મોંઘા મોબાઈલ, ટીવી, ફ્રિજમાંથી મળશે રાહત, સરકારે કર્યો મોટો પ્લાન

જો તમે તમારા ઘર માટે સ્માર્ટફોન અથવા સ્માર્ટ ટીવી, ફ્રિજ, એસી સહિત અન્ય હોમ એપ્લાયન્સિસ ખરીદવાનું વિચારી રહ્યા છો, તો તમારા માટે સારા સમાચાર છે. સામાન્ય જનતાને મોંઘવારીમાંથી રાહત આપવા માટે સરકારે એક શાનદાર યોજના બનાવી છે.

હવે લોકોને ટીવી, રેફ્રિજરેટર, મોબાઈલ ફોન ખરીદવા માટે વધારે પૈસા ખર્ચવાની જરૂર નથી. નાણા મંત્રાલય પાસેથી મળેલી માહિતી અનુસાર GST કાઉન્સિલે ઘરેલું ઉત્પાદનો અને મોબાઇલ ફોન્સ પર ટેક્સ દર ઘટાડવાનો નિર્ણય લીધો છે. આ સાથે લોકોને મોબાઈલ, ટીવી અને ફ્રીજની ખરીદી કરીને મોંઘવારીમાંથી રાહત મળવાની છે.

GSTના સાત વર્ષ પૂર્ણ થયા

નવી ઈનડાયરેક્ટ ટેક્સ સિસ્ટમ તરીકે GSTને સોમવારે સાત વર્ષ પૂરા થયા છે. GSTમાં લગભગ 17 સ્થાનિક ટેક્સનો સમાવેશ કરવામાં આવ્યો હતો અને તે 1 જુલાઈ 2017ના રોજ લાગુ કરવામાં આવ્યો હતો. સાતમા GST દિવસની થીમ ‘સશક્ત વેપાર, સમગ્ર વિકાસ’ છે.

મંત્રાલયે સોશિયલ મીડિયા પ્લેટફોર્મ X પર લખ્યું કે, GSTના અમલ પછી ઘરગથ્થુ ચીજવસ્તુઓ પરના ટેક્સના દરમાં ઘટાડો થવાથી ઘરના ઉપકરણો અને મોબાઈલ ફોન પરના GST દ્વારા દરેક પરિવારને ખુશી અને રાહત મળી છે. GST કરદાતાઓનો આધાર એપ્રિલ 2018 સુધી 1.05 કરોડ હતો, જે એપ્રિલ 2024માં વધીને 1.46 કરોડ થયો છે.

સેન્ટ્રલ બોર્ડ ઓફ ઇનડાયરેક્ટ ટેક્સીસ કસ્ટમ્સ (CBIC)ના અધ્યક્ષ સંજય કુમાર અગ્રવાલે સમાચાર એજન્સી પીટીઆઈને જણાવ્યું હતું કે, “અમે વધુ સારા અનુપાલન સાથે કરદાતાના આધારમાં મોટો ઉછાળો જોયો છે.” ઘરગથ્થુ ચીજવસ્તુઓ પર જીએસટી પહેલા અને પછીના ટેક્સ દરોનો તુલનાત્મક ચાર્ટ આપતા મંત્રાલયે કહ્યું કે, જીએસટીએ જીવન જીવવાનું સરળ બનાવ્યું છે.

આના પર ઓછો ખર્ચ થયો હતો

મંત્રાલયે કહ્યું કે, GST લાગુ થયા બાદ દરેક ઘરમાં ખાદ્ય પદાર્થો અને મોટા પાયે વપરાશની વસ્તુઓ પરનો ખર્ચ ઘટ્યો છે. GSTના અમલ પહેલા પેકેજ વગરના ઘઉં, ચોખા, દહીં અને લસ્સી જેવી ખાદ્ય ચીજો પર 2.5-4 ટકા ટેક્સ લાદવામાં આવ્યો હતો, જ્યારે GST લાગુ થયા પછી ટેક્સ શૂન્ય થઈ ગયો છે.

કોસ્મેટિક્સ, કાંડા ઘડિયાળો, પ્લાસ્ટિકની સેનિટરી પ્રોડક્ટ્સ, દરવાજા અને બારીઓ, ફર્નિચર અને ગાદલા જેવી ઘરગથ્થુ વસ્તુઓ પર GST સિસ્ટમમાં 18 ટકાના દરે ટેક્સ લાગે છે, જ્યારે અગાઉ એક્સાઇઝ ડ્યૂટી અને વેટ સિસ્ટમમાં 28 ટકા ટેક્સ હતો.

આ સામાન પર GST ઘટ્યો

મંત્રાલયે કહ્યું કે, અગાઉ મોબાઈલ ફોન, 32 ઈંચ સુધીના ટીવી, રેફ્રિજરેટર, વોશિંગ મશીન, ઈલેક્ટ્રીકલ ઉપકરણો (એર કંડીશનર સિવાય), ગીઝર અને પંખા પર 31.3 ટકા ટેક્સ હતો, જે GST શાસનમાં ઘટાડીને 18 ટકા કરવામાં આવ્યો છે.

નાણા મંત્રાલયે કહ્યું કે, નાના કરદાતાઓ માટે અનુપાલન બોજ ઘટાડવામાં આવ્યો છે. GST કાઉન્સિલે નાણાકીય વર્ષ 2023-24માં 2 કરોડ રૂપિયા સુધીનું વાર્ષિક ટર્નઓવર ધરાવતા કરદાતાઓ માટે વાર્ષિક રિટર્ન ફાઇલ કરવાની જરૂરિયાતને દૂર કરવાની ભલામણ કરી છે.