સરકારી કર્મચારીઓની આ યોજનાના નિયમોમાં કરાયો ફેરફાર, જો ધ્યાન નહિ રાખો તો થશે નુકસાન

જનરલ પ્રોવિડન્ટ ફંડ (GPF)ના નિયમોમાં કેટલાક ફેરફાર કરવામાં આવ્યા છે. હવે આમાં એક નાણાકીય વર્ષમાં માત્ર 5 લાખ રૂપિયા સુધીનું રોકાણ કરી શકાય છે. GPF એ PPF જેવી જ યોજના છે પરંતુ તેમાં માત્ર સરકારી કર્મચારીઓ જ યોગદાન આપી શકે છે. જનરલ પ્રોવિડન્ટ ફંડ (સેન્ટ્રલ સર્વિસ) રૂલ્સ, 1960 મુજબ અત્યાર સુધી આ ફંડમાં પૈસા મૂકવા માટે કોઈ ઉપલી મર્યાદા ન હતી. અત્યાર સુધી કર્મચારીઓ તેમના પગારની ટકાવારી મૂકી શકતા હતા. આ નિયમો 15 જૂન 2022ના રોજ સરકારી સૂચના દ્વારા બદલવામાં આવ્યા હતા.

નવા નિયમો અનુસાર એક નાણાકીય વર્ષમાં GPF ખાતામાં 5 લાખ રૂપિયાથી વધુ રકમ ન હોઈ શકે. હવે, 11 ઓક્ટોબર 2022ના રોજ, પેન્શન અને પેન્શનર્સ કલ્યાણ વિભાગ (DoPPW) એ ઓફિસ મેમોરેન્ડમમાં આ જ વાત કહી છે. નોંધ જણાવે છે કે જનરલ પ્રોવિડન્ટ ફંડ (સેન્ટ્રલ સર્વિસ) નિયમો 1960 મુજબ સબસ્ક્રાઇબરના સંબંધમાં GPF કુલ વેતનના 6 ટકાથી ઓછું ન હોવું જોઈએ. જો કે, આના પર કોઈ ઉચ્ચ મર્યાદા નહોતી.

GPF શું છે?

GPF એ પ્રોવિડન્ટ ફંડ (PF) એકાઉન્ટનો એક પ્રકાર છે, પરંતુ તે તમામ કર્મચારીઓને લાગુ પડતું નથી. જીપીએફનો લાભ માત્ર સરકારી કર્મચારીઓને જ મળે છે. આ લાભ મેળવવા માટે, સરકારી કર્મચારીઓએ તેમના પગારનો ચોક્કસ ભાગ GPFમાં ફાળો આપવો પડશે. સરકારી કર્મચારીઓની ચોક્કસ શ્રેણી માટે GPFમાં યોગદાન ફરજિયાત છે. રોજગારના સમયગાળા દરમિયાન કર્મચારી દ્વારા GPFમાં આપેલા યોગદાનમાંથી કુલ રકમ કર્મચારીને નિવૃત્તિ સમયે ચૂકવવામાં આવે છે. સરકાર જીપીએફમાં ફાળો આપતી નથી, માત્ર કર્મચારી દ્વારા ફાળો આપવામાં આવે છે. નાણા મંત્રાલય દર ક્વાર્ટરમાં જીપીએફના વ્યાજ દરમાં ફેરફાર કરે છે.

GPF પર વ્યાજ દર

હાલમાં, GPF પર મળતું વ્યાજ PPF જેટલું જ છે. ડિપાર્ટમેન્ટ ઓફ ઈકોનોમિક અફેર્સ (DEA) એ ઓક્ટોબરથી ડિસેમ્બર 2022ના ત્રિમાસિક ગાળાના વ્યાજ દરોમાં કોઈ ફેરફાર કર્યો નથી. હાલમાં તે 7.1 ટકા છે. આ ત્રિમાસિક ગાળા માટે CPF, AISPF, SRPF અને AFPPF જેવી અન્ય યોજનાઓના વ્યાજ દરો પણ 7.1 ટકા છે.