Trending Video: ના કોઈ નેતા, ના કોઈ સેલિબ્રિટી… નવી દુકાનના ગ્રાન્ડ ઓપનિંગમાં પહોંચ્યો આ ‘VVIP રોબોટ’
સામાન્ય રીતે કોઈપણ નવી દુકાન કે મોલનું ઉદ્ઘાટન કરવા માટે રાજકારણીઓ, બોલિવૂડ સેલિબ્રિટીઝ કે સ્થાનિક જાણીતી હસ્તીઓને આમંત્રણ આપવામાં આવતું હોય છે. જો કે, હાલમાં સોશિયલ મીડિયા પર એક એવો અનોખો વીડિયો વાયરલ થઈ રહ્યો છે કે, જેણે ઉદ્ઘાટન કરવા માટેની આખી વ્યાખ્યા બદલી નાખી છે.
ધાર્મિક અને સાંસ્કૃતિક નગરી ઉજ્જૈનમાંથી એક અનોખો તેમજ મનોરંજક વીડિયો ઇન્ટરનેટ પર ધમાલ મચાવી રહ્યો છે. સામાન્ય રીતે કોઈ દુકાન કે આઉટલેટનું ઉદ્ઘાટન નેતા, અભિનેતા કે શહેરની જાણીતી હસ્તીઓ કરતા હોય છે.
ખાસ વાત એ છે કે, ઉજ્જૈનમાં એક નવી સેન્ડવિચ શોપના ઉદ્ઘાટન માટે કોઈ માણસને નહીં પણ એક આધુનિક હ્યુમનોઇડ રોબોટને બોલાવવામાં આવ્યો હતો. તે રોબોટને જોવા માટે મોટી સંખ્યામાં લોકો ત્યાં પહોંચ્યા હતા. હવે વાત એમ છે કે, સોશિયલ મીડિયા પર આ વીડિયો છવાયેલો છે.
Robot ની એન્ટ્રી કોઈ નેતાથી ઓછી નહોતી
વાયરલ વીડિયોમાં જોઈ શકાય છે કે, રોબોટની એન્ટ્રી કોઈ મોટા સ્ટાર કે VVIP નેતાથી ઓછી નહોતી. લાલ રંગના કાર્પેટ પર ચાલતા આ રોબોટની આસપાસ કાળા કપડામાં સજ્જ બંદૂકધારી સુરક્ષાકર્મીઓ ચાલી રહ્યા હતા. રોબોટને જોવા માટે રસ્તા પર લોકોની ભારે ભીડ જામી ગઈ હતી અને દરેક વ્યક્તિ પોતાના મોબાઈલમાં આ નજારો કેદ કરવા લાગી હતી.
Inauguration of sandwich shop, Ujjain Madhya Pradesh pic.twitter.com/D5658yA30s
— NiLAY (@NilayPhotos) August 23, 2026
અહીં ભારતીય પરંપરા અને આધુનિક ટેકનોલોજીનો એક અનોખો સંગમ પણ જોવા મળ્યો હતો. દુકાનના માલિકોએ રોબોટનું સ્વાગત પરંપરાગત રીતે તિલક લગાવીને કર્યું હતું. આ પછી રોબોટના ગળામાં લાલ રંગનો દુપટ્ટો પહેરાવવામાં આવ્યો હતો. રોબોટે દુકાનના ઉદ્ઘાટન પહેલા થયેલી પૂજા-આરતીમાં ભાગ લીધો હતો અને રિબન કટિંગ વખતે પણ સાથે ઊભો રહ્યો હતો.
લોકો તાલીઓ પાડવા અને ઝૂમવા માટે મજબૂર થયા
દુકાનની અંદર ગયા પછી તેણે સર્વ કરવામાં આવેલી સેન્ડવિચની પ્લેટનું પણ અવલોકન કર્યું હતું. અસલી રોમાંચ ત્યારે શરૂ થયો, જ્યારે બેકગ્રાઉન્ડમાં ભગવાન શિવ અને મહાકાલના ભજન તેમજ ઢોલના તાલે સંગીત વાગવા લાગ્યું.
રોબોટે કોઈ પણ ખચકાટ વિના પોતાના કદમ થિરકાવવાનું શરૂ કરી દીધું હતું. તેણે પોતાના હાથ અને પગથી ફ્લેક્સિબલ ડાન્સ મુવ્સ બતાવ્યા. આ ડાન્સ જોતાં જ ત્યાંના હાજર લોકો તાલીઓ પાડવા અને ઝૂમવા માટે મજબૂર થઈ ગયા હતા.
VVIP બનીને પહોંચ્યો Robot
વીડિયો જોઈને તમે પણ આ રોબોટના ફેન થઈ ગયા હશો. આ વીડિયો લોકો વચ્ચે ધૂમ મચાવી રહ્યો છે. એક્સ (X) પર આ વીડિયો NilayPhotos નામના પેજ પરથી શેર કરવામાં આવ્યો છે. આ વીડિયોને અત્યાર સુધીમાં લાખો લોકો જોઈ ચૂક્યા છે.
એટલું જ નહીં, યુઝર્સ મજા લેતા આ વીડિયો પર કોમેન્ટ્સ કરી રહ્યા છે. એક યુઝરે લખ્યું કે, રોબોટનો ડાન્સ જોઈને લાગે છે કે આ લગ્નપ્રસંગોમાં પણ આમંત્રણ આપવા લાયક થઈ ગયો છે. અન્ય એક યુઝરે લખ્યું કે, આટલી ટાઈટ સિક્યુરિટી તો નેતાઓને પણ નથી મળતી; જેટલી આ સેન્ડવિચ પ્રેમી રોબોટને મળી છે.
