ભારે વરસાદથી નેટવર્ક ઠપ્પ: સરકારે શરૂ કરી ICR સર્વિસ, જાણો ફોનમાં તેને ચાલુ કરવાની રીત

દેશના અનેક રાજ્યો અને કેન્દ્રશાસિત પ્રદેશોમાં ભારે વરસાદ, પૂર અને ભૂસ્ખલનના કારણે મોબાઈલ નેટવર્ક અને ટેલિકોમ સેવાઓ ખરાબ રીતે પ્રભાવિત થઈ છે. પરિસ્થિતિને ધ્યાનમાં રાખીને ટેલિકોમ વિભાગે (DoT) પ્રભાવિત વિસ્તારોમાં ઇન્ટ્રા સર્કલ રોમિંગ (ICR) સર્વિસ તાત્કાલિક અસરથી લાગુ કરી દીધી છે. આ સર્વિસ હેઠળ જો કોઈ કંપનીનું નેટવર્ક બંધ થઈ જાય છે, તો મોબાઈલ આપમેળે જ અન્ય ઉપલબ્ધ નેટવર્ક સાથે જોડાઈ જશે. આનાથી સામાન્ય લોકોની સાથે રાહત અને બચાવ ટીમોને પણ કનેક્ટિવિટી જાળવી રાખવામાં મદદ મળશે.

ક્યાં પ્રભાવિત થઈ ટેલિકોમ સેવાઓ?

સતત વરસાદ, પૂર અને ભૂસ્ખલનના કારણે નાગાલેન્ડ, ગુજરાત અને દાદરા નગર હવેલી તથા દમણ દીવના ઘણા વિસ્તારોમાં ટેલિકોમ નેટવર્કને ભારે નુકસાન પહોંચ્યું છે. ગુજરાતના વલસાડ, સિલવાસા અને દમણ દીવમાં મુખ્ય નેટવર્ક નોડ્સ બંધ થઈ ગયા છે, જેનાથી એરટેલ સહિત અનેક ઓપરેટર્સની સેવાઓ પ્રભાવિત થઈ છે. તો બીજી તરફ નાગાલેન્ડના મોન અને લોંગલેંગ જિલ્લાઓમાં ઓપ્ટિકલ ફાઈબર કેબલ તૂટવાથી મોબાઈલ અને ઈન્ટરનેટ સેવાઓ બાધિત થઈ છે. જમ્મુ અને કાશ્મીરમાં પણ ભારે વરસાદ અને ભૂસ્ખલનને કારણે ફાઈબર ઈન્ફ્રાસ્ટ્રક્ચરને નુકસાન થયું છે, જેનાથી કોલિંગ અને ઈન્ટરનેટ સેવાઓ પ્રભાવિત થઈ છે.

ICR સર્વિસ શું છે અને તેનાથી કેવી રીતે મદદ મળશે?

ટેલિકોમ વિભાગે આપત્તિ દરમિયાન કોમ્યુનિકેશન સિસ્ટમ જાળવી રાખવા માટે સ્ટાન્ડર્ડ ઓપરેટિંગ પ્રોસિજર 2020 અને યુનિફાઈડ લાઈસન્સ હેઠળ ઇન્ટ્રા સર્કલ રોમિંગ એટલે કે ICR સર્વિસ લાગુ કરી છે. DoTના નિર્દેશ અનુસાર આ સુવિધા 27 જુલાઈ 2026ના રોજ રાત્રે 11:59 વાગ્યા સુધી અથવા આગામી આદેશ સુધી લાગુ રહેશે. આ સર્વિસ એક્ટિવ થયા પછી જો કોઈ યુઝરનું પોતાનું મોબાઈલ નેટવર્ક ઉપલબ્ધ નહીં હોય, તો તેનો ફોન તે જ વિસ્તારમાં હાજર અન્ય કોઈ કંપનીના નેટવર્ક સાથે આપમેળે જોડાઈ જશે. આનાથી સ્થાનિક લોકોની સાથે NDRF, આરોગ્ય કર્મચારીઓ અને આપત્તિ વ્યવસ્થાપન ટીમોને પણ રાહત કાર્ય દરમિયાન સતત સંપર્કમાં રહેવામાં મદદ મળશે.

ફોનમાં નેટવર્ક ન આવે તો શું કરવું?

DoTએ જણાવ્યું છે કે ICR સેવાનો લાભ લેવા માટે મોબાઈલમાં ઓટોમેટિક નેટવર્ક સિલેક્શન ઓન હોવું જરૂરી છે. જો ફોન આપમેળે બીજા નેટવર્ક સાથે ન જોડાય, તો યુઝરે સેટિંગ્સમાં જઈને મોબાઈલ નેટવર્ક અથવા કનેક્શન વિકલ્પ ખોલવો. ત્યારબાદ નેટવર્ક ઓપરેટર્સમાં જઈને ઓટોમેટિક નેટવર્ક સિલેક્શન ઓન કરવું. જો આમ કર્યા પછી પણ સિગ્નલ ન મળે, તો મેન્યુઅલ વિકલ્પ પસંદ કરીને યાદીમાં દેખાતા કોઈપણ ઉપલબ્ધ નેટવર્ક સાથે ફોનને કનેક્ટ કરી શકાય છે. આનાથી આપત્તિના સમયમાં પણ મોબાઈલ સેવાનો ઉપયોગ ચાલુ રાખી શકાશે.

ICR કેવી રીતે ઓન કરવું?

1. તમારા ફોનનું સેટિંગ્સ ખોલો.
2. મોબાઈલ નેટવર્ક અથવા કનેક્શન ઓપ્શન પર જાઓ.
3. નેટવર્ક ઓપરેટર્સ પર ટેપ કરો.
4. ઓટોમેટિક નેટવર્ક સિલેક્શનને ઓન કરી દો.
5. જો છતાં પણ નેટવર્ક ન આવે, તો મેન્યુઅલ ઓપ્શન પસંદ કરો.
6. હવે સ્ક્રીન પર દેખાતા કોઈપણ ઉપલબ્ધ મોબાઈલ નેટવર્કને સિલેક્ટ કરી લો.
7. આનાથી ફોન બીજી કંપનીના નેટવર્ક સાથે કનેક્ટ થઈ જશે.

ચોમાસું આવતાં જ કેમ વધી જાય છે સાંધાનો દુખાવો? જાણો તેની પાછળનું વૈજ્ઞાનિક કારણ અને રાહત મેળવવાના ઉપાયો