મોંઘવારીનો વધુ એક માર! નેચરલ ગેસની કિંમતમાં થશે આટલો વધારો, CNGના રેટ પર થશે સીધી અસર

સરકારે કુદરતી ગેસ અથવા ઘરેલુ ગેસના ભાવમાં 62 ટકાનો મોટો વધારો કરવાની જાહેરાત કરી છે. ઓક્ટોબર-માર્ચના છ માસિક ગાળા માટે (ઓક્ટોબર 2021 થી માર્ચ 2022) કુદરતી ગેસની કિંમત વધીને 2.90 ડોલર MMBTU (મેટ્રિક મિલિયન બ્રિટિશ થર્મલ યુનિટ્સ) થઈ ગઈ છે. જ્યારે એપ્રિલ-સપ્ટેમ્બર 2021ના છ માસિક ગાળા માટે આ કિંમત MMBTU દીઠ 1.79 ડોલર હતી.

જો કુદરતી ગેસનું નિર્માણ મુશ્કેલ સ્થળોએ કરવામાં આવે છે, જ્યાં તેનું ઉત્પાદન કરવું વધુ જોખમી છે તો તેની કિંમત 6.13 ડોલર MMBTU નક્કી કરવામાં આવી છે. આ ગેસનો ઉપયોગ ખાતર તૈયાર કરવા, વીજળી અને સીએનજી ગેસ બનાવવા માટે થાય છે. આવી સ્થિતિમાં ટુંક સમયમાં હવે સીએનજી પણ મોંઘું થઈ જશે. પેટ્રોલ અને ડીઝલના ભાવ પહેલાથી જ આસમાને છે. આવી સ્થિતિમાં હવે સીએનજીની સવારી પણ ઘણી મોંઘી થશે.

ઘરેલું ગેસની કિંમત વર્ષમાં બે વખત નક્કી કરવામાં આવે છે, જે દરેક છ મહિના માટે લાગુ પડે છે. 30 સપ્ટેમ્બરે, આગામી છ મહિના માટે એટલે કે માર્ચ સુધી દર નક્કી કરવામાં આવે છે. 31 માર્ચે રેટ આગામી છ મહિના માટે એટલે કે 30 સપ્ટેમ્બર સુધી નક્કી કરવામાં આવે છે. નાણાકીય વર્ષ 2018-19થી સ્થાનિક કંપનીઓ દ્વારા ઉત્પાદિત ગેસના ભાવ પર દબાણ જોવા મળી રહ્યું છે. નાણાકીય વર્ષ 2019ના એપ્રિલ-સપ્ટેમ્બર છ માસ માટે સ્થાનિક ગેસની કિંમત MMBTU દીઠ  3.69 ડોલર હતી.

ONGC, Oil India માટે સારા સમાચાર

એવું માનવામાં આવે છે કે એપ્રિલ 2022માં ફરી એકવાર કુદરતી ગેસના ભાવમાં મોટો વધારો થશે. આ સમાચાર ONGC, ઓઈલ ઈન્ડિયા, HOEC જેવી કંપનીઓ માટે ખૂબ સારા છે. આ તે કંપનીઓ છે જે કુદરતી ગેસનું ઉત્પાદન કરે છે.

બીજી બાજુ તેનો ઉપયોગ કરતી કંપનીઓ માટે આ સારા સમાચાર નથી. આવી સ્થિતિમાં ફર્ટિલાઈઝર કંપની, IGL, ગુજરાત ગેસ, MGL, કેટલીક વીજ કંપનીઓ માટે આ ખરાબ સમાચાર છે. આ સમાચારની અસર શુક્રવારે તેમના સ્ટોક્સ પર પણ જોવા મળશે.

આ પણ વાંચો :  ભારતીય અર્થતંત્રને લઈને મુખ્ય આર્થિક સલાહકાર કે.વી. સુબ્રમણ્યમે આપ્યું નિવેદન, કહ્યું ‘આ નાણાકીય વર્ષમાં ગ્રોથરેટ રહેશે 10 ટકા’