દિવાળી પર ફટાકડા ફોડવા લાગ્યા સરકારી હોસ્પિટલના કર્મચારીઓ, બેદરકારીથી બાળકને જન્મ આપતા જ મહિલાનું થયું મોત, જાણો સમગ્ર મામલો
સરકારી હોસ્પિટલમાં મેટરનીટી વોર્ડમાં સ્ટાફની બેદરકારીના કારણે 26 વર્ષીય યુવતીના મોતનો મામલો સામે આવ્યો છે.
મધ્યપ્રદેશના સાગર જિલ્લાની એક સરકારી હોસ્પિટલમાં મેટરનીટી વોર્ડમાં સ્ટાફની બેદરકારીના કારણે 26 વર્ષીય યુવતીના મોતનો મામલો સામે આવ્યો છે. આ પછી એક નર્સને સસ્પેન્ડ કરવામાં આવી છે અને ડૉક્ટરને કારણ બતાવો નોટિસ ફટકારવામાં આવી છે. એક અધિકારીએ જણાવ્યું કે, મીડિયા રિપોર્ટ બાદ આ કાર્યવાહી કરવામાં આવી છે. રિપોર્ટમાં કહેવામાં આવ્યું છે કે, મહિલાના મૃત્યુ પહેલા કેટલાક સ્ટાફ મેમ્બર્સ વોર્જની બહાર કોરિડોરમાં ફટાકડા ફોડી રહ્યા હતા અને તેઓ તેની સંભાળ રાખવામાં બેદરકારી દાખવતા હતા.
બુંદેલખંડ મેડિકલ કોલેજ અને હોસ્પિટલમાં ગુરુવારે રાત્રે મહિલાનું મોત થયું હતું. આ પછી ફટાકડા ફોડીને દિવાળી મનાવતા આ કર્મચારીઓનો એક વીડિયો પણ સોશિયલ મીડિયા પર વાયરલ થયો હતો. બુંદેલખંડ મેડિકલ કોલેજ અને હોસ્પિટલના પ્રવક્તા ડૉ. ઉમેશ પટેલે જણાવ્યું કે, મીડિયા રિપોર્ટ્સ અને વીડિયોના આધારે એક નર્સને સસ્પેન્ડ કરવામાં આવી છે. એક ડૉક્ટરને કારણ બતાવો નોટિસ જારી કરવામાં આવી છે અને પાંચ ઈન્ટર્નને ચેતવણી પત્ર આપવામાં આવ્યા છે.
તેમણે કહ્યું કે આ પાંચ ઈન્ટર્નને સ્ત્રીરોગ વિભાગના પ્રસૂતિ ખંડ અને ઓપરેશન રૂમની ફરજોમાંથી પણ દૂર કરવામાં આવ્યા છે. તે સમાચાર પણ ચેતવણીમાં ટાંકવામાં આવ્યા છે. જેમાં સ્ટાફની બેદરકારીના કારણે મહિલાનું મોત થયું હોવાનો દાવો કરવામાં આવ્યો હતો. પત્રમાં કહેવામાં આવ્યું છે કે, વીડિયો ફૂટેજ જોયા બાદ અને કર્મચારીઓ પાસેથી માહિતી મેળવ્યા બાદ આ ઘટના સાચી હોવાનું જાણવા મળ્યું છે.
પોલીસ અધિક્ષક રવિન્દ્ર મિશ્રાએ જણાવ્યું કે, મહિલાના પતિએ ફરિયાદ નોંધાવી છે કે ડિલિવરી બાદ કેટલાક ઈન્જેક્શન આપવામાં આવ્યા બાદ તેની પત્નીનું મોત થયું હતું. ફરિયાદ મુજબ મહિલાએ બાળકને જન્મ આપ્યો હતો. તેમણે કહ્યું કે વિસેરાને ફોરેન્સિક તપાસ માટે મોકલવામાં આવ્યો છે, પરંતુ હજુ સુધી કેસ નોંધવામાં આવ્યો નથી. કારણ કે આ તપાસ રિપોર્ટની રાહ જોવાઈ રહી છે.
આ પણ વાંચો: DRDO Recruitment 2021: DRDOમાં એપ્રેન્ટિસની જગ્યાઓ માટે ભરતી, નહીં આપવી પડે કોઈ પરીક્ષા