Breaking News: અમદાવાદ BRTS કોરિડોરમાં ‘સ્વિંગ ગેટ’ બિસ્માર, તંત્રને તાત્કાલિક રિપેરિંગના આદેશ

અમદાવાદના BRTS કોરિડોરમાં વાહનોના અનધિકૃત પ્રવેશને અટકાવવા લગાવવામાં આવેલા ‘સ્વિંગ ગેટ’ની સ્થિતિને લઈને સવાલો ઉઠ્યા છે. શહેરના કેટલાક વિસ્તારોમાં આ ગેટ ખરાબ થઈ ગયા હોવાની ફરિયાદો સામે આવી છે. ક્યાંક ગેટ તૂટી ગયા છે તો ક્યાંક ખુલ્લા રહેતા હોવાના કારણે સામાન્ય વાહનો સરળતાથી BRTS ટ્રેકમાં પ્રવેશી રહ્યા છે. આ મુદ્દો અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીની બેઠકમાં ચર્ચાયો હતો.

કરોડોના ખર્ચે ઉભી કરાયેલી વ્યવસ્થાની જાળવણી સામે સવાલ

BRTS કોરિડોરમાં સામાન્ય વાહનોના પ્રવેશ પર નિયંત્રણ રાખવા માટે AMC દ્વારા સ્વિંગ ગેટની વ્યવસ્થા કરવામાં આવી હતી. આ ગેટનો હેતુ BRTS બસ અને જરૂરી ઇમર્જન્સી વાહનો સિવાયના વાહનોને કોરિડોરથી દૂર રાખવાનો છે. જોકે, ગેટમાં ખામી સર્જાતા વ્યવસ્થાનો હેતુ જ નિષ્ફળ થતો હોવાનું સામે આવ્યું છે.

ગેટ ખુલ્લા રહેતા વાહનચાલકો BRTS ટ્રેકમાં ઘૂસી જાય છે

કેટલાક સ્થળોએ સ્વિંગ ગેટ તૂટી જવા અથવા ખુલ્લા જ રહેવાના કારણે વાહનચાલકોને BRTS કોરિડોરમાં પ્રવેશવાનો સરળ રસ્તો મળી જાય છે. પરિણામે BRTS બસો સાથે સામાન્ય વાહનોની અવરજવર વધે છે અને અકસ્માતની શક્યતા પણ વધી જાય છે. ખાસ કરીને ટ્રાફિકના વ્યસ્ત સમયે આ સ્થિતિ વધુ જોખમી બની શકે છે.

કમલેશ પટેલે તમામ ખામીયુક્ત ગેટ તાત્કાલિક રિપેર કરવા કહ્યું

સ્ટેન્ડિંગ કમિટીના ચેરમેન કમલેશ પટેલે બેઠક દરમિયાન ખામીયુક્ત સ્વિંગ ગેટની તાત્કાલિક મરામત કરાવવા સંબંધિત અધિકારીઓને સૂચના આપી છે. BRTS કોરિડોરમાં ગેટ કાર્યરત રહે અને સામાન્ય વાહનોનો અનધિકૃત પ્રવેશ અટકાવવામાં આવે તે માટે યોગ્ય જાળવણી કરવા પણ ભાર મૂકાયો છે.

અકસ્માતો રોકવા તંત્રની કામગીરી મહત્વપૂર્ણ

BRTS ટ્રેકમાં સામાન્ય વાહનોની ઘૂસણખોરીને કારણે અકસ્માતનો ખતરો રહે છે. આવી સ્થિતિમાં તૂટેલા અને બંધ ન થતા સ્વિંગ ગેટને ઝડપથી રિપેર કરાવવાની સાથે નિયમિત ચકાસણી પણ જરૂરી બની છે. હવે AMC દ્વારા ગેટની સ્થિતિ સુધારવા અને BRTS કોરિડોરમાં વાહનોના અનધિકૃત પ્રવેશ પર નિયંત્રણ લાવવા શું કાર્યવાહી કરવામાં આવે છે તેના પર નજર રહેશે.

આ પણ વાંચો- Breaking News: અમદાવાદમાં લોકદરબાર પહેલા અમિત શાહનું મતવિસ્તારમાં ભવ્ય સ્વાગત, જુઓ Video