Ahmedabad: આફ્રિકન નાગરિક પ્રોટીન સપ્લીમેન્ટના પેકેટમાં કરોડોનું કોકેઈનની હેરાફેરી કરતો NCB હાથે ઝડપાયો
નારકોટિક્સ કન્ટ્રોલ બ્યુરોએ અમદાવાદ ઇન્ટરનેશનલ એરપોર્ટ પરથી 4 કિલો કોકેઇન ડ્રગ્સ લઈને આવતા આફ્રિકન નાગરિકને પકડ્યો. પકડાયેલ આરોપી સામે અગાઉ લુક આઉટ સર્ક્યુલર પણ બહાર પડયું હતું.
અમદાવાદ નારકોટિક્સ કન્ટ્રોલ ઝોનલ ઓફીસને ડ્રગ્સ મોટો જથ્થો પકડવામાં વધું એક સફળતા મળી છે. NCB એરપોર્ટ પર આફ્રિકન નાગરિકની ચાર કિલો કોકેઈન સાથે ધરપકડ કરી છે. ડ્રગ્સની હેરાફેરીમાં આફ્રિકન નાગરિકની અગાઉ પણ શંકાસ્પદ પ્રવૃત્તિ સામે આવી હતી. પરંતુ ગુરુવારે ચોક્કસ હકીકત આધારે ગુજરાત NCB ટીમને મહત્વની કડી હાથે લાગી હતી જેના આધારે અમદાવાદ ઇન્ટરનેશનલ એરપોર્ટ પર એક વિદેશી નાગરિક આજે મોટા પ્રમાણમાં કોકેઇન ડ્રગ્સ લઈને આવી રહ્યો હોવાની ગુજરાત NCB ટીમને માહિતી હતી.
જેના આધારે ડેરિક પિલ્લેઇ નામનો યુવક 11 મી ઓગસ્ટે જોહનીસબર્ગ ઇન્ડિયાની ફ્લાઇટમાં બેઠો હતો. અને અમદાવાદ આવવાનો હતો. આ અગાઉ તેની સામે લુક આઉટ સર્ક્યુલર જાહેર કરવામાં આવ્યું હતું.
NCBએ આફ્રિકન નાગરિક પાસે રહેલા સામાન તપાસતા પ્રોટીન સપ્લીમેન્ટના પેકેટ મળી આવતા શંકા ઉભી થઇ હતી. બાદ ઉંડાણપૂર્વક તપાસ કરતા સામે આવ્યું કે, આરોપીએ પેકેટના સિલ ખોલીને કોકેઇન ડ્રગ્સ ભર્યું હતું. હાલ તો અમદાવાદમાં આવેલ વિદેશી નાગરિક પાસેથી મળી આવેલા કોકેંઇનના 4 કિલો જેટલા જથ્થા બાદ NCBનું માનવું છે કે આગામી દિવસોમાં કોકેઇનની ઇન્ટરનેશનલ કેરિયરની વધુ સ્ફોટક વિગત બહાર આવી શકે છે.
એટલું જ નહીં આરોપી ડેરીક પિલ્લાઈ અગાઉ પણ અનેક વખત ડ્રગ્સની હેરાફેરી કરી ચુક્યો હોવાની આશંકા છે. જોકે મોટી માત્રામાં કબ્જે કરવામાં આવેલ આ ડ્રગ્સની આંતરરાષ્ટ્રીય બજારમાં તેની અંદાજીત કિંમત કરોડો રૂપિયા થાય છે.
આરોપી ટ્રાવેલ વિઝા પર ભારત આવ્યો હોવાનું એનસીબીની તપાસમાં બહાર આવ્યું છે. અગાઉ પણ અનેક વખત તે ભારતમાં આવ્યો છે. જો કે તેણે અગાઉ કોને કોને કેટલું ડ્રગ્સ આપ્યું છે. તે અંગે હાલ તપાસ શરૂ કરી છે. જ્યારે આરોપી પોલીસ પકડમાં ના આવે તે માટે વાયા અમદાવાદ થઈ ને દિલ્હી જવાનો પ્લાન ઘડ્યો હતો.