IPO : આદિત્ય બિરલા કેપિટલ અને રોબિનહૂડ માર્કેટ્સ લાવી રહ્યા છે રોકાણ માટેની તક , જાણો વિગતવાર

કોરોના કેસની સંખ્યા ચિંતાજનક સ્તરે પહોંચવા છતાં શેરબજાર(Share market)માં તેજીનો દોર દેખાઈ રહ્યો છે. ચાલુવર્ષે IPO ખુબ સફળ રહ્યા છે. આ વર્ષે અત્યાર સુધીમાં આવેલા મોટાભાગના IPOએ રોકાણકારોને ઉત્તમ વળતર આપ્યું છે આટલુંજ નહિ વર્ષ 2020 પણ ભારતીય આઈપીઓ માર્કેટ માટે જબરદસ્ત સાબિત થયું હતું.

ગત વર્ષે આશરે 15 મોટી કંપનીઓએ તેમના આઈપીઓથી આશરે 31,000 કરોડ રૂપિયા ઉભા કર્યા છે. આ જ કારણ છે કે કંપનીઓ હવે સતત IPO લાવવા તરફ ધ્યાન કેન્દ્રિત કરી રહી છે. વધુ બે કંપનીઓ ipo પર વિચાર કરી રહી છે .રોબિનહુડ માર્કેટ્સ ઇન્ક.(Robinhood Markets Inc.) અને આદિત્ય બિરલા કેપિટલ (Aditya Birla Capital) બંને કંપનીઓ પણ ટૂંક સમયમાં IPOની યોજના બનાવી રહી છે.

આદિત્ય બિરલા કેપિટલ
આદિત્ય બિરલા કેપિટલ લિસ્ટ થવા તૈયારી કરી રહીછે. સૂત્રોના જણાવ્યા અનુસાર, કંપની તેના મ્યુચ્યુઅલ ફંડ બિઝનેસ બિરલા સન લાઇફ એએમસીના આઈપીઓની યોજના બનાવવા માટે બેન્કર્સ સાથે બેઠક કરી રહી છે. કંપની આગામી 10 દિવસમાં માર્કેટ રેગ્યુલેટર સેબી સાથે આઈપીઓ દસ્તાવેજો ફાઇલ કરી શકે છે. બિરલા સન લાઇફના આઈપીઓની કિંમત 20,000-25,000 કરોડ રૂપિયાની નજીક હોઈ શકે છે.

રોબીનહૂડ માર્કેટ્સ ઇન્ક.
રોબિનહૂડ માર્કેટ્સ ઇન્ક. આઇપીઓ શરૂ કરવાની તૈયારી કરી રહ્યું છે. કંપની પોતાનો વ્યવસાય વધારવા માટે આઈપીઓ દ્વારા નાણાં એકત્ર કરવા માંગે છે. જોકે, કંપનીએ આ અંગે હજી સુધી કંઈ સત્તાવાર કહ્યું નથી. મળતી માહિતી મુજબ, કંપનીની ક્રેડિટ લાઇનમાં બેંકો દ્વારા 600 મિલિયન ડોલર શામેલ કરી છે.