Gujarat Budget 2026-27: કૃષિથી મત્સ્યોદ્યોગ સુધી વિકાસની દોડ, ખેડૂતોને મળશે સીધી સહાય અને ટેકનોલોજીનો લાભ
કૃષિ યાંત્રિકીકરણ માટે ટ્રેક્ટર સહાયમાં ₹800 કરોડ અને વિવિધ કૃષિ ઓજારો માટે ₹765 કરોડ ફાળવાયા છે. “મુખ્યમંત્રી પાક સંગ્રહ સ્ટ્રક્ચર યોજના” અંતર્ગત નાના ગોડાઉન બનાવવા 15,436 ખેડૂતોને ₹1 લાખ સહાય માટે ₹154 કરોડની જોગવાઈ કરાઈ છે.
ગુજરાત સરકારએ વર્ષ 2026-27 માટે કૃષિ, ખેડૂત કલ્યાણ અને સહકાર વિભાગ માટે કુલ ₹24,022 કરોડની જોગવાઈ કરીને રાજ્યના ગ્રામિણ અર્થતંત્રને મજબૂત બનાવવાનો સ્પષ્ટ સંદેશ આપ્યો છે. આ બજેટમાં પાક ઉત્પાદન, પશુપાલન, ડેરી, મત્સ્યોદ્યોગ અને સહકારી ક્ષેત્રને વ્યાપક પ્રોત્સાહન આપવામાં આવ્યું છે.
કૃષિ યાંત્રિકીકરણ માટે ટ્રેક્ટર સહાય
પાક કૃષિ વ્યવસ્થા હેઠળ ખેડૂતોને વીજ સહાય માટે ₹9,324 કરોડ ફાળવાયા છે, જ્યારે સૂક્ષ્મ સિંચાઈને પ્રોત્સાહન આપવા ₹1,250 કરોડની જોગવાઈ કરાઈ છે. કૃષિ યાંત્રિકીકરણ માટે ટ્રેક્ટર સહાયમાં ₹800 કરોડ અને વિવિધ કૃષિ ઓજારો માટે ₹765 કરોડ ફાળવાયા છે. “મુખ્યમંત્રી પાક સંગ્રહ સ્ટ્રક્ચર યોજના” અંતર્ગત નાના ગોડાઉન બનાવવા 15,436 ખેડૂતોને ₹1 લાખ સહાય માટે ₹154 કરોડની જોગવાઈ કરાઈ છે.
ખેડૂતોને સુરક્ષા કવચ આપવા ખાતેદાર ખેડૂતોના આકસ્મિક મૃત્યુ કે કાયમી અપંગતાના કિસ્સામાં ₹4 લાખ સુધીનું વીમા રક્ષણ આપવામાં આવશે, જેના માટે ₹146 કરોડ ફાળવાયા છે. અદ્યતન ડ્રોન ટેકનોલોજી અને સીડ રીપ્લેસમેન્ટ રેટ વધારવા ₹77 કરોડ તથા સોઇલ હેલ્થ કાર્ડ વિતરણ માટે ₹14 કરોડ ફાળવાયા છે.
કૃષિ સંશોધન અને નવીનતાને વેગ
બાગાયત ક્ષેત્રે ₹798 કરોડ તથા પ્રાકૃતિક કૃષિ માટે ₹392 કરોડની જોગવાઈ નોંધપાત્ર છે. રાજ્ય કૃષિ યુનિવર્સિટીઓના આધુનિકીકરણ અને સંશોધન માટે ₹1,063 કરોડ ફાળવાયા છે, જે કૃષિ સંશોધન અને નવીનતાને વેગ આપશે.
પશુપાલન ક્ષેત્રે “મુખ્યમંત્રી ગૌમાતા પોષણ યોજના” માટે ₹500 કરોડ તથા કામધેનુ યુનિવર્સિટીની વિવિધ યોજનાઓ માટે ₹424 કરોડ ફાળવાયા છે. ગર્ભધારણ અને વિયાણ થયેલ પશુઓ માટે ખાણદાણ સહાયમાં ₹61 કરોડ, નિ:શુલ્ક પશુ સારવાર માટે ₹52 કરોડ અને ફરતા પશુ દવાખાનાઓ માટે ₹56 કરોડની જોગવાઈ કરાઈ છે. ડેરી ફાર્મ વિકાસ અને દુધાળાં પશુના વીમા પ્રીમિયમ સહાય પણ સામેલ છે.
માછીમારી સાધનો પર સહાય
મત્સ્યોદ્યોગ ક્ષેત્રે 104 મત્સ્ય ઉતરાણ કેન્દ્રોના વિકાસ માટે ₹361 કરોડ તથા માછીમારોને ડીઝલ ખરીદી પર વેટ રાહત સહાય માટે ₹300 કરોડ ફાળવાયા છે. પ્રધાનમંત્રી મત્સ્યસંપદા યોજના હેઠળ ₹128 કરોડ તથા આંતરદેશીય અને દરિયાઈ મત્સ્યોદ્યોગ વિકાસ માટે વિશેષ ફાળવણી કરાઈ છે. ડીપ-સી ફિશિંગ વેસલ્સ અને માછીમારી સાધનો પર સહાય પણ જાહેર થઈ છે.
ગ્રામિણ અર્થતંત્રને મજબૂત બનાવવા દિશામાં મહત્વપૂર્ણ પગલું
ખેડૂતોને સસ્તું ધિરાણ ઉપલબ્ધ થાય તે માટે સમયસર ચુકવણી કરનાર કિસાન ક્રેડિટ કાર્ડ ધારકોને ₹3 લાખ સુધી ઝીરો ટકા વ્યાજે પાક ધિરાણ આપવા ₹1,539 કરોડની જોગવાઈ મહત્વપૂર્ણ છે. સહકારી ગોડાઉન અને ખાંડ મંડળીઓ માટે પણ સહાય ફાળવાઈ છે.
આ રીતે ગુજરાત બજેટ 2026 કૃષિથી લઈને પશુપાલન અને મત્સ્યોદ્યોગ સુધી સર્વાંગી વિકાસને પ્રોત્સાહન આપતું સાબિત થયું છે. રાજ્ય સરકારનો આ વ્યાપક પેકેજ ખેડૂતોની આવક વધારવા, ટેકનોલોજી અપનાવવા અને ગ્રામિણ અર્થતંત્રને મજબૂત બનાવવા દિશામાં મહત્વપૂર્ણ પગલું ગણાય છે.
Gujarat Budget 2026-27: ઉચ્ચ અને ટેકનિકલ શિક્ષણને બૂસ્ટ, MYSYથી રિસર્ચ પાર્ક સુધી મોટા એલાન
