Ahmedabad: 2 દિવસમાં નશો કરીને ડ્રાઈવ કરનારા 84 લોકો વિરુદ્ધ કેસ, હજુ પણ નિયમ તોડનારાઓની ખેર નથી

ગુજરાતમાં (Gujarat) હોળી-ધૂળેટીના તહેવારના પગલે યુવાનો ભાન ભુલી ભાંગ અને દારુ સહિતનો નશો કરતા હોવાની ઘટનાઓ સામે આવતી હોય છે. ત્યારે તહેવાર પહેલા જ અમદાવાદ (Ahmedabad) શહેર ટ્રાફિક પોલીસ વધુ સતર્ક બની હતી. ટ્રાફિક પોલીસ દ્વારા ડ્રિંક એન્ડ ડ્રાઇવ (Drink And Drive) કરનારાને પકડવાનું આયોજન કરવામાં આવ્યુ હતુ. બે દિવસમાં અમદાવાદ ટ્રાફિક પોલીસે (Traffic police) અલગ અલગ વિસ્તારમાંથી ટ્રાફિક નિયમોનો ભંગ કરનારા 84 લોકોની ધરપકડ કરી છે.

અમદાવાદ શહેર પોલીસ દ્વારા 5 દિવસ ડ્રિન્ક એન્ડ ડ્રાઈવનું આયોજન કરાયું છે. ત્યારે 2 દિવસમાં નશો કરીને ડ્રાઈવ કરનારા 84 લોકો વિરુદ્ધ કેસ નોંધાયા છે. 250 પોઈન્ટ બનાવીને ડ્રિન્ક એન્ડ ડ્રાઈવ અંગે પોલીસ ચેકિંગ કરી રહી છે. તેમજ અલગ અલગ પોઈન્ટ પર બ્રેથ એનલાઈઝર દ્વારા પણ તપાસ કરવામાં આવી રહી છે. ત્યારે અલગ અલગ ઝોનમાં કેસ નોંધાયા છે. જેમાં ઝોન-1માં 10, ઝોન-2માં 15, ઝોન-3માં 7, ઝોન-4માં 21 કેસ કરવામાં આવ્યા તેમજ ઝોન-5માં 12, ઝોન-6માં 6, ઝોન-7માં 4 કેસ કરવામાં આવ્યા છે.

અમદાવાદ પોલીસ દ્વારા વારંવાર નાગરિકોને ટ્રાફિકના નિયમોનું પાલન કરવા માટે કહેવામાં આવે છે. અનેક જાગૃતિ અભિયાન પણ શરુ કરવામાં આવે છે. આમ છતાં અમદાવાદના નાગરિકો ટ્રાફિક નિયમોના ભંગના કારણે વારંવાર પકડાતા હોય છે.

આ પણ વાંચો-Ahmedabad : નારણપુરા વિસ્તાર ફરી એકવાર વિવાદમાં, રોડ કપાતની નોટિસો બાદ સ્થાનિકોનો વિરોધ

આ પણ વાંચો-જામનગર : કૃષિ મંત્રીએ ખીજડીયા ખાતે સુજલામ સુફલામ જળ અભિયાનના પાંચમા તબક્કાનો પ્રારંભ કરાવ્યો