દેશના નવ મોટા શહેરોમાં ઓફિસ સ્પેસની માંગમાં મોટો વધારો, જાણો શું છે અમદાવાદની સ્થિતિ?

માર્ચ ક્વાર્ટરની સરખામણીમાં એપ્રિલ-જૂન ક્વાર્ટર દરમિયાન દેશના નવ મોટા શહેરોમાં લીઝ પર ઓફિસ સ્પેસ(Office Space)ની માંગ 61 ટકા વધીને1.82 કરોડ ચોરસ ફૂટની થઈ છે. રિયલ એસ્ટેટ(Real Estate) કન્સલ્ટન્ટ CBREએ સોમવારે એપ્રિલ-જૂન ક્વાર્ટર માટે જાહેર  કરેલા ડેટામાં આ માહિતી આપી હતી. CBRE એ એક નિવેદનમાં જણાવ્યું હતું કે દેશમાં લીઝિંગ પ્રવૃત્તિઓ મજબૂત કામગીરી સાથે વર્ષ 2022 ના બીજા ક્વાર્ટરમાં રેકોર્ડ સ્તરે પહોંચી છે. કંપનીના જણાવ્યા અનુસાર વર્ષ 2021ના જૂન ક્વાર્ટરની સરખામણીએ આ વર્ષના બીજા ક્વાર્ટરમાં લીઝ્ડ ઓફિસ સ્પેસની એકંદર માંગમાં 220 ટકાનો વધારો થયો છે.

અમદાવાદની સ્થિતિ શું છે ?

ત્રિમાસિક ધોરણે પાછલા ક્વાર્ટરની સરખામણીએ જૂન 2022 ના રોજ પૂરા થયેલા ત્રિમાસિક ગાળામાં દિલ્હી-NCRમાં લીઝ્ડ ઓફિસ સ્પેસની માંગ બમણીથી વધુ વધીને 39 લાખ ચોરસ ફૂટ થઈ છે એમ અહેવાલમાં જણાવાયું છે. રિપોર્ટ અનુસાર ચાલુ વર્ષના બીજા ત્રિમાસિક ગાળા દરમિયાન મુંબઈમાં લીઝ્ડ ઓફિસ સ્પેસની માંગ 183 ટકા વધીને 21 લાખ સ્ક્વેર ફૂટ, બેંગલુરુમાં 59 ટકા વધીને 56 લાખ સ્ક્વેર ફૂટ અને હૈદરાબાદમાં 88 ટકા વધી 26 લાખ ચોરસ ફૂટ પર પહોંચી ગયો છે.આ ઉપરાંત, ક્વાર્ટરમાં લીઝ્ડ ઓફિસ સ્પેસની માંગ પુણેમાં 17  લાખ ચોરસ ફૂટ, કોલકાતામાં પાંચ લાખ ચોરસ ફૂટ, કોચીમાં એક લાખ ચોરસ ફૂટ અને અમદાવાદમાં ત્રણ લાખ ચોરસ ફૂટ હતી.

મકાનોના વેચાણમાં બમ્પર વધારો

આ ઉપરાંત વર્તમાન વર્ષના જાન્યુઆરી-જૂનના પ્રથમ છ મહિનામાં માંગમાં સુધારો અને નીચી આધાર અસરને કારણે દિલ્હી-એનસીઆરમાં મકાનોના વેચાણમાં અઢી ગણો વધારો થયો છે. વાર્ષિક ધોરણે આ સમયગાળા દરમિયાન મકાનોની કિંમતમાં લગભગ સાત ટકાનો વધારો થયો છે. પ્રોપર્ટી કન્સલ્ટન્ટ નાઈટ ફ્રેન્ક ઈન્ડિયાના રિપોર્ટમાં આ માહિતી આપવામાં આવી છે.

નાઈટ ફ્રેન્કના રિપોર્ટ ઈન્ડિયન રિયલ એસ્ટેટ H1-2022માં રહેણાંક અને ઓફિસ માર્કેટ્સ એવું કહેવામાં આવ્યું છે કે જાન્યુઆરી-જૂનના પ્રથમ છ મહિનામાં દિલ્હી-એનસીઆરમાં રહેણાંક મિલકતોનું વેચાણ અઢી ગણું વધીને 29,101 યુનિટ થયું છે. વર્ષ. આપણે જણાવી દઈએ કે કોવિડ-19 મહામારીની બીજી લહેરને કારણે 2021ના પ્રથમ છ મહિનામાં મકાનોના વેચાણ પર ખરાબ અસર પડી હતી.