હવે Mobile વાપરવો બનશે મોંઘો, Telecom કંપનીઓ કોલિંગ અને ડેટાના ટેરિફ વધારવાની તૈયારીમાં

ટેલિકોમ કંપનીઓ ગ્રાહકોને મોટો ઝટકો આપવાની તૈયારીમાં છે. ટેલિકોમ કંપનીઓ 1 એપ્રિલ 2021 થી મોબાઈલ (mobile) કોલિંગ અને ડેટા ચાર્જમાં વધારો કરી શકે છે. રેટિંગ એજન્સી ICRAના રિપોર્ટ દ્વારા આ વાત બહાર આવી છે. જો કે કિંમતોમાં કેટલો વધારો કરી શકાય છે.તે અંગે હાલ કોઈ ખુલાસો કરવામાં આવ્યો નથી. પરંતુ જો કોલિંગ અને ડેટા ચાર્જમાં વધારો થાય છે, તો મોબાઈલ ફોન કોલ્સ અને ઇન્ટરનેટનો ઉપયોગ હાલ કરતા વધુ ખર્ચાળ બનશે. આવી સ્થિતિમાં, મોબાઇલ ફોન વપરાશકારોએ આગામી એક કે બે મહિનામાં ટેરિફ રેટ વધુ ચૂકવવા માટે તૈયાર રહેવું પડશે.

આ પહેલા ગયા વર્ષે પણ કેટલીક ટેલિકોમ કંપનીઓએ ટેરિફ વધાર્યો હતો. ટેલિકોમ કંપનીઓને લોકડાઉનમાં ઓછું નુકસાન થયું છે. જોકે, લોકડાઉન દરમિયાન વેલિડિટીની મુદત પૂરી થયા બાદ ટેલિકોમ કંપનીઓ દ્વારા રિચાર્જ ન કરાય તો પણ ઇનકમિંગ કોલ સુવિધા બંધ કરવામાં આવી ન હતી. જો કે, ઘરેથી કામ કરવાને કારણે ડેટા વપરાશ વધ્યો છે. વપરાશકર્તા દીઠ સરેરાશ આવક (ARPU) સુધરી છે. જોકે આ સામે વધતા ખર્ચને કારણે ARPUની કમાણી અપૂરતી સાબિત થઈ રહી છે. ટેલિકોમ કંપનીઓના AGR પર 1.69 લાખ કરોડ રૂપિયા બાકી છે. સમાન ટેલિકોમ કંપનીઓએ 5G સ્પેક્ટ્રમની હરાજી પ્રક્રિયામાં રોકાણ કરવા માટે નાણાં એકત્ર કરવા પડશે જે કંપનીઓ સામે મોટો પડકાર છે.

ICRAના રિપોર્ટ અનુસાર ટેલિકોમ કંપનીઓ ઝડપથી 2G થી 4G તરફ સ્થળાંતર કરી રહી છે જેના કારણે ટેલિકોમ કંપનીઓની આવક વધી રહી છે. રિપોર્ટ અનુસાર, આગામી બે વર્ષમાં ટેલિકોમ કંપનીઓની આવકમાં 11 થી 13 ટકાનો વધારો થઈ શકે છે જ્યારે તે પછી ઓપરેટિંગ માર્જિનમાં લગભગ 38 ટકાનો વધારો થશે.