પેન્શનરો આ મહિનાની 30મી તારીખ સુધીમાં પોતાનું જીવન પ્રમાણપત્ર જમા કરાવી શકે છે. પરંતુ આ નિયમ તમામ પ્રકારના પેન્શનરોને લાગુ પડતો નથી. કર્મચારી ભવિષ્ય નિધિ સંગઠન એટલે કે EPFOએ આ અંગે ઘણી માહિતી આપી છે. જેઓ EPFOની કર્મચારી પેન્શન યોજના EPS 1995 હેઠળ પેન્શન મેળવે છે, તેમને જીવન પ્રમાણપત્ર અંગે થોડી રાહત મળી છે. EPFOએ કહ્યું છે કે EPSના પેન્શનરો વર્ષના કોઈપણ સમયે તેમનું જીવન પ્રમાણપત્ર સબમિટ કરી શકે છે.
EPFO મુજબ જ્યારે પણ EPS પેન્શનર પોતાનું જીવન પ્રમાણપત્ર સબમિટ કરશે, તે એક વર્ષ માટે માન્ય રહેશે. એટલે કે, જો કોઈ પેન્શનર 1 ડિસેમ્બરે પણ તેનું જીવન પ્રમાણપત્ર સબમિટ કરે છે તો તે આગામી 1 વર્ષ માટે માન્ય રહેશે. EPFOએ ટ્વીટ કરીને આ અંગેની માહિતી આપી છે.
ટ્વીટમાં કહેવામાં આવ્યું છે કે પેન્શનધારકો કોઈપણ સમયે તેમનું જીવન પ્રમાણપત્ર જમા કરાવી શકે છે. જે તારીખે આ પ્રમાણપત્ર સબમિટ કરવામાં આવે તે તારીખથી તે આગામી એક વર્ષ માટે માન્ય રહેશે. આ રીતે જો કોઈ પેન્શનર 31મી ડિસેમ્બરે તેનું જીવન પ્રમાણપત્ર સબમિટ કરે છે તો તેણે આગામી 31મી ડિસેમ્બરના રોજ અથવા તે પહેલાં જીવન પ્રમાણપત્ર સબમિટ કરવું પડશે. જો આ સમયમર્યાદા ચૂકી જાય તો જાન્યુઆરી 2023માં મળતું પેન્શન બંધ થઈ શકે છે. એટલા માટે તે તારીખ યાદ રાખવી મહત્વપૂર્ણ છે કે જેના દ્વારા નવું પ્રમાણપત્ર સબમિટ કરવાનું છે.
જીવન પ્રમાણપત્ર સબમિટ કર્યાની તારીખથી એક વર્ષ માટે માન્ય છે. અગાઉ નિયમ બનાવવામાં આવ્યો હતો કે તમામ EPS પેન્શનરોએ નવેમ્બર મહિનામાં ડિજિટલ લાઇફ સર્ટિફિકેટ જમા કરાવવું પડશે. આ નિયમને કારણે પેન્શનરોને ઘણી સમસ્યાઓનો સામનો કરવો પડી રહ્યો છે. ડિજિટલ લાઇફ સર્ટિફિકેટ જમા કરાવવા માટે લાંબી કતારો અને ભીડ પણ જોવા મળી રહી છે.
પેન્શનરો પેન્શન વિતરણ એજન્સી, કોમન સર્વિસ સેન્ટર, IPPB અથવા પોસ્ટ ઓફિસ અથવા પોસ્ટમેન, ઉમંગ એપ, નજીકની EPFO ઓફિસમાં તેમનું જીવન પ્રમાણપત્ર ડિજિટલ રીતે સબમિટ કરી શકે છે. જીવન પ્રમાણપત્ર સબમિટ કરવા માટે પેન્શનરે PPO નંબર, આધાર નંબર, બેંક ખાતાની વિગતો અને આધાર સાથે જોડાયેલ મોબાઈલ નંબર આપવાનો રહેશે. આજકાલ ફેસ ઓથેન્ટિકેશન ટેક્નોલોજી દ્વારા લાઈફ સર્ટિફિકેટ જમા કરાવવાની સુવિધા પણ ઉપલબ્ધ છે, જેના માટે ક્યાંય જવાની જરૂર નથી. આ કામ તમારા મોબાઈલમાં હાજર એપથી કરી શકાય છે.