શ્રીલંકાના ખેડુતની વહારે આવી ભારત સરકાર, 65 હજાર ટન યુરિયા મોકલશે

આર્થિક સંકટમાં ઘેરાયેલા શ્રીલંકાની મદદ માટે ફરી એકવાર ભારત આગળ આવ્યું છે. પાડોશી દેશને સતત ઈંધણ સપ્લાય કર્યા બાદ હવે ભારત શ્રીલંકાના ડાંગરના પાકને બચાવવા માટે રાહત મોકલી રહ્યું છે. પ્રાપ્ત માહિતી અનુસાર ભારતે સુનિશ્ચિત કર્યું છે કે વર્તમાન પરિસ્થિતિ ડાંગરના ઉત્પાદનને અસર ન થાય, જેથી ભારત તરત જ 65 હજાર મેટ્રિક ટન યુરિયા (Urea) સપ્લાય કરશે. શ્રીલંકામાં ડાંગર બે સિઝનમાં ઉગાડવામાં આવે છે. પ્રથમ સિઝન માટે વાવણી મે મહિનામાં શરૂ થાય છે. બીજી સીઝનમાં સપ્ટેમ્બરમાં વાવણી શરૂ થાય છે. સપ્ટેમ્બરની સિઝનમાં ધાનના પાક (Paddy) પર પડેલી અસરને કારણે સરકાર માટે ચાલુ સિઝનમાં ધાનના પાકનું ઉત્પાદન વધારવું ખૂબ જ જરૂરી બની ગયું છે.

શ્રીલંકા હાલમાં તેની આઝાદી પછીના સૌથી મોટા આર્થિક સંકટમાંથી પસાર થઈ રહ્યું છે. દેશમાં ખાદ્ય પદાર્થોની અછત છે. હાલમાં, સરકાર પરિસ્થિતિને પાટા પર લાવવાનો પ્રયાસ કરી રહી છે, જેમાં સૌથી મહત્વની બાબત એ છે કે દેશના ખાદ્ય ઉત્પાદન પર કોઈ અસર ન થવી જોઈએ. આ કારણોસર, સિઝનની શરૂઆત પહેલા, શ્રીલંકાની સરકારે જરૂરી પગલાં લેવાનું શરૂ કરી દીધું છે. જેમાંથી એક યુરિયાનો પુરવઠો પણ છે.

આ અઠવાડિયે યુરિયા સપ્લાય પર ચર્ચા થઈ

કોલંબોના મીડિયાના અહેવાલો અનુસાર, ભારતમાં શ્રીલંકાના રાજદૂત આ અઠવાડિયે નવી દિલ્હીમાં ફર્ટિલાઇઝર સેક્રેટરી રાજેશ કુમાર ચતુર્વેદીને મળ્યા હતા. જેમાં ચાલુ સિઝન માટે ખાતરના પુરવઠા અંગે ચર્ચા કરવામાં આવી હતી. શ્રીલંકાએ યુરિયાના સપ્લાય માટે ભારતનો આભાર માનતું નિવેદન જાહેર કર્યું છે. શ્રીલંકાના દૂતાવાસે એક નિવેદનમાં જણાવ્યું હતું કે ભારત સરકારે દેશમાંથી યુરિયાની નિકાસ પર પ્રતિબંધ હોવા છતાં શ્રીલંકાને યુરિયા મોકલવાનો નિર્ણય લીધો છે.

ભારત સરકારે માહિતી આપી છે કે સરકારી કંપની દ્વારા, વહેલામાં વહેલી તકે ખાતરને શ્રીલંકા પહોંચાડવાની વ્યવસ્થા કરવામાં આવી રહી છે. આ સાથે, બંને પક્ષોએ વર્તમાન ક્રેડિટ લાઇન દ્વારા અને ત્યાર બાદ ભારત દ્વારા શ્રીલંકાને રાસાયણિક ખાતરોની સપ્લાય કરવાની રીતો પર વિચારણા કરી છે. ભારતે જાન્યુઆરીથી લોન, ક્રેડિટ લાઇન અને ક્રેડિટ સ્વેપ દ્વારા આર્થિક સંકટમાં શ્રીલંકાને 3 બિલિયન ડોલર સુધીની સહાય આપી છે.

અર્થતંત્ર પર કૃષિ નીતિઓની અસર

ગયા વર્ષે, શ્રીલંકાની સરકારે રાસાયણિક ખાતરો પર સંપૂર્ણ પ્રતિબંધ મૂક્યો હતો. સરકારની યોજના ધીમે ધીમે સમગ્ર ખેતીને ઓર્ગેનિકમાં રૂપાંતરિત કરવાની હતી, જો કે, જૈવિક ખાતરના મર્યાદિત પુરવઠાને કારણે, કૃષિ ઉત્પાદન, ખાસ કરીને ચોખા અને ચા, પર પ્રતિકૂળ અસર થઈ અને ઉત્પાદનમાં ઘટાડો થવાથી ભાવમાં વધારો થયો. આ પછી, કોવિડ અને રશિયા યુક્રેન સંકટને કારણે સ્થિતિ નિયંત્રણમાંથી બહાર થઈ ગઈ અને મોંઘવારી દર 47 મહિનાના ઉચ્ચતમ સ્તર પર પહોંચી ગયો, જ્યારે ખાદ્ય મોંઘવારી દર 12 ટકાની આસપાસ પહોંચી ગયો છે. બગડતી પરિસ્થિતિને જોતા શ્રીલંકાની સરકારે ધીમે ધીમે પ્રતિબંધો હળવા કરવાનું શરૂ કર્યું છે.