ઉમરગામમાં વૃદ્ધાને બંધક બનાવી હથિયારબંધ લૂંટ, રોકડ અને દાગીના ચોરાયા, જુઓ CCTV Video

વલસાડના ઉમરગામમાં હથિયારની અણીએ લૂંટની ગંભીર ઘટના સામે આવી છે. સંજાણ બંદર રોડ પર આવેલા એક બંગલામાં એકલા રહેતા વૃદ્ધાને બંધક બનાવી તસ્કરોએ લૂંટ ચલાવી હતી. લૂંટારુઓ 90 હજાર રોકડા અને દાગીના લઈને ફરાર થઈ ગયા હતા.

પ્રાથમિક માહિતી અનુસાર, મોડી રાત્રે અંદાજે બે થી અઢી વાગ્યાના સુમારે બુકાનીધારી શખ્સોએ બારી તોડીને ઘરમાં પ્રવેશ કર્યો હતો. વૃદ્ધાના રૂમમાં ઘૂસીને તેમણે ચાકુ બતાવીને ધમકી આપી હતી કે જો અવાજ કરશે તો મારી નાખશે. વૃદ્ધાએ જણાવ્યું હતું કે તેઓ ઘરમાં એકલા રહે છે અને તેમના છોકરાઓ બહાર છે. લૂંટ બાદ તસ્કરો ફરાર થઈ ગયા હતા. વૃદ્ધાએ સવારે પાંચ વાગ્યે તેમના ભત્રીજાને ફોન કરીને જાણ કરી હતી, જેમણે પોલીસમાં ફરિયાદ નોંધાવી. પોલીસે સીસીટીવી ફૂટેજના આધારે તપાસ શરૂ કરી છે અને આરોપીઓને પકડવા માટે સઘન પ્રયાસો હાથ ધર્યા છે.