Juice Jacking: ફોન ચાર્જ કરતા જ થઈ શકે છે હેક! જાણો શું છે Juice Jacking, તેનાથી કેવી રીતે બચશો
Juice Jacking એ એક સાયબર ખતરો છે જેમાં જાહેર USB ચાર્જિંગ સ્ટેશન દ્વારા મોબાઈલ ડેટા ચોરી અથવા માલવેર ઇન્સ્ટોલ થઈ શકે છે.
આજકાલ સ્માર્ટફોન વિના જીવન કલ્પના કરવું મુશ્કેલ બની ગયું છે. જ્યારે ફોનની બેટરી ખૂટી જાય છે ત્યારે લોકો સહેલાઈથી એરપોર્ટ, રેલવે સ્ટેશન, મોલ અથવા અન્ય જાહેર સ્થળોએ ઉપલબ્ધ USB ચાર્જિંગ પોર્ટનો ઉપયોગ કરે છે. પરંતુ આ સુવિધા ઘણી વખત જોખમકારક સાબિત થઈ શકે છે. જાણો આવા જ એક સાયબર થ્રેટ વિશે.
Juice Jacking શું છે?
Juice Jacking એ એક સાયબર સુરક્ષા જોખમ છે જે જાહેર USB ચાર્જિંગ સ્ટેશનો સાથે જોડાયેલું છે. જ્યારે કોઈ વપરાશકર્તા પોતાનો ફોન અજાણ્યા USB પોર્ટમાં કનેક્ટ કરે છે, ત્યારે માત્ર વીજળી જ નહીં પરંતુ ડેટા ટ્રાન્સફર માટેની લાઇન પણ સક્રિય થઈ જાય છે. આ તકનો લાભ ઉઠાવી હેકર્સ ડિવાઇસ સુધી પહોંચ મેળવી શકે છે. આ જોખમ ખાસ કરીને એરપોર્ટ, મોલ, હોટેલ અને રેલવે સ્ટેશન જેવા જાહેર સ્થળોએ વધારે જોવા મળે છે.
હેકર્સ ડેટા કેવી રીતે ચોરી કરે છે?
આ પ્રકારના હુમલામાં સાયબર ગુનેગારો પહેલાથી જ USB ચાર્જિંગ પોર્ટ અથવા કેબલમાં ફેરફાર કરીને તેને જોખમી બનાવી દે છે. જ્યારે કોઈ વ્યક્તિ પોતાનો ફોન આવા પોર્ટ સાથે જોડે છે, ત્યારે ફક્ત બેટરી ચાર્જ થતી નથી, પરંતુ અંદરથી ડેટા સુધી પહોંચવાનો ગુપ્ત પ્રયાસ પણ શરૂ થઈ શકે છે.
યુઝરને ઘણીવાર આ બાબતનો ખ્યાલ પણ આવતો નથી. ક્યારેક ફોનમાં અજાણતાં જ હાનિકારક એપ્લિકેશન અથવા સોફ્ટવેર ઇન્સ્ટોલ થઈ જાય છે, જે સતત ડિવાઇસની માહિતી એકત્રિત કરતું રહે છે. આ સમગ્ર પ્રક્રિયા ખૂબ જ ઝડપથી અને કોઈપણ ચેતવણીઓ આપ્યા વિના થઈ શકે છે.
કયા કારણે જોખમ વધે છે
અજાણ્યા અથવા જાહેર USB પોર્ટનો ઉપયોગ કરવાથી ડેટા ચોરીનો ખતરો વધી જાય છે. ફ્રી ચાર્જિંગના લાલચમાં લોકો અસુરક્ષિત કેબલ અથવા સ્ટેશનનો ઉપયોગ કરે છે.
સસ્તા અથવા નકલી USB કેબલ પણ જોખમકારક હોય છે, કારણ કે તેમાં છેડછાડ થવાની શક્યતા વધારે હોય છે. આવી નાની બેદરકારી મોટા સાયબર હુમલાનું કારણ બની શકે છે. 
કેવી રીતે રાખશો પોતાને સુરક્ષિત
આવા સાયબર જોખમથી બચવા માટે સાવચેત રહેવું ખૂબ જ જરૂરી છે. શક્ય હોય ત્યારે હંમેશા પોતાનો ચાર્જર અને કેબલ જ ઉપયોગ કરવો. જાહેર USB પોર્ટની બદલે પાવર બેંકનો ઉપયોગ વધુ સુરક્ષિત વિકલ્પ બની શકે છે.
જો અજાણ્યા સ્થળે ફોન ચાર્જ કરવો જરૂરી બને, તો USB ડેટા બ્લોકર જેવા સાધનોનો ઉપયોગ કરી શકાય. થોડી સાવચેતી રાખવાથી તમારો ફોન અને મહત્વપૂર્ણ ડેટા બંને સુરક્ષિત રહી શકે છે.
