Ahmedabad : ઈસ્કોન ઓવરબ્રિજ પર અકસ્માત (Iskcon Bridge Accident) સર્જી 9 લોકોને મોતને ઘાટ ઉતારનાર તથ્ય પટેલ હાલ જેલમાં છે, પરંતુ આ અકસ્માત જે કારથી સર્જાયો હતો. તે જેગુઆર કાર મૂળ માલિકને પરત મળશે. આ માટે 1 કરોડના બોન્ડ પર જેગુઆર કાર મૂળ માલિકને સોંપવા ગ્રામ્ય કોર્ટે હુકમ કર્યો છે. અકસ્માત બાદ કાર પોલીસના કબ્જામાં છે.
આ જેગુઆર કાર તથ્ય પટેલના પિતા પ્રજ્ઞેશ પટેલના બિઝનેસ પાર્ટનર ક્રિશ વારિયાની હતી અને તેણે આ કાર મિત્રતામાં તથ્ય પટેલને આપી હતી. તથ્ય પટેલે જગુઆર કારથી અકસ્માત સર્જી 9 લોકોનો જીવ લીધો હતો. અકસ્માત બાદ આ કાર પોલીસના કબ્જામાં હતી. ત્યારે આજે ગ્રામ્ય કોર્ટે 1 કરોડના બોન્ડ પર જેગુઆર કાર મૂળ માલિકને સોંપવા આદેશ કર્યો છે. સાથે જ ગમે તે સમયે કાર પુરાવા રૂપે હાજર કરવાની શરતે મૂળ માલિકને પરત કરવા હુકમ કર્યો છે.