Valsad : રાજ્યમાં અગાઉ અનેક પેપર લીક (Paper leak) થયા બાદ હવે વધુ એક પેપરલીકની ઘટના વલસાડમાં સામે આવી છે. 29 સપ્ટેમ્બરના રોજ શાહ એન.એચ. કોમર્સ કોલેજનું બીકોમ સેમ-5નું એડવાન્સ એકાઉન્ટનું પેપર લીક થયું હતું. તે દિવસે પેપર મોકૂફ રખાયું હતું અને 3 ઓક્ટોબર એટલે કે આજે પેપર લેવાનો નિર્ણય લેવાયો હતો, પરંતુ આજે વિદ્યાર્થીઓએ ઉગ્ર વિરોધ નોંધાવ્યો.
વિદ્યાર્થીઓએ સૂત્રોચ્ચાર કરીને કૉલેજમાં હોબાળો મચાવ્યો અને તાત્કાલિક પગલાં લેવાની માગ કરી. વિદ્યાર્થીઓનો આક્ષેપ છે કે કૉલેજના હેમરાજ ચૌહાણ નામના પ્રોફેસરે જ આ પેપર લીક કર્યું છે, કારણ કે તેમના વિષયનું જ પેપર લીક થયું છે. તેઓ પર્સનલ ટ્યુશન પણ લેતા હોવાનો વિદ્યાર્થીઓનો આક્ષેપ છે. વિદ્યાર્થીઓ પ્રમાણે સૌથી પહેલા આ પેપર પ્રોફેસર દ્વારા લીક કરવામાં આવ્યું હતું. ત્યારબાદ વિદ્યાર્થીઓના ગ્રુપમાં ફરતું થયું હતું.
તો આ તરફ કૉલેજના પ્રિન્સીપાલનો દાવો છે કે આ પેપર વિદ્યાર્થીઓના ગ્રુપમાં ફરતું થયું હતું. જેથી કોઈ વિદ્યાર્થીનું જ આ કામ છે. સમગ્ર મામલે તપાસના આદેશ આપી દેવાયેલા છે. તપાસ બાદ જે વિદ્યાર્થીનું નામ સામે આવશે તેની સામે કાર્યવાહીનો નિર્ણય લેવામાં આવશે.