મહેસાણાના (Mehsana) 84 કડવા પાટીદાર સમાજમાં (Patidar community) એક નવી માગ ઉઠી છે. સમાજની કારોબારી બેઠકમાં (Patidar Samaj) સમાજની દીકરીઓ માટે કાયદો બનાવવા માગ કરવામાં આવી છે. તેમાં દીકરી ભાગીને લગ્ન કરે તો મિલ્કતમાંથી નામ કમી થાય તે માટે સમગ્ર મામલે સરકારને સમાજ રજૂઆત કરશે. દીકરીની લગ્ન નોંધણીમાં માતાપિતાની સહી ફરજિયાત કરવા માગ કરાઇ છે.
મહેસાણાના 84 કડવા પાટીદાર સમાજે પ્રેમ લગ્ન કરતી દીકરીઓ માટે માતા-પિતાની સહી ફરજિયાત રાખવાની માગણી કરી. દીકરીની લગ્ન નોંધણી સમયે માતા-પિતાની સહી ન હોય તો દીકરીનું મિલકતમાંથી આપોઆપ નામ નીકળી જાય તેવી સરકારમાં રજૂઆત કરાશે. 84 કડવા પાટીદાર સમાજના પ્રમુખ જશુ પટેલે કહ્યું કે દીકરીઓના અયોગ્ય યુવક સાથે થતા પ્રેમ લગ્નથી સર્વ સમાજ પરેશાન છે.
ગામ સમાજમાં સારી નામના કે મોભો ધરાવતો પરિવાર દીકરીના અયોગ્ય યુવક સાથેના પ્રેમ લગ્ન બાદ દુ:ખી થાય છે. પ્રેમ લગ્ન બાદ યુવકો દીકરીની મિલકત માટે તેના પરિવારજનો સામે કેસ કરીને હેરાન કરે છે. આ સમસ્યા મુદ્દે તમામ સમાજને સાથે રાખીને 84 કડવા પાટીદાર સમાજના પ્રમુખ સરકારમાં રજૂઆત કરશે. SPG ગ્રૂપ પણ અગાઉ દીકરીના પ્રેમ લગ્ન સમયે માતા-પિતાની સહી ફરજિયાત રાખવાની માગ કરી ચુક્યું છે.
SPG અધ્યક્ષ લાલજી પટેલે કહ્યું કે 84 કડવા પાટીદાર સમાજની માગણીને અમારો ટેકો છે. પ્રેમ લગ્નની આડમાં અસામાજિક તત્વો દ્વારા દીકરીઓને ફસાતી બચાવવી જોઈએ. અમે કાયદામાં ફેરફારની લાંબા સમયથી માગ કરી રહ્યાં છીએ. આ ઉપરાંત દીકરીઓને યોગ્ય જાણકારી મળે તે માટે 45 મિનિટનું નાટક તૈયાર કર્યું છે. જે સમાજના જુદા-જુદા પ્રસંગોમાં બતાવીને જાગૃતિ ફેલાવવામાં આવે છે.
વધુ સમાચાર વાંચવા માટે અમારી ટ્વીટર કોમ્યુનિટીમાં જોડાવા અહીં ક્લિક કરો