની તાલીમ આપવાનો રાજ્ય સરકારનો પ્રયાસ છે.

ડ્રોનનો ઉપયોગ ખેડૂતો માટે ફાયદાકારક

કુર્નૂલ એગ્રીકલ્ચરના જોઈન્ટ ડાયરેક્ટર પીએલ વરલક્ષ્મીએ જણાવ્યું હતું કે સરકાર કૃષિ ક્ષેત્રે ડ્રોન સેવાઓ શરૂ કરવાની યોજના બનાવી રહી છે, પરંતુ હજુ સુધી કોઈ સત્તાવાર આદેશ જાહેર કરવામાં આવ્યો નથી. તેમણે કહ્યું કે સંબંધિત અધિકારીઓ ડ્રોન એપ્લિકેશન માટે માર્ગદર્શિકા અને પ્રમાણભૂત ઓપરેટિંગ સિસ્ટમ તૈયાર કરી રહ્યા છે. જંતુનાશક અને ખાતર વિતરક કે કૃષ્ણાએ જણાવ્યું હતું કે જો ટેક્નોલોજી અસરકારક રીતે લાગુ કરવામાં આવે તો ડ્રોન ખેડૂતોને ઉચ્ચ પાકની ઉપજ પ્રાપ્ત કરવામાં મદદ કરી શકે છે.