મોંઘવારીએ દેખાડ્યો સામાન્ય માણસને તેનો સાચો કલર, હવે ખરા કલરનાં પણ વધશે ભાવ ! જાણો શું છે કારણ

દેશનો સામાન્ય માણસ અત્યારે મોંઘવારી (Inflation) ના કારણે ખરાબ રીતે સંઘર્ષ કરી રહ્યો છે. મોંઘું ખાદ્યતેલ, ખાદ્યપદાર્થો, શાકભાજી, કઠોળ, બળતણ જેવી વસ્તુઓના ભાવ પહેલાથી જ સામાન્ય માણસ ઉપર કહેર વરસાવી રહ્યા છે. આ દરમિયાન, એવા અહેવાલો પણ મળી રહ્યા છે કે પેઇન્ટના ઊંચા ભાવો પણ ટૂંક સમયમાં દેશના સામાન્ય માણસને આંચકો આપશે. જી હા, દેશની અગ્રણી પેઇન્ટ કંપનીઓ (Paint companies) ટૂંક સમયમાં જ તેના તમામ ઉત્પાદનોની કિંમતો વધારવા જઈ રહી છે.

આ કલર કંપનીઓએ તેના ઉત્પાદનોના ભાવમાં વધારાનું મુખ્ય કારણ કાચા માલના ઊંચા ભાવને ગણાવ્યું છે. કંપનીઓનું કહેવું છે કે તેમને તેમના ઉત્પાદનો બનાવવા માટે જરૂરી કાચા માલની કિંમતમાં નોંધપાત્ર વધારો થયો છે. જેના કારણે તેઓએ પોતાની પ્રોડક્ટની કિંમતોમાં પણ વધારો કરવાનો નિર્ણય લીધો છે.

કાચા માલના ઊંચા ભાવને કારણે વધશે ભાવ

આ કલર કંપનીઓ મુખ્યત્વે તેના ઉત્પાદનોના ઉત્પાદનમાં ટાઇટેનિયમ ડાયોક્સાઇડ (TiO) અને ક્રૂડ તેલનો વ્યાપકપણે ઉપયોગ કરે છે. કલર  કંપની દ્વારા ઉપયોગમાં લેવાતા કુલ કાચા માલના ભાવમાં 20 થી 25 ટકા ટાઇટેનિયમ ડાયોક્સાઇડ અને 30 થી 35 ટકા ક્રૂડ ઓઇલનો હિસ્સો હોય છે.

તમને જણાવી દઈએ કે છેલ્લા એક વર્ષમાં કાચા તેલની કિંમત લગભગ બમણી થઈ ગઈ છે. બીજી તરફ ટાઈટેનિયમ ડાયોક્સાઈડના ભાવમાં પણ 20 થી 25 ટકાનો વધારો થયો છે. કાચા માલના વધતા ભાવે કંપનીના માર્જિન પર પણ ઊંડી અસર કરી છે. એક સમયે કંપનીને તેના ઉત્પાદનો પર 26 ટકા સુધીનું માર્જિન મળતું હતું અને તે ઘટીને માત્ર 12 થી 13 ટકા થઈ ગયું છે.

આ વર્ષે કુલ 20-22 ટકા મોંઘા થશે કંપનીના ઉત્પાદનો.

મીડિયા રિપોર્ટ્સ અનુસાર, કલર કંપનીઓ આ વખતે તેની પ્રોડક્ટ્સ 4 થી 6 ટકા મોંઘી કરી શકે છે. કંપનીએ કહ્યું છે કે તેઓ 5 ડિસેમ્બર, 2021થી તેમના ઉત્પાદનોની કિંમતોમાં વધારો કરશે. આ પહેલાં પણ કંપનીઓએ આ વર્ષે ઘણી વખત ભાવ વધાર્યા છે. જો આપણે ડિસેમ્બરમાં વધતી કિંમતો પર નજર કરીએ તો, કંપની આ વર્ષે તેના માલની કિંમતમાં 20 થી 22 ટકાનો વધારો કરશે.

આ પણ વાંચો :  IPO : ચાલુ વર્ષે અત્યાર સુધીમાં 49 કંપનીઓએ IPO દ્વારા 1.01 લાખ કરોડ રૂપિયા એકત્ર કર્યા , જાણો આગામી સમય માટે શું છે નિષ્ણાંતોના અભિપ્રાય